Batiqna Nabi Ibrahim to nasikabalii Ketura
25:1-6
25
Kebaine omi Nabi Ibrahim sibali Ketura. 2 Annan pea najajian Ketura, iamo to Zimran, Yoksan, Medan, Midian, Isybak na Suah. 3 Yoksan njajian Syeba sola Dedan. Na ia to batiqna Dedan iamo joo to-Asyur, to-Letus na to-Leum. 4 Midian njajian lima muane iamo to Efa, Efer, Henokh, Abida na Eldaa. Ia ngasanmo joo to batiqna Ketura.5 Ia to sininna napunnai Nabi Ibrahim diben ngasan Ishak. 6 Na ia to anak jio mai baine laenna, den too apa nabenni, namaneq ssuai male lako kadellekanna tana Kanaan, dikua namabela jio mai Ishak.
Nabi Ibrahim mate na dilamun
25:7-11
7-8 Gaja tuami Nabi Ibrahim, namabarakkaq to katuoanna. Saratuh pitungpulo lima taun umuruqna namaneq ssalai lino. 9 Malemi Ishak sola Ismail mpatamai Loqkoq Makhpela jio kadellekanna Mamre padangna Efron anakkana Zohar, to-Het, 10 to mangka naalli Nabi Ibrahim. Iamo dinii mpanii tomate Nabi Ibrahim, to nanii Sara balinna.a 11 Ia tonna matemo Nabi Ibrahim, Nabarakkaqimi Puang Allataala to Ishak. Ia joo wattu torro jioi siandah bubun Lahai-Roi.
Batiqna Ismail
25:12-18
12 Susi tee to nunnungan batiqna Ismail, anakkana Nabi Ibrahim, to najajian Hagar to-Mesir, kaunanna Sara. 13 Iamo tee sanganna to sangpulo dua anakkana Ismail, ditappu situruq kajajianna: Nebayot iamo anak pamungahna, namaneq Kedar, Adbeel, Mibsam, 14 Misyma, Duma, Masa, 15 Hadad, Tema, Yetur, Nafis na Kedma. 16 Ia joo sangpulo dua anakkana Ismail iamo menjaji rajana pantan suku, na ia to sanganna dipake ssangai kampongna sola ngenan nanii mangtenda. 17 Saratuh tallung pulo pitu taun umuruqna Ismail namaneq ssalai lino. 18 Ia to batiqna Ismail torro jioi padang parallaqna tana Hawila na padang makase Syur, jio kadellekanna tana Mesir lalan lako tana Asyur, apa teqda naden nasikalino.
Esau na Yakub
25:19-26
19 Susii tee nunnunganna batiqna Ishak, anakkana Nabi Ibrahim. 20 Patangpulomi taun umuruqna Ishak, tonna sibali Ribka, sileqtona Laban anakkana Betuel, to-Aram jio mai tana Mesopotamia. 21 Massambajangngi Ishak lako PUANG Allataala mpassambajangan Ribka, sabaq tamanangngi. Natarima PUANG Allataala to petaqdanna nakebaqtang to Ribka. 22 Rendui to pea llan ngenan taunna, natuli situmpu-tumpu. Nakuamo Ribka llan penawanna, <<Ciapari najaji lako akuq susi tee?>> Nametaqda pangpatuju lako PUANG Allataala. 23 Mangkada-Mi PUANG Allataala lako, Nakua,
<<Ia joo dua pea llan ngenan taummu,
la menjaji dua bangsa to sikabaqci.
Ia to bangsa mesaq la laqbi mawatang na ia to bangsa mesaqna.
Ia to kaka la napukaunan adinna.>>b
24 Ia tonna wattunnamo Ribka la keanak, diissenmi kumua rendui to pea llan baqtangna. 25 Ia to jolo jaji malea rupanna na makamban bulunna, iamo nadisanga Esauc. 26 Jajimi to rendunna nampentoei kambutuqna kakanna. Iamo nadisanga Yakubd. Annanmi pulona taunna Ishak tonna jaji joo dua anakkana muane.
Esau mpasitongka anggaqna anak pamungah na camme bue
25:27-34
27 Samatonggo-tonggonami joo pea sola dua. Ia to Esau macca rumangngan, na nakabudai torro jio randan pangngalah. Apa ia to Yakub tomakammaq, na nakabudai torro llan tenda.e 28 Laqbi napakamojaq Ishak to Esau, sabaq nakabudai Ishak ngkande jukuq asseleq rumangngan. Apa ia to Yakub laqbi napakamojaq Ribka.
29 Den wattu namangcamme Yakub, natimbaq Esau gaja boqjoq natangbarah pole jio mai padang. 30 Nakuamo lako Yakub, <<Ee mane, gaja boqjoqmoq kutangbarah, bennaq ciqdiq tuu camme malea.>> Iamo nadisanga Edomf to Esau. 31 Apa nakua Yakub, <<Melomi, apa tongkai kakakaanmu tee cammekuq.>> 32 Mebalimi Esau nakua, <<Mukita la mate tangbarahmoq! Teqdara buaqna lako akuq to kakakaankuq.>> 33 Nakua omo Yakub, <<Massumpako joloq lako akuq kumua la mutongkai to kakakaanmu.g>> Massumpami Esau, natongkai to kakakaanna.h 34 Nabenmi Yakub roti sola camme bue campeqna. Mangkanna Esau kumande, malemi. Susimi joo Esau teqda naanggaqi to kakakaanna.