Panggaukan gajaqna to-Sodom
19:1-11
19
Bongimi naratu lako kota Sodom joo dua malaekaq. Jioi babangan kota Lot cumadokko tonna kitai joo malaekaq dua ratu, nataqpa keqdeh Lot ntammuii, nasujuq jio olona, 2 namangkada nakua, <<Taleppangpa jio bolakuq mangbongi, tabasei ajetaqa. Manikaleqpa tapatarruh kalingkantaq.>> Apa mebalii joo malaekaq nakua, <<Maqnamo kimangbongi ntee tana lapang.>> 3 Naparukui Lot joo malaekaq, arannai leppang jio bolana. Napasadianni Lot kande, natunui to roti tangdiragii, nakumande.4 Apa teqdapa namammaq joo toratu, ratumi to sininna muane la tomatua la kallolo llan kota Sodom ntalimbung bolana Lot. 5 Nametamba lako Lot nakua, <<Solanni mai to toratummu itiq mangbongi, kigauk salai!>>b 6 Messunni Lot llan mai bolana, namaneq salliqi, 7 namangkada nakua, <<Ee todipusileqto, metaqdanaq lako kamuq, danggiq mimangpanggaukan gajaq. 8 Pesaqdingnginaq, den dua anakkuq to teqdapa nalambanni muane. Akeqmo na ia kusolan matiq, mipatumba-tumbaika. Apa danggiq na ia tee toratungkuq migauk sala, sabaq nang la kujagai.>> 9 Apa nakua joo to-Sodom lako Lot, <<Ee, malaiko ntuu! Teqda na iko la nnatoroqkan, toraturoko iko. Ia ke ciaqko palai, la laqbi mabandaq sessamu na ia to la kigaukan toratummu.>> Nasumbananni to Lot, la ntarassai salliq bola. 10 Apa mpengkoronganni limanna joo toratunna Lot, nataqpa rruiqi to Lot tama bola, nasalliqi. 11 Napabutai to tau jio saleanan la tomatua la kallolo, nateqda nakitai to lalan tama bola.c
Lot ssalai kota Sodom
19:12-22
12 Nakuamo joo toratunna Lot, <<Ia ke denpi anakkamu la muane la baine baqtu anak mamintummu, iarika kaum keluargamu laenna to torro llan tee kota, solan ngasanni mimale ssalaii tee kota, 13 sabaq la kilanynyaqii. Nasaqdingmi PUANG Allataala to nasarroan tau kumua liwaqmi gajaq to sipaqna to tau llan tee kota na disuamokan ratu la llanynyaqii.>> 14 Malemi Lot sikita joo dua sitangkaqna anakkana nakuanni kumua, <<Madoiq kamuq ssalaii tee kota, sabaq la Nalanynyaqii PUANG Allataala.>> Apa nasangai kumua maningo-ningori Lot.
15 Makaleq unapa, nasuami malaekaq to Lot nakua, <<Madoiqmoko malai sola bainemu sola tuu dua anakkamu, nadanggiq mimate ke disessai to tau llan tee kota napubuaq kagajatanna.>> 16 Mangtorro-torro bangpi Lot. Natoemi malaekaq to limanna Lot sola bainena na anakkana, namale ssolanni ssalai kota, sabaq Nakamaseii PUANG Allataala.d 17 Mangkadami sala mesaqna joo malaekaq nakua, <<Lari kamuq mpasalamaq kalemi! Danggiq mimessaile bokoq, nadanggiq too mikenden jio Lombok Yordan. Palai deq kamuq buntu, nadanggiq mimate.>> 18 Apa nakua Lot, <<Andoq ee puang, danggiq tasua deqkan buntu. 19 Tongan kumua takamaseimoq tatulungnaq mpasalamaq kalekuq. Apa gaja bela joo buntu, iamo ke teqdapa kuratu lako nadeteqmoq joo abalaq, kumate. 20 Takitai! Den kota biccuq mandoppiq, maqnamo kipalai lako joo kota biccuq, kisalamaq.>> 21 Mebalii joo malaekaq nakua, <<Melomi, kusitujui tuu petaqdammu, male lakomo kamuq, danggiq kusolangngii joo kota. 22 Larimo kamuq madoiq, sabaq teqdapa kulalanynyaqii tee kota Sodom sola Gomora, ke teqdapi mideteqi.>>
Iamo nadisanga <<Zoar>>e joo kota, sabaq nakua Lot kota biccuq.
Kota Sodom na Gomora dilanynyaqi
19:23-29
23 Berremi allo naratu Lot lako kota Zoar. 24 Napatibolloi PUANG Allataala to kuarof jao mai langiq susi uran, nakandei api to kota Sodom na Gomora. 25 Susimi joo Puang Allataala llanynyaqii joo dua kota jio Lombok Yordan na sininna to tau torro llan, moi lombokkona sola tananan.g 26 Ia to bainena Lot undi, messailei lako bokoq namennariri ceqla.h
27 Ia tonna makaleqmo malemi Nabi Ibrahim lako ngenan to nanii keqdeh sipangkada PUANG Allataala. 28 Mengkitami lako sininna Lombok Yordan to nanii kota Sodom na Gomora, nakitai to rambu tindak jiong mai padang susi rambu api panyumpun. 29 Susimi joo Puang Allataala ssolanganni joo kota jiong Lombok Yordan to mangka nanii torro Lot. Naingaranni Puang Allataala to Nabi Ibrahim Napasalamaqi to Lot.
Panggaukanna anakkana Lot
19:30-38
30 Malajaqi Lot torro jio kota Zoar, jaji male deqi buntu, natorro llan loqkoq sola joo dua anakkana baine. 31 Nakuamo to anak pamungah lako adinna, <<Matuami ambeqtaq, nateqda muane ntee mai la tasibalian, susi biasanna. 32 Melo ke tapemalangoii anggur to ambeqtaq, tasisola mammaq, tapada mpatarruh batiqna.>> 33 Ia joo bongi, napemalangoii anggur to ambeqna, nasisola mammaq joo anak pamungah. Malangoi joo ambeqna, iamo nateqda naissenni to nagaukanni anakkana.
34 Masawanna joo too, nakua omo joo anak pamungah lako adinna, <<Mangkamoq sisola mammaq ambeqtaq pubongiq. Dau bongi, tapemalangoi poleqi na iko sisola mammaq, tapada mpatarruh batiqna.>> 35 Susimi joo tonna bongimo, napemalangoi omi to Lot na ia omo joo anak mangpenduan sisola ambeqna mammaq. Malangoi Lot nateqda naissenni to nagaukanni anakkana.