Napakanassa poleqi Puang Allataala to anak Najanjian Nabi Ibrahim
18:1-15
18
Ratu-I PUANG Allataala sikita Nabi Ibrahim jio siandah garontoq kaju tarbantin jio Mamre. Kamalussu-lussuanna allo joo wattu, nacumadokko Nabi Ibrahim jio pentaman tendana. 2 Nakitami den tallu tau mpangngujuii. Nataqpa keqdeh Nabi Ibrahim lari ntammuii, nasujuq jio olona.a 3 Nakuamo Nabi Ibrahim lako joo tau, <<Oo puang, ia ke waqdingngi, danggiq liu lalan bang. 4 Leppangkiq joloq tadialan wai tabasean ajetaqb, tacadokko mpasau boqjoqtaq jiong ntee garontoq kaju. 5 Kupasadiankiq kande takumande, tamauku mpatarruh kalingkantaq. Gaja rionaq ke leppangkiq.>> Mebalii joo tau nakua, <<Iyeq la leppangkan, pugaukmi tuu musanganna.>>6 Taqpa malemi Nabi Ibrahim tama tendana, nakuanni to Sara, <<Madoiqko nnala taqpung to liwaq makassing agi-agi sangsepuq, mugaragai roti.>> 7 Naparri-parrii Nabi Ibrahim male nnala mesaq anak sapin maloppo, nabenni pangjamana nakasaraii. 8 Mangkai joo too, naalami Nabi Ibrahim to dadik, dangke na jukuq mangka dinasu napalennaranni to toratunna. Mukkunni kumande joo toratunna jiong toq garontoq kaju, naampaii Nabi Ibrahim.
9 Mekutanami to toratunna nakua, <<Umbori balimmu Sara?>> Mebalii Nabi Ibrahim nakua, <<Llanni tenda.>> 10 Nakuamo joo tau, <<Wattu susi una tee ke taun poleqi kuratu ssikitanko. Ia joo wattu, la denmo anakkana Sara, na muane.>> Ia joo wattu mukkunni Sara mangpesaqding jio toq lalan mentama tenda to nabokoqi toratunnac. 11 Gaja tuami to Nabi Ibrahim sola Sara, na teqdamo namacarepa to Sara. 12 Metawai Sara nakua llan penawanna, <<Gaja tuami to balingkuq, na teqdamo kamadoangkuq sisola muanekuq, sabaq matua toomoq.>>d 13 Mangkada-Mi PUANG Allataala lako Nabi Ibrahim nakua, <<Ciapari nametawara Sara, namangkada llan penawanna kumua, <Teqdamo kulakeanak, sabaq gaja tuamoq.> 14 Denraka to tangla-Nakulle PUANG Allataala mpugaukki? Susi to kupau nnenaq, wattu susi una tee kuratu ssikitanko ke taun poleqi, ia joo wattu, la denmo anakkana Sara pea muane.>>e 15 Mesakkanni Sara, sabaq malajaqi namangkada nakua, <<Teqda akuq kumetawa.>> Apa Nakua PUANG Allataala, <<Aa, metawako nnenaq!>>
Petaqdanna Nabi Ibrahim nadiaddampangan to to-Sodom
18:16-29
16 Mangkai joo too, malemi Nabi Ibrahim ssolanni joo toratunna tallu. Ratumi lako mesaq ngenan to waqding nanii ngkita kota Sodom. 17 Nakuamo PUANG Allataala llan penawan-Na, <<Teqda Kulambunianni Nabi Ibrahim tee la Kupugauk. 18 Ia to batiqna Nabi Ibrahim la menjaji bangsa liwaq tonggo namakuasa. La Kubarakkaqii to sininna bangsa llan lino, sabaq Nabi Ibrahim. 19 Mangkami Kupilei to Nabi Ibrahim dikua napangparentanni lako sininna batiqna naturuqi to parenta-Kuq, napugaukki to pakkaeloran-Kuq, namaruruh too mangraqtah. Ia ke susi joo la Kupugauk ngasan to janjing-Kuq lako Nabi Ibrahim.>> 20 Nakuamo PUANG Allataala lako Nabi Ibrahim, <<Kusaqdingmi to nasarroan tau, kumua gaja gajaqmi to sipaqna tau llan tee kota Sodom sola Gomora, na liwaqmi madosa. 21 La male-Naq doq mpemanassai, tonganraka to Kusaqding to nasarroan tau baqtu teqdaraka.>>
22 Malemi mangnguju doq kota Sodom joo toratunna Nabi Ibrahim dua, apa torro unapi PUANG Allataala sola Nabi Ibrahim. 23 Mendeppeqmi Nabi Ibrahim lako Puang Allataala namekutana nakua, <<La Talanynyaqi toorika to tomakassing ke Talanynyaqi to togajaq? 24 Rapanganna nadenpa limangpulo tomakassing llan joo kota, tattaqrika la Talanynyaqi joo kota? Teqdaraka Taaddampanganni sabaq ia joo tau limangpulo? 25 Metaqdanaq, danggiq Tapateii to tomakassing ke Tapateii to togajaq, sabaq ia ke Tapatei ngasanni, butung kumua teqda silaenanna to tomakassing na togajaq. Danggiq lalo najaji to susi joo, sabaq Tomaruruh-Kiq rraqtah kara-karana sininna tolino.>> 26 Nakuamo PUANG Allataala, <<Ia ke den unapi limangpulo tomakassing jio kota Sodom, la Kuaddampanganni to tau llan kota.>> 27 Nakua omo Nabi Ibrahim, <<Addampangannaq Puang, sabaq mbaraniannaq kalekuq mangkada lako Kitaq, nasitonganna teqda kusipatoq mpugaukki tee sabaq tolinoraq. 28 Na ia ke den unai patangpulo lima tomakassing jio, la Talanynyaqi tooraka joo kota?>> Nakuamo Puang Allataala, <<Ianna den unapa patangpulo lima tomakassing jio, teqda Kulallanynyaqii joo kota.>> 29 Nakua omo Nabi Ibrahim, <<Na ia ke den unai patangpulo tomakassing?>> Mebali-I Puang Allataala Nakua, <<Teqda Kulallanynyaqii joo kota, sabaq ia joo tau patangpulo.>> 30 Nakua omo Nabi Ibrahim, <<Addampangannaq, danggiq Takagallinaq, ke mekutana omoq. Umbo susi ke den unai tallungpulo tau?>> Nakua Puang Allataala, <<Ia ke den unapi tallungpulo tomakassing, teqda Kulallanynyaqii joo kota.>> 31 Nakua omo Nabi Ibrahim, <<Taaddampangannaq, mbaraniannaq kalekuq mangkada lako Kitaq. Umbo susi ke den unai duangpulo tomakassing?>> Mebali-I Puang Allataala Nakua, <<Teqda Kulallanynyaqii joo kota, sabaq ia joo tau duangpulo.>> 32 Nakua omo Nabi Ibrahim, <<Oo Puang, danggiq Takagallinaq, pissenpaq la mangkada. Umbo susi ke den unai sangpulo tomakassing?>> Mangkada-I Puang Allataala Nakua, <<Teqda Kulallanynyaqii joo kota sabaq ia joo tau sangpulo.>> 33 Male-Mi PUANG Allataala tonna mangka sipangkada Nabi Ibrahim, napole toda Nabi Ibrahim lako tendana.