Ishak jaji
21:1-7
21
Nabarakkaqii PUANG Allataala to Sara susi janjin-Na baqtu piran. 2 Kebaqtangmi Sara, nanjajian anak muane pada to wattu mangka Napattantu Puang Allataala, moi nagaja tuamo to Nabi Ibrahim.a 3 Nasangaii Nabi Ibrahim joo anakkana <<Ishak.>> 4 Ia tonna karuamo allona Ishak, nasunnaqmi Nabi Ibrahim situruq parenta-Na Puang Allataala.b 5 Saratuhmi taun umuruqna Nabi Ibrahim, tonna jaji Ishak. 6 Nakua Sara mangkada, <<Napupetawanaq Puang Allataala, sabaq marionaqc. Na sininna to tosaqdingngi tee apa jaji, la metawa too kipada masannang.>> 7 Nakuapa Sara, <<Teqda tau la ssangai to jio mai kumua la nakua tau lako Ibrahim la denraka anak la kupacucu. Apa njajianmoq mesaq anak muane, moi na gaja tuamo joo balingkuq.>>Hagar sola Ismail diulaqi
21:8-21
8 Samatonggo-tonggonami Ishak nadisarakki. Ia joo allo napugaukmi Nabi Ibrahim to pangramean gaja roah. 9 Nakitai Sara to Ishak nacapaq-capaq Ismail anakkana Nabi Ibrahim to najajian Hagar to-Mesir. 10 Nakuamo Sara lako Nabi Ibrahim, <<Ulaqii tuu baine kaunan sola anakkana. Teqda nalamputawa manah susi to la napumanah anakkuq Ishak.>>d 11 Gaja napumabandaq penawa Nabi Ibrahim joo petaqdanna Sara, sabaq anakkana too to Ismail. 12 Apa Nakua Puang Allataala lako Nabi Ibrahim, <<Danggiq mupumabandaq penawai to petaqdanna Sara la nnulaqi Hagar kaunanmu sola anakkana. Paturuqi bangmi, sabaq iara to batiq pole jio mai Ishak to Kujanji lako iko.e 13 Moi joo anakkana Hagar kaunanmu, la kupebudai tooi batiqna namenjaji bangsa, sabaq anakkamu too.>>
14 Masawanna napelambikkii Nabi Ibrahim miqcok. Naalai to roti sola wai, nabenni lako Hagar napajaoi kamalaqna nasuai male sola anakkana. Malemi Hagar sola anakkana llingkai padang pallawangan Bersyeba teqda naissen to la natuju. 15 Ia tonna cappuqmo to wai napukinallo, napupentionganni joo anakkana llan pangngala-ala, 16 namale cumadokko, agi-agi saratuh metereq jio mai nanii joo anakkana. Kumarrakki Hagar namangkada llan penawanna nakua, <<Tangkusara ngkitai joo anakkuq mate.>> 17 Nasaqdingngi Puang Allataala to Ismail kumarrak, namangkada malaekaq-Na jao mai langiq lako Hagar nakua, <<Apara mupumasussa Hagar? Danggiq mumalajaq, sabaq Nasaqdingmi Puang Allataala to anakkamu kumarrak. 18 Keqdehmoko nnalai joo anakkamu. Mujampangngi, sabaq ia to batiqna la Kupebudaii namenjaji bangsa matonggo.>> 19 Pangtulung-Na Puang Allataala lako Hagar, nataqpa ngkita mesaq bubun, namale nnissii to ngenan wainna, napaisoqi to anakkana.
20-21 Nabarakkaqii Puang Allataala to Ismail, nasamatonggo-tonggona. Jioi padang makase Paran torro, nagaja macca mangpana. Naangaranni indona mesaq baine to-Mesir napasibalii.
Nabi Ibrahim sijanji Raja Abimelekh
21:22-34
22 Ia joo wattu malei Raja Abimelekh sola Pikhol, panglima tentara, sikita Nabi Ibrahim namangkada nakua, <<Puang Allataala ntulungko ke denni apa mupugauk.f 23 Iamo joo massumpako lako akuq mpau sangan-Na Puang Allataala kumua, teqda mulampakenanaq sola anakkuq baqtu batiqkuq. Kupemeloanmoko penawa, susi too iko la mupemeloannaq penawa, sola lako tee tau llan kaparentankuq to munii mariqpih mentoratu.>> 24 Nakuamo Nabi Ibrahim, <<Massumpanaq.>> 25 Apa denpa nasarroan Nabi Ibrahim lako Raja Abimelekh, sabaq den mesaq bubun mangka nakabuaq, naalai kaunanna Raja Abimelekh. 26 Nakua Raja Abimelekh, <<Teqda akuq kuissenni indara mangpanggaukan susi joo, na teqda naden mupauannaq, maneq kusaqdingnara too.>> 27 Naalami Nabi Ibrahim to baqtu pira-pira domba, beke sola sapin nabenni lako Raja Abimelekh, namaneq sijanji sola dua. 28 Apa napassalai Nabi Ibrahim to pitu anak domba baine. 29 Mekutanami Raja Abimelekh nakua, <<La muapari tuu pitu anak domba mupassalai?>> 30 Mebalimi Nabi Ibrahim nakua, <<Ia tee pitu anak domba la mutarima jio mai akuq, mpaassahhi kumua akuq ngkabuaqi tee bubun.>> 31 Iamo nasangai tau joo ngenan, <<Bersyeba>>g, sabaq jiomo nanii sola dua massumpa.
32 Ia tonna mangkamo sijanji jio toq bubun Bersyeba, polemi Raja Abimelekh sola Pikhol, panglima tentara, lako tana Filistin. 33 Natananni Nabi Ibrahim to sangtoq kaju tamariska jio kota Bersyeba, namangpamula joo wattu, ia joo ngenan nanii massompa lako PUANG Allataala, to tuo teqda anggena. 34 Masain-sainpi Nabi Ibrahim torro mentoratu jio tana Filistin, tonna mangka sisapah Raja Abimelekh.