Sunnaq tanda janjin-Na Puang Allataala lako Nabi Ibrahim
17:1-27
17
Ia tonna kaseramo pulona kasera umuruqna Abram, ratu-I PUANG Allataala ssikitanni Namangkada Nakua, <<Akuqmo Puang Allataala to makuasa, pugaukki to pakkaeloran-Kuq, danggiq naden caccamu. 2 La mpaden-Naq janji lako iko, na la Kubarakkaqiko gaja buda batiq.>> 3 Sujuqmi Abram ssompa Puang Allataala. Namangkada Puang Allataala Nakua, 4-5 <<Susi tee to janji la Kupaden lako iko: La napuambeqko buda bangsa. Iamo nateqdamo muladisanga Abram, apa la disangamoroko Ibrahim.ab 6 La Kupebudai batiqmu, namenjaji buda bangsa na den pira-pira batiqmu to la menjaji raja. 7 La Kupaden to janjing-Kuq lako iko sola lako batiqmu, janji to teqda anggena, dikua na Akuq Puang Allataala to musompa ratu lako batiqmu.c 8 La Kubenko sola batiqmu tee tana to munii torro mentoratu too, iamo to sininna tana Kanaan. La napumanah tarruhhi batiqmu, na Akuq Puang Allataala to nasompa.>>d9 Nakuapa Puang Allataala mangkada, <<La muturuq tongan tee janjing-Kuq, iko ratu lako batiqmu. 10 Susi tee to janjing-Kuq to la mupugauk ratu lako batiqmu kumua, sininna muane to misolan torro la disunnaq.e 11 Ia to sunnaq tanda janji to Kupaden lako kamuq. 12 Mangpamula too, sininna anak muane umuruq sikarua allona to misolan torro la disunnaq. Moi kaunan to jaji llan bolamu, iarika to mualli jio mai bangsa laen, la disunnaq too. 13 Ia to muane jaji jio bolamu sola to mualli, la disunnaqi. Iamo joo sunnaq tanda jio kalemu, to mpamanassai kumua teqda anggena to janjing-Kuq. 14 Inda-inda to muane teqda nadisunnaq, teqda nadireken ummaq-Kuq, sabaq teqda naturuqi to janjing-Kuq.>>
15 Mpatarruhhi kadan-Na Puang Allataala lako Nabi Ibrahim Nakua, <<Ia to bainemu, teqdamo mulantambaii Sarai, apa la musangamira Sara. 16 La Kubarakkaqii nanjajian mesaq anak muane. La Kubarakkaqii namenjaji indona buda bangsa. Na jio mai batiqna nanii ollong buda raja.>> 17 Sujuqmi Nabi Ibrahim doq litak massompa, nametawa mangkada llan penawanna nakua, <<La waqding unaparakanka mangjajian anak na saratuhmi taun umuruqkuq, na Sara kaserami pulona taunna?>> 18 Mangkadami Nabi Ibrahim lako Puang Allataala nakua, <<Ia ke waqdingngi, na ia bangmo to anakkuq Ismail Tapueloh ntarima manahkuq.>> 19 Apa Nakua Puang Allataala, <<Teqda, nang la njajian anak muane to Sara, na la musangaii Ishak. Na ia to janjing-Kuq la Kupugauk tarruh lako Ishak sola lako batiqna. Ia joo janjing-Kuq teqda anggena. 20 Na ia to petaqdammu jiona Ismail, la Kutarima too. La Kubarakkaqi na la Kupebudai batiqna. La den sangpulo dua anakkana la menjaji raja, na la Kupupenjaji bangsa matonggoi to batiqna. 21 Apa ia to janjing-Kuq la Kupatujui lakori Ishak, to la najajian Sara taun poleq, wattu susi una tee.>> 22 Ia tonna mangkamo Puang Allataala mangkada susi joo, Nasalaimi to Nabi Ibrahim.
23 Allo ia bang unamo joo napugaukki Nabi Ibrahim susi to mangka Nasuanni Puang Allataala. Natambaii to Ismail anakkana sola sininna muane llan bolana, la ia to jaji llan bolana iarika kaunan naalli, nasunnaq ngasanni. 24 Kaserami pulona kasera umuruqna Nabi Ibrahim tonna disunnaq, 25 na sangpulo tallumi umuruqna Ismail. 26 Ia bang unamo joo allo nadisunnaq sola dua 27 sola sininna to tonasolan, la to jaji llan bolana la kaunan naalli.