28
Natambaimi Ishak to Yakub nabarakkaqii nakuanni kumua, <<Danggiq musibali anaqdara to-Kanaan. 2 Male lakoko Mesopotamia, lako bolana nenemu muane Betuel, musibali sala mesaqna anakkana Laban, sileqtona indomu. 3 Dennaa upaq Nabarakkaqiko Puang Allataala to makuasa na sabuda-budanna batiqmu, mumenjaji ambeqna buda bangsa. 4 Dennaa upaq Nabarakkaqiko sola batiqmu, susi to mangka Nabarakkasan nenemu Nabi Ibrahim. Mupumanah tarruhhi tee tana mutorroi to munii mentoratu. Ia tee tana mangka Naben Puang Allataala lako nenemu Nabi Ibrahim.>>a 5 Susimi joo Yakub nasua ambeqna male lako Laban, anakkana Betuel to-Aram jio Mesopotamia. Ia to Laban sileqtona Ribka. Na Ribka iamo indona Yakub sola Esau.Esau kebaine poleq
28:6-9
6 Naissenmi Esau kumua mangkami Ishak mbarakkaqi Yakub, na nasuami male lako Mesopotamia nnangah baine jio, sabaq teqda naeloranni sibali anaqdara to-Kanaan. 7 Naissen too Esau kumua ia to kamaleanna Yakub lako Mesopotamia sabaq nturuqi pakkaeloranna tomatuanna. 8 Maneqri napahang Esau kumua teqda nakabudaii ambeqna to baine to-Kanaan. 9 Namale Esau lako Ismail, anakkana Nabi Ibrahim to nasikabalii Hagar, kaunanna Sara. Sibalimi Esau na Mahalat, adinna Nebayot, anakkana Ismail. Baine mangpentallunnami Esau to Mahalat.
Tindona Yakub jio Betel
28:10-22
10 Keqdehmi Yakub jio mai kota Bersyeba mangnguju lako kota Haran. 11 Ia tonna kabuhmo allo, kendenmi jio mesaq ngenan namangbongi jio. Merraqbami namammaq mpuallonan mesaq batu. 12 Mangtindomi ngkita eran tindak jiong mai litak ratu deq langiq. Nangkita buda malaekaq-Na Puang Allataala lao lisu nnolai joo eran.b 13 Nangkita PUANG Allataala keqdeh jio saqdena mangkada Nakua, <<Akuqmo PUANG Allataala to nasompa nenemu Ibrahim sola ambeqmu Ishak. Ia tee tana to munii mammaq la Kubenko mupumanahhi sola batiqmu.c 14 Ia to batiqmu la susi kassiq budanna. Na titale llan lino na ikomo sola batiqmu napusabaq Kubarakkaqii to sininna suku bangsa llan lino.d 15 Ingaranni, moi umbo muola nang la Kusolanko, Kujagai tarruh tooko, arannai Kupapoleko tama ntee kampong. Teqda Kusalaiko na la Kupugauk ngasan to apa pura Kujanji.>>
16 Mangkai joo too panaqdingmi Yakub, namangkada nakua, <<Den-Ni paleq PUANG Allataala ntee, na teqda akuq kuissenni!>> 17 Malajaqmi namangkada nakua, <<Gaja makaramaq ia tee ngenan! Manassa nteemi to Bola Puang Allataala sola babangan mentama suruga.>> 18 Masawanna napelambikkii Yakub miqcok, naalai joo batu napuallonan, napakeqdehhi menjaji batu pangpangngingaran, namaneq ntolloii minynyak zaitune. 19 Nasangaimi kota Betelf joo ngenan. Ia tonna jolona disanga kota Lus.
20 Mangtinjaqmi Yakub nakua, <<Ia ke Nasolannaq Puang Allataala Najagainaq llan tee kalingkangkuq Naben toonaq kande sola pakean 21 kupole rampaq lako bolana ambeqkuq, Kitaqmo PUANG Allataala to la kusompa. 22 Na ia to apa mangka Tabennaq la kupapolean-Kiq tawa sangpulona. Na ia tee batu pangpangngingaran kupakeqdeh la menjaji ngenan passompan lako Kitaq.>>