Ishak diangaran baine la nasibalian
24:1-67
24
Ia to Nabi Ibrahim gaja tuami, na Nabarakkaqi PUANG Allataala llan katuoanna. 2-4 Mangkadami Nabi Ibrahim lako kaunan nakatappaqi to napabarakkanni sininna waramparanna llan bolana nakua, <<Maleko lako kampong kajajiankuq nnangaran mesaq baine jio mai batiqna sileqtokuq la nasibalian anakkuq Ishak. Danggiq muangaranni baine indeq tana Kanaan. La mupajioi allaq upangkuq to limammu mumassumpa mpau sangan-Na PUANG Allataala to mpaden langiq sola linoa, kumua tangngia baine to-Kanaan la muangaranni to Ishak anakkuq.>> 5 Mebalimi kaunanna nakua, <<Apa ia ke ciaqi ratu joo baine ntee kampong, waqdingraka ke anakkataq bangmo kusolan lako joo kampongtaq?>> 6 Mebalii Nabi Ibrahim nakua, <<Danggiq lalo musolanni to anakkuq lako. 7 PUANG Allataala to mpaden langiq, ntambainaq jio mai bolana tomatuangkuq jio kampong kajajiankuq. Namassumpa lako akuq kumua, <Ia tee tana la Kuben batiqmu.> Ia too la ssua malaekaq-Na njoloanko, muwaqding nnampaq mesaq baine, musolanni jio mai nasibali anakkuq. 8 Apa ia ke teqda namadoang joo baine meundi, laqpahmoko iko jio mai sapahmu lako akuq. Moi samatumbanna, danggiq lalo musolanni lako joo anakkuq.>> 9 Napajioi allaq upanna Nabi Ibrahim to limanna joo kaunan, namassumpa la mpugaukki to disuanni.10 Mangkai joo too nnalami sangpulo untana puangna, namale mbawa mangrupa-rupa barang makeanggaqna puangna, namangnguju sola solana lako mesaq kota jio reqna tana Aram-Mesopotamia, to nanii torro Nahor, sileqtona Nabi Ibrahim. 11 Ia tonna ratumo joo kaunan lako salean kota, napakendenmi to untana jio siandah bubun. Ia joo wattu pada ratumi to baine mewai, sabaq karuenmi. 12 Massambajangmi nakua, <<Oo PUANG Allataala to nasompa puangkuq Nabi Ibrahim! Dennaa upaq Tapajajii tee kutungkanan tee allo. Pamanassai kumua tattaq-Kiq mpakamojaq puangkuq Nabi Ibrahim. 13 Jionaq saqde bubun jenjen, namessun ngasan to anaqdara llan tee kota la mewai. 14 Dennaa upaq na ia to anaqdara kupangkadai kumua, <Tabeq anak, waqdingraka mupalempeanpaq ngenan waimmu, kuisoqpi ciqdiq,> namebali kumua, <Waqding kitaq, taisoqmi. Na moi untataq teqda namatumba kualan too wai naisoqi.> Ia ke jajii susi joo manassa kumua iamo joo to baine Tapattantu lako kaunan-Taq, Ishak. Iamo la kunii ngkanassai kumua, tattaq-Kiq mpakamojaq puangkuq Nabi Ibrahim.>>
15 Teqdapa namangka massambajang, ratumi mesaq anaqdara disanga Ribka ssompo ngenan wainna. Ia tee Ribka anakkana Betuel, na Betuel anakkana Nahor to nasikabali Milka. Ia to Nahor sileqtona Nabi Ibrahim. 16 Ia joo Ribka mesaq anaqdara gaja loqlok, nateqdapa nalambanni muane. Malemi doq bubun nnissi ngenan wainna, napole jiong mai. 17 Naparri-parrimi joo kaunan male mpendeteqi nakuanni, <<Tabeq anak, benpaq ciqdiq tuu waimmu kuisoqi.>> 18 Mebalimi nakua, <<Indeq kitaq, taisoqmi.>> Taqpa napalaomi to ngenan wainna, nabenni naisoqi. 19 Ia tonna mangkamo mbenni wai joo kaunan, mangkadami Ribka nakua, <<Melo kusiokan tooi wai to untataq naisoqi nasau wakkena.>> 20 Taqpa natuaqmi joo anaqdara to wai doq isotan patuoan, naparri-parrii male poleq doq bubun nnalanni wai to sininna unta nabawa kaunan. 21 Kammaq bangmi joo kaunan mpemakitaii, la nanii nnissenni kumua Napajaji tonganraka PUANG Allataala to natungkanan.
22 Ia tonna mangka mangngisoq untana, naalami joo kaunan to anting-anting bulawan lima gram bandaqna, la napapakeanni joo anaqdara. La napapakei tooi sangpasang gallang bulawan to limanna, saratuh gram bandaqna. 23 Nakuamo joo kaunan, <<La mekutananaq, indara to pajajianmu? Baqtu la waqding unakan mangbongi jio bolami?>> 24 Mebalii joo anaqdara nakua, <<Ia to ambeqkuq disanga Betuel, anakkana Nahor sola Milka.>> 25 Nakuapa, <<Den una ngenan tanii mangbongi jio bola, naden too jarame napennampah untataq, na buda to la nakandena.>> 26 Mengguntuqmi joo kaunan ssompa PUANG Allataala, 27 namangkada nakua, <<Dipakalaqbih PUANG Allataala to nasompa puangkuq Nabi Ibrahim. Tattaq-I mpakamojaq puangkuq, sabaq Nasolan rampaqmoq llan kalingkangkuq lako bolana keluargana puangkuq.>>
28 Naparri-parrimi pole lako bolana joo anaqdara nacuritai lako indona to apa maneq jaji. 29-30 Den sileqtona Ribka muane disanga Laban, taqpa lari ssikitanni joo kaunan to jenjen bangpa jio bubun nnampai untana, sabaq ngkitai anting sola gallang bulawan napake adinna, na mangka toomo nacuritan adinna to napauanni joo kaunan. 31 Nakuamo Laban lako, <<Ee to-Nabarakkaqi PUANG Allataala, malemikiq mai tamale lako bola. Antatorro bang unapa ntuu, na dipasadianmikiq ngenan tanii mangbongi sola ngenan untataq?>>
32 Malemi nturuq Laban joo kaunanna Nabi Ibrahim sola tonasolan, namentama bola. Na dialan wai nabasean ajena. Dialai toomi lapik untana, nadipakande, nadiamparan jarame. 33 Apa ia tonna dipalennaran kande, mangkadami joo kaunan nakua, <<Tabeq puang, la mpaunaq pepasan joloq, tamaneq kumande.>> Mebalimi Laban nakua, <<Tapaumi.>>
34 Mangkadami nakua, <<Ia tee akuq kaunannanaq Nabi Ibrahim. 35 Liwaq Nabarakkaqi PUANG Allataala joo puangkuq, na gaja sugihmi. Nabenni PUANG Allataala buda beke, domba, sapin, unta na keledai, bulawan, peraq sola kaunan la muane la baine. 36 Ia to Sara balinna puangkuq, matuami namaneq njajian mesaq anak muane, na mangkami naben ngasan puangkuq to kasugiranna lako anakkana. 37 Mangkamoq massumpa la mpugaukki to nasuannaq puangkuq kumua, <Teqda mulannangaranni baine to-Kanaan to anakkuq indeq tana Kanaan to kunii torro, 38 apa male lakoko batiqna sileqtokuq jio bolana tomatuangkuq nnangaranni baine la nasibalian.> 39 Kukua mpebalii joo kadanna puangkuq, <Apa ia ke ciaqi joo baine ratu ntee kampong?> 40 Nakua mpebalinaq, <PUANG Allataala to tattaq kupugauk pakkaeloran-Na, la ssua malaekaq-Na ntulungko, namennasseleq melo to kalingkanmu, arannai muampaq to baine jio mai batiqna sileqtokuq jio bolana tomatuangkuq. 41 Iapi mulaqpah jio mai sapahmu ke ratuko lako, nateqda naeloranni joo baine musolan. Susipi joo mumaneq laqpah jio mai sapahmu lako akuq.>
42 Ia tongkuratu lako toq bubun nnenaq, massambajangnaq susi tee kukua, <Oo PUANG Allataala to nasompa puangkuq Nabi Ibrahim, dennaa upaq Tapakeasseleq meloi tee kalingkangkuq. Dennaa upaq Tapajajii susi tee: 43 Ia ke jenjennaq ntee saqde bubun, na den mesaq anaqdara ratu la mewai kukuanni, <<Tabeq anak, benpaq ciqdiq tuu waimmu kuisoqi.>> 44 Namebali nakua, <<Indeq kitaq, taisoqmi, moi untataq la kualan tooi wai,>> iamo joo to baine pura Tapattantu la nasibalian anakkana puangkuq.> 45 Teqdapa kumangka mangkada llan penawangkuq susi joo, ratumi Ribka ssompo ngenan wainna male doq bubun la ssiok wai. Kukua lako, <Tabeq, benpaq waimmu ciqdiq kuisoqi.> 46 Taqpa napalaomi joo ngenan wainna nakuannaq, <Iyeq, indeq kitaq, taisoqmi, na moi untataq la kupaisoq too.> Kuisoqmi, napaisoq tooi joo unta. 47 Mangkai joo too kukutanaimi kukua, <Ee anak, indara pajajianmu?> Mebalimi nakua, <Disanga Betuel to ambeqkuq. Anak nasikabalii nenekuq Nahor sola Milka.> Kupapakeimi anting to illongna kumaneq mpakeii gallang to limanna. 48 Mangkai joo too mengguntuqmoq massompa, kumangsukkuruq lako PUANG Allataala to nasompa puangkuq Nabi Ibrahim, to mangkamo mpatuju melonaq angkuwaqding nnampaq mesaq baine to pole jio mai sileqtona Nabi Ibrahim la nasibalian anakkana. 49 Jaji ia too, ke madoangkiq mpangpekitan kumua tattaqkiq mpakamojaq puangkuq, pauannaq. Ia ke teqdai, tapauan toonaq, kuissenni apa to la kupugauk.>>
50 Mebalimi Laban sola Betuel nakua, <<Teqdamo apa la kipau meloraka baqtu teqdaraka, sabaq kipahang kumua sininna tee pole jio ngasan mai PUANG Allataala. 51 Na indeq unai tee pea. Tasolanmi nadipasibali anakkana puangtaq situruq pakkaeloran-Na PUANG Allataala.>> 52 Ia tonna mangkamo mangkada susi joo sujuqmi doq litak joo kaunanna Nabi Ibrahim massompa lako PUANG Allataala. 53 Namaneq nnalai to bulawan, peraq sola pakean simaballo, nabenni Ribka. Moi sileqtona sola indona Ribka naben tooi barang simaballo. 54 Mangkai joo too, kumandemi sola ngasan, namangbongi jio.
Ia tonna makaleqmo miqcokmi sola ngasan, nakuamo joo kaunan, <<La mekatabeqmokan sola ngasan tee. La kipaelaqmi pole lako bolana puangkuq.>> 55 Apa nakua indona sola sileqtona Ribka, <<Tabeq, mbai melo ke torropi tee Ribka sisangpulo-pulopa bonginna, tamaneq solanni.>> 56 Apa mebalimi tee kaunan nakua, <<Ia ke waqdingngi, danggiq susi tuu puang, sabaq Napakeasseleq melomo PUANG Allataala to kalingkangkuq. Jaji taeloranmoq pole lako puangkuq kusolanni to Ribka.>> 57 Nakuamo indona sola sileqtona Ribka, <<Melo ke tatambaii joloq joo pea, nadikutanai.>> 58 Natambaimi to Ribka nakutanaii kumua, <<Madoangrokoka male sola tee tau?>> Mebalimi nakua, <<Madoangnaq.>> 59 Naeloranmi male to Ribka sola tontaranakki tonna biccuqpab, namale situruq kaunanna Nabi Ibrahim sola solana. 60 Nabarakkaqimi to Ribka, nakua,
<<Dennaa upaq na sabuda-budanna batiqmu
arannai tangdikembah direken
na dennaa upaq nataloi to ewana nakuasaii to kotana.>>
61 Sadiami Ribka sola pira-pira kaunanna baine napada mendeq unta namale situruq kaunanna Nabi Ibrahim. Susimi joo napole joo kaunan nasolanni to Ribka lako tana Kanaan.
62 Ia to Ishak, anakkana Nabi Ibrahim, polei jio mai bubun Lahai-Roi natorro jio tana Negeb. 63 Den wattu tonna karuenmo namessun Ishak male lumingka-mingka jio tangnga padang, teqda nakalannai ngkitami den baqtu pira-pira unta mpangngujuii. 64 Ia tonna kitai Ribka to Ishak, mellaomi jao mai untana. 65 Mekutanami lako joo kaunanna Nabi Ibrahim nakua, <<Indara joo muane jio tangnga padang mangnguju jio mai?>> Mebalimi nakua, <<Oo, iamo joo puangkuq.>> Naalami Ribka to bobongna nasamboi lindona.c 66 Ia tonna ratumo lako, nacuritan ngasanmi joo kaunan lako Ishak to apa mangka napugauk. 67 Mangkai joo too, nasolanmi Ishak to Ribka tama tendana Sara indona, namaneq sibali. Napakamojaq Ishak to Ribka. Susimi joo napaja to masse penawanna Ishak napubuaq kamateanna indona.