30
Mangngimburui Rahel lako kakanna, sabaq teqdapa anak nasikabalii Yakub. Namangkada lako Yakub nakua, <<Madoang todanaq akuq njajian anak, ia ke teqdai, maqnamo kumate bangmo.>> 2 Mabirihhi Yakub nakuanni to Rahel, <<Tangngianaq Puang Allataala to tangneloranko keanak.>> 3 Nakuamo Rahel, <<Kaunankuqmo Bilha tasisolan mammaq nanjajian anak. Ia ke denmi pea najajian, iamo kupuanak.>> 4 Nabenmi Rahel to Bilha kaunanna lako Yakub napubainei, nasisola mammaq. 5 Kebaqtangmi Bilha nanjajian mesaq anak muane. 6 Mangkadai Rahel nakua, <<Napattantumi PUANG Allataala kumua tongannaq. Naissen to kupetaqda, Nabenmoq mesaq anak muane.>> Iamo nasangaii Dan joo anakkana.a 7 Teqda namasain kebaqtang poleq omi Bilha nanjajian o anak muane. 8 Nakuamo Rahel, <<Kupangngattai tongan nnewa kakangkuq kupatalo.>> Iamo joo nasangaii Naftali joo anakkana.b 9 Ia tonna issenmi Lea kumua teqdamo na la keanak, nabenmi to Zilpa kaunanna lako Yakub napubainei, 10 najaji to anakkana Zilpa, muane. 11 Nakuamo Lea, <<Maupaqnaq.>> Nasangaii Gad joo pea.c 12 Jaji poleq omi to anakkana Zilpa muane. 13 Namangkada Lea nakua, <<Liwaqnaq masannang! La nakua ngasan to baine too, <Ikomo masannangna.> >> Iamo joo nasangaii Asyer joo pea.d14 Ia tonna wattu megandum to tau, malemi Ruben, anakkana Lea, lako padang. Nnampaqmi mesaq tananan to napupejampi totamanang nawaqding keanak, nabawai lako indona. Mangkadami Rahel lako Lea nakua, <<Bennaq ciqdiq tuu tananan dipupejampi naampaq anakkamu.>> 15 Mebalii Lea nakua, <<Tanggannaqparaka to mualainaq muanekuq? Na ia too, la mpetaqda omoko tananan dipupejampi to naampaq anakkuq.>> Nakuamo Rahel, <<Ia ke madoangko mbennaq, kueloranko sisola mammaq Yakub tee bongi.>> 16 Ia tonna karuenmo, polemi Yakub jio mai padang, natammuimi Lea nakuanni, <<Ia tee bongi la torro opikiq sola tasisola mammaq, sabaq mangkami kutongka tananan dipupejampi to naampaq anakkuq.>> Mammaqmi Yakub sola Lea joo bongi. 17 Natarima Puang Allataala to passambajangna Lea, kebaqtang poleq omi na njajian mesaq anak muane, anak mangpellima. 18 Nakua Lea, <<Nasaroimoq Puang Allataala, sabaq mangkamoq mben Zilpa kaunankuq lako muanekuq.>> Iamo joo nasangaii Isakhare joo anakkana. 19 Kebaqtang poleq omi Lea, nanjajian mesaq anak muane, anak mangpenannan. 20 Nasangaii Zebulonf joo anakkana, sabaq nakua, <<Nabenmoq barakkaq Puang Allataala liwaq kassing. Ia tee wattu akuqmo la nanii mariqpih torro muanekuq, sabaq annanmi anak muane kujajian.>> 21 Mangkai joo too keanak omi Lea njajian mesaq anak baine, nasangaii Dina.
22 Naparinawa Puang Allataala to Rahel, Natarimai to passambajangna nawaqding njajian anak. 23 Jaji kebaqtangmi Rahel na njajian mesaq anak muane. Nakuamo Rahel, <<Nataqdeimi Puang Allataala to siriqkuq. 24 Dennaa upaq Nabenpaq PUANG Allataala mesaq anak muane.>> Iamo nasangaii Yusufg joo anak pamungahna.
Sitawahhi Yakub na Laban
30:25-43
25 Ia tonna mangkamo Rahel njajian Yusuf, mangkadai Yakub lako Laban nakua, <<Eloranmoq pole lako kampong kajajiankuq. 26 Elorannaq male kusolanni to repokkuq. Ia bangmo joo tabennaq kupusaro na taissen kumua, silaqdaq tongannaq mpangjamankiq.>> 27 Mangkadami Laban lako Yakub nakua, <<Ia ke mupakamojaqnaq torromoko indeq, sabaq ia to pakita-kitangkuq manassa kumua Nabarakkaqinaq PUANG Allataala sabaq iko. 28 Pau bangmi pirara la mupetaqda to saromu.>> 29 Mebalii Yakub nakua, <<Taissen kumua, silaqdaq tonganmoq mpangjamankiq nasabuda-budanna to patuoantaq, sabaq kuparakai meloi. 30 Ia tongkumaneq ratu indeq, teqdapa napira to patuoantaq, apa ia too sabuda-budannami. Sipamulanaq ratu indeq Nabarakkaqi tarruhkiq PUANG Allataala. Ia too wattunnamoq la njampang repokkuq.>> 31 Nakuamo Laban, <<Jaji apara to la kubenko?>> Mebalii Yakub nakua, <<Danggiq omo tabennaq to laenna. La tattaqnaq rrewai patuoantaq, assalan tasitujuii tee petaqdangkuq. 32 Taelorannaq tee allo mentama allaq beketaq sola dombataq, kupileii to beke sola domba kambalang baqtu buriqtik-riqtikna na anak domba bolong. Ia mandara joo kukadoangngi kupusaro. 33 Na ia ke ratukiq mparessai to patuoan kupusaro, taqpa la taissen kumua maruruhraqka baqtu teqdaraka. Nasabaq ia ke den beke takita teqda naburiqtik-riqtik, baqtu teqda nakambalang, baqtu domba teqda namalotong, iamo tanii nnissenni kumua ia joo patuoan kubokora.>> 34 Mebalii Laban nakua, <<Io, situjunaq! Pugaukmi tuu musanganna.>> 35 Apa ia joo wattu, napassala ngasanni Laban to beke muane macureq-cureq baqtu kambalang sola ia ngasan to beke baine buriqtik-riqtik baqtu kambalang sola to den mabusanna bulunna. Napassala ngasan tooi to anak domba malotong. Namaneq ssuai to anakkana male rrewaii joo patuoan napassala. 36 Malemi Laban sola anakkana mbawa mabela patuoanna, agi-agi tallung allo dilingkai dikua namabela jio mai Yakub. Ia to beke sola dombana Laban torropa, tattaq narewai Yakub.
37 Mangkai joo too, naalai Yakub to tangke kaju hawar macikkiq na tangke kaju almond sola tangke kaju berangan, nakalopakkii piraq to kuliqna, napajan to mabusanna, namacureq-cureq dikita. 38 Napatamai ngenan to nanii mangngisoq beke sola domba joo tangke kaju, napajioi olona, sabaq ia joo patuoan, nakabudai kawin ke la mangngisoqi. 39 Jaji ia to beke sola domba ke kawinni jio olona joo tangke kaju macureq-cureq, ia to anakkana, la macureq-cureq iarika buriqtik-riqtik baqtu kambalang. 40 Napupessarakki Yakub joo anak domba. Ia ke la kawin omi to beke na la kawin too to domba, napasioloanni to macureq-cureqna na malotongna. Susimi joo carana Yakub nnampaq patuoan to la naputawa, napupessarakki jio mai patuoanna Laban. 41 Ia ke la kawinni to beke sola domba maloppo, naalai Yakub to tangke kaju mangka nakalopakki, napadoqi isotan patuoan jio olo patuoan to la kawin. 42 Apa ia to madokona teqda napajioanni olona. Jaji ia to patuoan madoko, iamo tawana Laban, na ia to patuoan maloppo iamo tawana Yakub. 43 Susimi joo nasasugih-sugihna to Yakub, buda bekena, dombana, untana, keledainna, na buda kaunanna la muane la baine.