Kajajian 22

Nasuai Allataala to Nabi Ibrahim mpassompan Ishak

22:1-19

Baqtu pirang taun mangkanna joo, Naujii Puang Allataala to Nabi Ibrahim. Mangkada-I Puang Allataala lako Nakua, <<Ee, Ibrahim.>> Mebalii Nabi Ibrahim nakua, <<Iyeq Puang!>> 2 Nakuamo Puang Allataala, <<Maleko lako tana Moria sola anakkamu Ishak, anak mesa to mupakamojaq. Den mesaq buntu jio la Kupakitanko, la munii mpangkarobanni tuu anakkamu, mupassompan lako Akuq.>>

3 Masawanna joo too, napelambikki Nabi Ibrahim miqcok, nalapikkii to keledainna, natambaii to kaunanna dua sola Ishak, nanniqbaq-iqbaq kaju, la napake mangkaroba, napadeqi keledainna, namaneq mangnguju sola appaq lako buntu to mangka Napauanni Puang Allataala. 4 Ia tonna tallung allomo lumingka, nakita mabelami Nabi Ibrahim joo buntu. 5 Mangkadami lako joo dua kaunanna nakua, <<Torromo kamuq ntee, patorro toomi tee keledai, kumalepa lako joo buntu sola anakkuq massompa lako Puang Allataala, la pole unakan dau.>> 6 Ia to piso sola api nabawai Nabi Ibrahim, na ia to kaju la napake mangkaroba napapassannii lako Ishak. Mpatarruhmi kalingkanna sola dua. 7 Mekutanami Ishak nakua, <<Ambeq!>> Mebalii ambeqna nakua, <<Apara anakkuq?>> Nakuamo Ishak, <<Denmo tee api sola kaju, na umbori to anak domba la dipangkaroban?>> 8 Mebalii Nabi Ibrahim nakua, <<Puang Allataala Ia, la mpasadiai to anak domba.>> Mpatarruhmi kalingkanna sola dua.

9 Ia tonna ratumo Nabi Ibrahim lako buntu to Napauanni Puang Allataala, ngkabuaqmi ngenan pangkaroban, napasitodoq-todoqi joo kaju jao, namaneq mpumpungngi to Ishak anakkana, napamammaqi jao ngenan pangkaroban. 10 Mangkai joo too, nnalami piso Nabi Ibrahim la nageresan anakkana. 11 Apa metambai malaekaq-Na PUANG Allataala jao mai langiq nakua, <<Ee Ibrahim, Ibrahim!>> Mebalii Nabi Ibrahim nakua, <<Iyeq Puang!>> 12 Nakuamo mangkada, <<Danggiq apa-apai tuu anakkamu, danggiq pateii, sabaq kuissenmo too kumua ngkalajaq-ngkasiriqko Puang Allataala, sabaq macanning atimmu la mpangkarobanni lako Akuq tuu anak mesa mupakamojaq.>> 13 Messailei Nabi Ibrahim, nangkita mesaq domba muane jio bokoqna, to tikadang tandukkuna llan pangngala-ala. Naalai Nabi Ibrahim joo domba napukaroba ditunu, sulle anakkana. 14 Nasangaii Nabi Ibrahim joo ngenan, <<PUANG Allataala mpasadiai>>, na ratu lako too allo nakua tau, <<PUANG Allataala mpasadiai to diparalluinna jao buntun-Na.>>

15 Metamba poleq omi malaekaq-Na PUANG Allataala jao mai langiq lako Nabi Ibrahim nakua, 16-17 <<Susi tee kadan-Na PUANG Allataala, <Massumpa-Naq mpau sangang-Kuq kumua gaja la Kubarakkaqiko, sabaq mupugauk to petaqdang-Kuq, namacanning atimmu la mpangkarobanni lako Akuq to anak mesa mupakamojaq. Gaja la Kubarakkaqiko buda batiq, pada budanna bintuin jao langiq baqtu susi kassiq budanna jio randan tasik. Na ia to batiqmu la ntaloi ewana nakuasaii to kotana. 18 Pole jio mai batiqmu Kubarakkaqii to sininna bangsa, sabaq muturuqmo to parenta-Kuq.> >> 19 Mangkai joo too, polemi Nabi Ibrahim lako to nanii dua kaunanna ntajanni, namale sola lako kota Bersyeba. Jiomo nanii mariqpih torro.

Batiqna Nahor

22:20-24

20 Ia tonna polemo Nabi Ibrahim jao mai Buntu Moria, ssaqdingmi kareba kumua ia to Nahor sileqtona, karuami anak nasikabalii Milka. 21 Ia to pamungah disanga Us, mangpenduanna disanga Bus, namaneq Kemuel to menjaji ambeqna Aram, 22 namaneq situruq-turuq jaji to Kesed, Hazo, Pildas, Yidlaf na Betuel. 23 Betuel iamo ambeqna Ribka. Ia ngasanmo joo karua anakkana Nahor, sileqtona Ibrahim, najajian Milka. 24 Den baine lekoqna Nahor disanga Reuma. Ia to anakkana disanga Tebah, Gaham, Tahas na Maakha.