Nabi Ibrahim nnalli ngenan panglamunan
23:1-20
23
Saratuhmi duangpulo pitu umuruqna Sara, 2 tonna mate jio kota Kiryat-Arba to disanga too Hebron, tana Kanaan. Gaja massei penawanna Nabi Ibrahim, nabatingngii joo balinna.3 Mangkai joo too, keqdehmi Nabi Ibrahim jio mai saqde tomate balinna, namale mpessitammui to-Het llan joo kota. Nakuamo lako to-Het, 4 <<Ee todipusileqto, ia tee akuq tomentoraturaq ntee. Waqdingraka ke nnallinaq padang la kunii llamun tomate balingkuq?>>a 5 Mebalii to to-Het nakua, 6 <<Iyeq puang, waqding ia, sabaq kipuraja malaqbihkiq indeq, jaji talamunmi to tomate balintaq llan lamunan to gaja melo. Teqda tau indeq tanglannelorankiq llamunni jio panglamunanna.>>
7 Sujuqmi Nabi Ibrahim jio olona to-Het, 8 namangkada nakua, <<Ia paleq ke situju unakiq, ke kulamunni to balingkuq indeq, tulungnaq tapetaqdannaq lako Efron anakkana Zohar, 9 kuallii to padang nanii Loqkoq Makhpela jio cappaq baraqbahna. Melo ke sialli nteenaq, tasaqbii sola ngasan. Pirami allian padang situruq atoran, padami kuallianni.>> 10 Ia joo wattu, cumadokkoi Efron sola padanna to-Het jio ngenan kasitammuan jio babangan kota. Nasaqbii tau jio, namangkada Efron lako Nabi Ibrahim nakua, 11 <<Teqda nasusi tuu puang! Nasaqbiinaq tee padangkuq to-Het kumangkada kumua, danggiqmo taallii, kuben bangmikiq joo baraqbah sola joo loqkoq tanii llamun tomate balintaq.>>
12 Sujuqmi Nabi Ibrahim jio olona to-Het, 13 na nasaqding ngasan to-Het, namangkada lako Efron nakua, <<Tabeq, tapesaqdingnginaq. La kubajah joo baraqbah sola loqkoq, metaqdanaq tatarimai, kumaneq llamunni to tomate balingkuq jio.>> 14 Mebalii Efron nakua, 15 <<Iyeq puang, pataratuh doiq peraq allinna to sanglimbo baraqbah, na teqdara tasisalaii joo allinna. Talamunmi joo tomate balintaq jio.>> 16 Nasitujuimi Nabi Ibrahim joo allinna napau Efron, nasaqbii to-Het. Natimbangmi joo doiq peraq pataratuh situruq timbangan to napake pangdangkang. Nabajahhi Nabi Ibrahim lako Efron.
17 Susimi joo, ia to baraqbah, loqkoq na garontoq kaju napunnai Efron jio Makhpela kadellekanna Mamre diben Nabi Ibrahim naallii, 18 nasaqbii to-Het to ratu jio kasirempunan babangan kota. 19 Mangkai joo too, malemi Nabi Ibrahim llamun Sara balinna llan Loqkoq Makhpela jio kadellekanna Mamre, jio Hebron tana Kanaan. 20 Susimi joo napulamunanni Nabi Ibrahim joo baraqbah sola loqkoqna to naalli jio mai to-Het.