Hagar sola Ismail
16:1-16
16
Ia to Sarai, balinna Abram, teqdapa anak najajian. Den kaunanna disanga Hagar, mesaq anaqdara to-Mesir. 2 Nakuamo Sarai lako Abram, <<Taissen kumua Napatamanangnaq PUANG Allataala. Melo ke sisolakiq mammaq joo kaunankuq, mbai nakulle unai mpajajiannaq batiq.>> Nasitujui Abram joo kadanna Sarai. 3 Natambaimi Sarai to Hagar kaunanna, nasuai male lako Abram napubainei. Ia joo wattu sangpulomi taunna Abram torro jio tana Kanaan. 4 Sisolami mammaq Abram na Hagar nakebaqtang. Apa ia tonna issenmi Hagar kumua kebaqtangngi, teqdamo naanggaqi to Sarai puangna. 5 Nakuamo Sarai lako Abram, <<Kitaq-kitaq sala tee katangdianggasankuq. Kuelorankiq sisola mammaq joo kaunankuq, maneq naissenni kumua kebaqtangngi nateqdamo naanggaqnaq. Akeq na PUANG Allataala rraqtahhi indannakiq to sala.>> 6 Mebalii Abram nakua, <<Na kaunanmu iko, iko-iko ngkuasaii. Pugauk bangmi to musanga melo.>> Nasessai Sarai to Hagar arannai palai.7 Napessitammuimi malaekaq-Na PUANG Allataala to Hagar jio toq mata wai jio padang makase, siandah lalan mangnguju lako padang makase Syur. 8 Mekutanami joo malaekaq nakua, <<Ee Hagar, kaunanna Sarai, pole umboroko, na umbora la mupangngujui?>> Mebalii Hagar nakua, <<Palainaq jio mai bolana puangkuq Sarai.>> 9 Nakuamo joo malaekaq-Na PUANG Allataala, <<Polemoko lako puangmu, muturuqi to parentana.>> 10 Nakuapa joo malaekaq, <<La Kupebudai batiqmu, na tangdikembah rrekenni. 11 La njajianko mesaq anak muane, na la musangaii Ismaila, sabaq Nasaqdingmo PUANG Allataala kumua disessako. 12 Apa ia to sipaqna joo anakkamu la susi keledai masiaq, la nnewa sininna tau na sininna tau la nnewai. Moi lako sileqtona teqda nasikalino jio to nanii torro.>> 13 Nakuamo Hagar lako PUANG Allataala to mpangkadaii, <<Kitaqmo El-Roib>> sabaq nakua Hagar llan penawanna, <<Tongan kumua ntee kunii ngkita Puang Allataala to mparinawanaq.>> 14 Iamo nasangai tau joo bubun jio parallaqna kota Kades na kota Bered, <<Bubun Lahai-Roi>>.c