Ishak mbarakkaqi Yakub
27:1-29
27
Ia tonna matuamo Ishak, na teqdamo napakita, natambaimi to Esau anak pamungahna, nakua, <<Ee, anakkuq.>> Mebalimi Esau, <<Iyeq.>> 2 Nakuamo Ishak, <<Muissen anakkuq kumua matuamoq, nateqdamora nasangngapa kumate. 3 Mpasadiamoko panamu mumale rumangngan tama pangngala, mujokkoannaq mesaq olok-olok. 4 Munasui susi to kukabudai, mubawannaq kukandei. La kubarakkaqiko, taqbuluq tuo unapaq.>>5 Apa nasaqdingngi Ribka to kadanna Ishak lako Esau. Ia tonna malemo Esau rumangngan, 6 nakuamo Ribka lako Yakub, <<Ee anakkuq, kusaqding to ambeqmu mangkada lako kakammu nakua, 7 <Maleko rumangngan mujokkoannaq mesaq olok-olok, munasui susi to kukabudai mubawannaq kukandei. Ia ke mangkamoq kumande, la kubarakkaqiko jio olo-Na PUANG Allataala, taqbuluq tuo unapaq.> >> 8 Nakuapa Ribka, <<Ee anakkuq, den la kupauanko too mupugaukki. 9 Maleko lako pangrewantaq, mualannaq dua anak beke to maloppona, kunasui, susi to nakabudai ambeqmu. 10 Mubawanni ambeqmu nakandei, namaneq mbarakkaqiko, taqbuluq tuo unapi.>>
11 Nakuamo Yakub lako indona, <<Taissen kumua kebulu ia kalena to kakangkuq, na malanyik akuq to kuliqkuq. 12 Iamo ke nasapunaq ambeqkuq, na teqda nakebulu kalekuq, nasangai kucapaq-capaq, na tangngiamo barakkaq to kutarima, apa sumpara.>> 13 Mebalimi indona nakua, <<Danggiq mumalajaq, na akuqmora nakanna sumpana. Turuqi bangmi tee kadangkuq. Malemoko nnalai joo beke.>> 14 Malemi Yakub nnala beke, nabawai lako indona, nanasui susi to nakabudai Ishak. 15 Mangkai joo too, napileimi Ribka to pakean melona Esau, to naanna llan tenda nabenni Yakub, napakei. 16 Ia to limanna sola kollongna Yakub napabukkuqi joo dua balulang beke, sabaq teqda nakebulu to kalena. 17 Nabenmi Yakub to kande melo mangka nanasu sola roti.
18 Nabawanmi Yakub ambeqna joo kande, namangkada nakua, <<Ambeq.>> Mebalimi ambeqna nakua, <<Apamora, indannaroko anakkuq?>> 19 Nakuamo Yakub, <<Akuq Esau, anak pamungahtaq. Indeqmi to kande tasuannaq. Cadokkomikiq, takandei tee asseleq rumangngankuq, tamaneq mbarakkaqinaq.>> 20 Nakuamo Ishak, <<Madoiq unako meatta anakkuq!>> Mebalimi Yakub nakua, <<Natulungnaq PUANG Allataala to tasompa.>> 21 Nakua omo Ishak, <<Ntee-teeko kee anakkuq, kusapuko joloq, namajappu kumua iko tonganmoraka Esau.>> 22 Mengkadeppeqmi Yakub, nasapui ambeqna. Nakuamo ambeqna, <<Ianna gamara, gamaranna Yakub, apa ianna lima, limanna Esau.>> 23 Jaji teqda naissenni Ishak kumua Yakub, sabaq kebulu limanna susi Esau, kakanna. La nabarakkaqimi, 24 apa mekutana poleqi nakua, <<Iko tonganmoraka Esau?>> Mebalimi Yakub nakua, <<Akuqmo.>> 25 Nakuamo ambeqna, <<Bawami mai tuu kande, asseleq rumangnganmu, kukandei kumaneq mbarakkaqiko.>> Nabenmi Yakub joo kande, nakandei napasiisoqi anggur. 26 Mangkai joo too nakuamo ambeqna, <<Ntee-teeko anakkuq, muudungnaq.>> 27 Mendeppeqmi Yakub nnudung ambeqna. Ia tonna pebaui ambeqna kumua baunna Esau, nabarakkaqimi. Nakua,
<<Ee anakkuq, ia to baummu
susi bau padang to Nabarakkaqi PUANG Allataala.a
28 Dennaa upaq Naparatuanko Puang Allataala ambun jao mai langiq,
Nabenko padang maloppo llan lino,
nakeasseleq melo to gandum sola anggurmu.
29 Dennaa upaq na sininna bangsa mupukaunan,
na sininna suku bangsa la ssujuqko.
Dennaa upaq na iko sola batiqmu napekapuangngi sileqtomu sola batiqna
nasujuqko.
Dennaa upaq Nasumpaii Puang Allataala to tossumpaiko,
Nabarakkaqii to tombarakkaqiko.>>b
Esau metaqda barakkaq lako ambeqna
27:30-40
30 Ia tonna mangkamo Ishak mbarakkaqi Yakub messunmi Yakub, na teqda namasain polemi Esau rumangngan. 31 Napemeloii nasunna to olok-olok naatta nabawanni ambeqna, nakua, <<Cumadokkomikiq takandei tee pannasu asseleq rumangngankuq, tamaneq mbarakkaqinaq.>> 32 Apa nakua ambeqna, <<Indaroko?>> Mebalii Esau nakua, <<Na akuqmo Esau, anak pamungahtaq.>> 33 Gaja sabakanni Ishak nambeqbeh namekutana nakua, <<Na indamora lakoq joo male rumangngan namangkamoq nabawan nnenaq? Mangkami kukande to pannasunna mumaneq ratu. Na mangka toomi kubarakkaqi, napubarakkaq tarruhhi.>> 34 Ia tonna saqdingmi Esau joo kadanna ambeqna, massemi napeandongngii kumarrak, nametaqda lako ambeqna nakua, <<Barakkaqi todanaq akuq, ambeq!>> 35 Nakuamo ambeqna, <<Mangkamoq nauraga adimmu, na mangkami kuben to barakkaq la kubarakkasanko.>> 36 Nakuamo Esau, <<Siolananmi ia disanga Yakubc, sabaq penduanmoq nauraga. Mangkami naala to anggaqkuq, nasullenaq menjaji anak pamungah, na naala omi to barakkaqkuq. Teqdamoraka barakkaq laen la tabennaq?>>d 37 Mebalimi Ishak nakua, <<Mangkami kupattantu la mupupuang sola batiqmu na iko sola batiqmu la napukaunan. Mangka toomi kupabarakkaqi gandum na anggur. Na teqdamo apa la kubarakkasanko anakkuq!>> 38 Apa teqda napaja metaqda lako ambeqna nakua, <<Oo ambeq, ia mandaraka joo barakkaq tapangben? Barakkaqi todanaq akuq!>> Napeandongngimi kumarrak.e 39 Namebali ambeqna nakua,
<<Ia to padang munii torro
teqda bang maloppo
na teqda natoqdoii ambun jao mai langiq.
40 La tuo jioroko mai asseleq laqboh landomu to mupake parari iarika mangrampoq,
na la napukaunanko adimmu.
Apa la den wattu mupangngattai tonganni nnewai,
mulaqpah jio mai kuasanna adimmu.>>f g
Yakub palai lako tana Mesopotamia
27:41–28:5
41 Gaja baqcii Esau lako Yakub, sabaq ia to barakkaqna mangkami nabarakkasan ambeqna lako Yakub. Mangkadami nakua, <<Teqdamo namasain ambeqkuq namate. Ia ke matemi nadipapura to allo-allona, iamo la kunii mpatei Yakub.>> 42 Ia tonna issenni Ribka joo akkattana Esau, mangpesuami ntambai Yakub, nakua lako Yakub, <<Mangngattai to kakammu la mpembalahhiko napateiko. 43 Jaji susii tee to la mupugauk anakkuq. Palaimoko lako Laban, ambequremu jio kota Haran. 44 Torro bangmoko jio joloq, sanggenna matana penawanna kakammu, 45 na teqdamo naingaranni to apa mangka mupugauk lako kalena. Kusuamira to tau male ntambaiko ke matanami penawanna. Teqda kumadoang, la sangngallora nanii ssalainaq dua anakkuq, ke napateiko kakammu na dipatei toda.>>
46 Mangkai joo too nakuamo Ribka lako Ishak, <<Teqdamo buaqkuq tuo ngkitai joo dua to-Het, bainena Esau. Ianna baine ntee bang unapa mai nasibalian Yakub, susi tuu lako baine to-Het, akeq bangmo matenaq.>>