Yakub sitammu Rahel
29:1-14
29
Mpatarruhmi kalingkanna Yakub, namale lako kampong laen jio kadellekanna tana Kanaan. 2 Mengkita mengguririkmi nataqpa ngkita mesaq bubun jio padang. Den beke sola domba, tallung torroan simammaq-mammaran jio joo siandah bubun, to tuli dinii mpaisoq patuoan. Ia joo bubun disamboi batu gaja tonggo. 3 Ianna sirempun ngasanmo to beke sola domba jio saqde bubun, maneqri nalentenni tomangrewa to batu pesambo bubun, napaisoqi joo beke sola dombana. Ianna mangka mpaisoqi to patuoanna nasamboi poleqmi joo bubun. 4 Nakutanaimi Yakub joo tomangrewa nakua, <<Ee mane, topole umbora kamuq?>> Mebalimi nakua, <<To-Harankan.>> 5 Mekutana omi Yakub nakua, <<Mitandairaka to Laban ampona Nahor?>> Mebalimi nakua, <<Kitandai.>> 6 Nakutanai omi Yakub nakua, <<Malagah-lagah unarika?>> Mebalimi nakua, <<Malagah-lagah una ia. Itiq joo to anakkana baine disanga Rahel maneq ratu rramba beke sola dombana ambeqna.>> 7 Nakuamo Yakub, <<Na majao bangpa allo, teqdapa nawattunna to beke sola domba dipatama bontongna. Ciapari nateqdapa mipaisoqi, miramba poleqi namale ngkande reu?>> 8 Mebalii joo tomangrewa nakua, <<Teqdapa kiwaqding llentennii tee batu pesambo bubun, ke teqdapi nasirempun ngasan to beke sola domba kipaisoqi.>>9 Mukkun unapi Yakub sipangkada-kada tomangrewa, ratumi Rahel rramba beke sola dombana ambeqna, sabaq iamo dipabarakkanni. 10 Ia tonna kitami Yakub to Rahel, anakkana Laban sileqtona indona ratu rramba beke sola domba, malemi Yakub lako joo bubun nalentennii to batu pesambo bubun napaisoq patuoanna Laban. 11 Namaneq nnudungngi Yakub to Rahel, nakumarrak sabaq marioi. 12 Mpangpetandanmi kalena Yakub, nakua <<Anakkananaq Ribka, sileqtona ambeqmu.>> Taqpa larimi Rahel lako bolana, mpaui lako ambeqna. 13 Ia tonna saqdingngi Laban kumua ratui Yakub anakkurena, larimi ntammuii. Ia tonna sitammumo narakaqi Laban, naudungngi namaneq ssolanni lako bolana. Nacuritan ngasanni Yakub lako Laban to apa jaji lako kalena. 14 Mangkadami Laban nakua, <<Manassa sangrara sangbukukiq.>> Torromi Yakub jio bolana Laban sangbulan.
Yakub botting
29:15-30
15 Den wattu namangkada Laban lako Yakub nakua, <<Teqda namelo ke kusua bangroko mangjama moi kupuanakkureko. Pirara la kupagajianko?>> 16 Ia to Laban dua anakkana baine, ia to pamungah disanga Lea, na ia to adinna disanga Rahel. 17 Ia to Lea melo matannaa, na ia to Rahel melo pangkaleanna na gaja lolo. 18 Liwaq nakacinnai Yakub to Rahel, namangkada lako Laban nakua, <<Waqdingnaq tapupangjama pitung taun ke taelorannaq sibali Rahel anak tampakkataq.>> 19 Mebalimi Laban, nakua, <<Melomi ke iko nasibalian na ia ke tau laen mpubainei, jaji torromoko indeq.>> 20 Napangjamanni Yakub pitung taun masainna dikua nawaqding sibali Rahel. Ia joo wattu pitung taun, teqda narasai nagannaqmo, susiri to pirang-pirang allora nasaqding, sabaq gaja nakacinnai to Rahel.
21 Ia tonna deteqmi joo wattu pitung taun, nakuamo Yakub lako Laban, <<Gannaqmi to wattu pitung taun, eloranmoq sibali joo anakkataq.>> 22 Natambai ngasanni Laban to tau llan joo kota namangroah-roah mangpabotting. 23 Apa ia tonna bongimo, tangngia Rahel to nasolan Laban lako Yakub, apa Leara namammaq sola. 24 Naben tooi Laban mesaq kaunan baine to Lea disanga Zilpa, napukaunanni. 25 Masawamira makaleq namaneq nnissenni Yakub kumua Lea to nasolan mammaq. Malemi Yakub mangkada lako Laban nakua, <<Ciapari tapasusiraq tee? Kusanga iara kupangjamankiq, dikuara kusibali Rahel. Antauragaraq?>> 26 Mebalii Laban nakua, <<Ia to adaqkiq indeq, teqda nawaqding dijoloi to kaka botting. 27 Pagannaqmi joloq pitung allo tee pangmaroasan kasibalianmu Lea, mumaneq nnala saromu, iamo to kasibalianmu Rahel assalan mupangjaman poleqpaq pitung taun.>>
28 Nasitujui Yakub, na ia tonna mangkamo to kasibalianna Lea pitung allo, naeloranmi Laban sibali Rahel. 29 Naben tooi Laban mesaq kaunan baine to Rahel disanga Bilha napukaunanni. 30 Sisolami mammaq Yakub na Rahel. Laqbi napakamojaq Yakub to Rahel na ia to Lea. Napangjaman poleqmi to Laban pitung taun masainna.
Anakkana Yakub
29:31–30:24
31 Nakitai PUANG Allataala kumua teqda napakamojaqi Yakub to Lea, iamo Naeloranni njajian batiq, apa tamanangngi to Rahel. 32 Kebaqtangmi Lea, na njajian mesaq anak muane. Nakuamo Lea, <<Nakitami PUANG Allataala to kamasussankuq, jaji la napakamojaqmoq muanekuq.>> Nasangaimi Rubenb joo anakkana. 33 Kebaqtang omi Lea, na njajian omo mesaq anak muane. Nakuamo Lea, <<Naben poleq omoq anak PUANG Allataala, sabaq Naissen kumua, teqda kudipakamojaq.>> Nasangaimi Simeonc joo anakkana. 34 Kebaqtang poleq omi Lea, na njajian mesaq anak muane. Nakua omo Lea, <<Nang la nakamaliqmoq muanekuq too, sabaq tallumi anak muane kujajian.>> Nasangaimi Lewid joo anakkana. 35 Kebaqtang poleq omi Lea, na njajian mesaq anak muane. Nakua omo Lea, <<Ia too la mpujinaq PUANG Allataala.>> Nasangaimi Yehudae joo anakkana. Mangkai joo too, teqdamo nakeanak to Lea.