Ishak jio tana to-Filistin
26:1-25
26
Malemi Ishak lako Abimelekh, rajana to-Filistin jio kota Gerar, sabaq pebarrangan omi namasussa diampaq to kande jio tana Kanaan to nanii torro Ishak. Pempiran-piranmo jaji susi joo. Den napebarrangan tonna tuopa Nabi Ibrahim. 2 Mpangpekitan-Mi kale-Na PUANG Allataala lako Ishak Namangkada kumua, <<Danggiqmo mumale doq tana Mesir, la Kupauanko to kampong la munii torro. 3 Mariqpihmoko ntee kampong mentoratu, na la Kulendungngiko, Kubarakkaqi tooko. Sabaq sininna tee kampong la Kubenko sola batiqmu. Iamo la Kunii mpugaukki to janjing-Kuq lako Ibrahim, ambeqmu. 4 La Kupebudai to batiqmu pada budanna bintuin jao langiq, Kubenni tee sininna tana Kanaan. Na batiqmu napusabaq Kubarakkaqi to sininna bangsa,a 5 sabaq napesaqdingngi Ibrahim ambeqmu to pangpakaingaq-Kuq, naturuqi to sininna atoran-Kuq, napugauk ngasan to parenta-Kuq.>> 6 Torromi Ishak jio kota Gerar.7 Ia tonna mekutana to tau jio kota Gerar kumua, <<Indara tuu baine musolan?>> Mebalimi Ishak nakua, <<Sileqtokuq.>> Malajaqi nnakuii kumua balinna sabaq mangpikkiriqi kumua, <<Iamo ke napateinaq tau ntee, sabaq nakacinnai to Ribka gaja lolo.>>b 8 Ia tonna masainmo torro jio, den pissen, namengkita Abimelekh, rajana to-Filistin, jao mai pentiroanna, na kitai to Ishak sirakaq Ribka. 9 Natambaimi Raja Abimelekh to Ishak nakuanni, <<Na bainemu paleq tuu, mukua ora kumua, <Sileqtokuq.> >> Mebalimi Ishak nakua, <<Kukua llan penawangkuq, la kupumate ke kukua balingkuq.>> 10 Nakuamo Raja Abimelekh, <<Ciapari muuragakan? Ia tee panggaukanmu waqding bang den tau manggauk sala lako balimmu, na iko-iko mpusabaqi na kamiq dipasala.>> 11 Napangparentanmi Raja Abimelekh lako sininna tau nakua, <<Inda-inda mpegaukki tee tau iarika balinna, nang la dipatei.>>
12 Mangbaraqbahmi Ishak llan joo kampong to nanii torro, naendek to asseleq baraqbahna joo taun manglokkon pessaratuh, sabaq Nabarakkaqi PUANG Allataala. 13 Samasai-sainna sasugih-sugihnami arannai gaja sugih. 14 Masere atii to to-Filistin ngkitai, sabaq gaja budami bekena, dombana, sapinna sola kaunanna. 15 Sininna bubun to nakabuaq kaunanna Nabi Ibrahim tonna tuopa, nabumbun ngasanni to-Filistin. 16 Nakuamo Raja Abimelekh lako Ishak, <<Malaimoko ntee kampong, sabaq laqbi makuasamoko na kamiq.>> 17 Nasalaimi Ishak joo kampong namale doq Lombok Gerar na mpakeqdeh tenda nanii torro. 18 Napangpekalian poleqi Ishak to bubunna Nabi Ibrahim, to mangka nabumbun to-Filistin tonna matemo Nabi Ibrahim, nasangai poleqi Ishak susi to mangka nasanganni ambeqna tonna tee. 19 Ngkalimi bubun to kaunanna Ishak jiong joo lombok namengkalimbuah to wainna. 20 Sisakkami to tomangrewana to-Gerar na tomangrewana Ishak. Nakuamo to tomangrewana to-Gerar, <<Bubunkiq kamiq tee.>> Nasangaimi Ishak joo bubun Esekc, sabaq sisakkai to tomangrewana jio. 21 Ngkali omi bubun laen, apa sisakka unai. Nasangaimi Ishak Sitnad. 22 Mellelemi na ngkali poleq bubun laen, nateqdamo nasialaii. Nasangaimi Ishak Rehobote, nakua, <<Ia too Nabenmikiq PUANG Allataala kamalogan, antawaqding membatiq buda, tamanyaman too llan tee kampong.>>
23 Mangkai joo too mellelemi Ishak deq kota Bersyeba. 24 Ia tonna bongimo mpangpekitanmi kale-Na PUANG Allataala lako Ishak Namangkada Nakua, <<Akuqmo Puang Allataala to nasompa ambeqmu Ibrahim. Danggiq mumalajaq, sabaq Akuq llendungngiko. Kubarakkaqiko na la Kupebudai to batiqmu, sabaq janjing-Kuq lako Ibrahim, pangjama-Kuq.>> 25 Nggaragami ngenan pangkaroban Ishak, nanii ssompa PUANG Allataala. Nampakeqdeh tendana jio, na ngkali bubun to kaunanna.
Ishak sijanji Raja Abimelekh
26:26-33
26 Ratumi jio mai kota Gerar Raja Abimelekh sola Ahuzat tomangpakaingaqna, na Pikhol panglima tentara, mpessitammui Ishak.f 27 Nakuamo Ishak, <<Ia tongkutorro jio kampongmi tonna tee, mikabaqcinaq miulaiqnaq llan mai kampongmi. Ciapari miratu omo mpessitammuinaq?>> 28 Mebalimi nakua, <<Kikita kalenamo to pangtulung-Na PUANG Allataala lako iko. Jaji melo ke sijanjikiq, tamassumpa 29 kumua teqda mulampugauk kagajatan lako kamiq. Susi kamiq teqda naden kipugauk kagajatan lako iko. Kipemeloanko penawa kieloranko male rampaq. Kikanassaimo too kumua Nabarakkaqiko PUANG Allataala.>> 30 Napasadianmi kande Ishak, nakumande sola. 31 Masawanna makaleq, sisapahmi. Mangkai joo too sisalamaqmi napole masannang raja sola to tonasolan.
32 Ia joo allo mangkai kaunanna Ishak ngkabuaq bubun naratu mpaui lako Ishak kumua, <<Nnampaq omokan wai.>> 33 Nasangaimi joo bubun <<Syebag>>. Iamo joo nadisangai Bersyebah to kota jio ratu lako too allo.
Bainena Esau
26:34-35