Nabi Ibrahim nnuraga Raja Abimelekh
20:1-18
20
Mellelei Nabi Ibrahim jio mai Mamre, mangnguju sauq tana Negeb, cappaq lloqna liu tana Kanaan, natorro jio parallaqna kota Kades na padang makase Syur. Namaneq mellele lako kota Gerar natorro mentoratu jio. 2 Napangpesuanmi Abimelekh rajana to-Gerar, naratu to tau ssolanni to Sara, sabaq nakua Nabi Ibrahim lako tau, <<Adingkuq tee Sara.>>a 3 Ia tonna bongi ratu-I Puang Allataala mangkada lako Raja Abimelekh llan tindona, nakua, <<La mateko, sabaq ia joo baine muala, denmo muanena.>> 4 Apa teqda unapa naapa-apaii Raja Abimelekh to Sara. Nakuamo joo raja, <<Oo Puang Allataala, la Tapateirakanka? Na teqda akuq kusala sola taungkuq! 5 Nabi Ibrahim kalena ia mpaui kumua, <Adingkuq joo Sara,> na ia joo baine nakua too, <Kakangkuq joo Ibrahim.> Jaji maruruh akuq penawangkuq, teqda akuq salakuq.>> 6 Nakuamo Puang Allataala lako Raja Abimelekh llan tindona, <<Kuissen kumua maruruh penawammu mpugaukki joo, iamo nateqda kueloranko mpugauk dosa lako Akuq, na teqda kueloranko nnapa-apaii joo baine. 7 Jaji papolei joo baine lako muanena. Ia to muanena mesaqi nabi, la nampassambajanganko, nadanggiq mumate. Apa ia ke teqda mupapolei, la mateko sola sininna taummu.>>8 Masawanna makaleq, napelambikkii Raja Abimelekh ntambai sininna pangjamana napauan ngasanni to apa jaji llan tindona. Ia tonna saqdingngi pangjamana gaja simalajatanni. 9 Mangkai joo too, natambaimi Raja Abimelekh to Nabi Ibrahim nakuanni, <<Ciapari muuragakan? Apara salakuq lako iko, mulamparatuannaq abalaq sola kaparentankuq? Teqda nasipatoq mupugauk susi joo lako akuq.>> 10 Nakuapa Raja Abimelekh lako Nabi Ibrahim, <<Apara tujunna mupugaukki susi joo?>> 11 Mebalii Nabi Ibrahim nakua, <<Kupikkiriqi kumua, teqda tau indeq ngkalajaq-ngkasiriq Puang Allataala, na la napateinaq to tomacinna lako balingkuq. 12 Na adingkuq, sabaq sangngambeqkan, apa laen indo, kisibali. 13 Ia tonna suanaq Puang Allataala ssalai bolana ambeqkuq kumale mentoratu jio tana Kanaan, kukua lako balingkuq, <La mupamanassa kumua tattaqnaq mupakamojaq, na umbo-umbo kampong dinii ratu, la muakui kumua adinnanaq.> >>
14 Mangkai joo too, napapolemi Raja Abimelekh to Sara lako Nabi Ibrahim, naben tooi kaunan muane sola baine, domba, beke sola sapin. 15 Nakuamo lako Nabi Ibrahim, <<Teqda tau nnanggaiko torro ntee kaparentankuq, pilei bangmi umbonna mukabudai munii torro.>> 16 Nakua too mangkada lako Sara, <<Mangkami kuben sangsaqbu doiq peraq to kakammu, buttinna lako sininna to tomusolan kumua teqdapa kulambanko, nadanggiq mudipasala.>> 17-18 Napatamanang ngasanni PUANG Allataala to baine llan istanana Raja Abimelekh, napubuaq joo apa jaji lako Sara, bainena Nabi Ibrahim. Apa massambajangngi Nabi Ibrahim lako Puang Allataala, nadipamalagah to Raja Abimelekh, bainena na kaunanna baine. Teqdamo natamanang to baine.