Janjin-Na Puang Allataala lako Abram
15:1-21
15
Mangkai joo too, mangkada-Mi PUANG Allataala lako Abram llan pengkita Nakua, <<Danggiq mumalajaq Abram, Akuq llendungngiko jio mai abalaq, na la Kubenko buda kameloan.>> 2-3 Mebalii Abram nakua, <<Oo PUANG Allataala, moi Tabarakkaqinaq buda kasugiran, apa ia ke matenaq teqda anakkuq la mpumanahhi. Iara joo pangjamakuq Eliezer to-Damsyik la mpumanahhi.>> 4 Mangkada omi PUANG Allataala Nakua, <<Tangngia joo pangjamamu to la mpumanah kasugiranmu, apa anak jajianmura.>> 5 Nasolanni PUANG Allataala messun llan mai tenda to Abram nakuanni, <<Kitai kee to bintuin jao langiq, tangmukembah rrekenni. La susi toomi joo budanna batiqmu.>>a 6 Matappaqi Abram lako PUANG Allataala, iamo Nasangai PUANG Allataala tomakassing.b7 Mangkada o-Mi PUANG Allataala lako Abram Nakua, <<Akuqmo PUANG Allataala to mangka ssolanko messun llan mai kota Ur-Kasdim, la mbenko tee tana mupumanahhi.>> 8 Mekutanami Abram nakua, <<Oo PUANG Allataala, umbo kukua la nnissenni kumua la kupumanahhi tee tana?>> 9 Nakuamo PUANG Allataala, <<Alan-Naq mesaq sapin baine, mesaq beke baine na mesaq domba muane to maneq sitallung taun umuruqna. Ala tooi mesaq buqkuh na mesaq anak jangan-jangan.>> 10 Naala ngasanni Abram joo patuoan napangngoloi lako PUANG Allataala. Ia to sapin, beke na domba naballak duai Abram, napaduang jirii napasioloan. Apa ia to manuk-manuk dipamalebu bang. 11 Ia to jukuq, nataqpaii manuk-manuk pangkande olok-olok mate, apa naulaqii Abram.
12 Ia tonna la kabuhmo allo, mammaqmi Abram. Nasamboimi kamapattangan to liwaq melajatan.c 13 Mangkada-Mi PUANG Allataala Nakua, <<Ingaran rampaqi kumua ia to batiqmu la mentoratu jio bangsa laen, na la dipukaunan sola disessa pata ratuh taunna.d 14 Apa ia to bangsa mpukaunanni la Kusessa, na ia ke wattunnami nasalai batiqmu joo tana, la mbawai buda kasugiran.e 15 Na ia to iko la malambeh sungaqko. La mate manyamanko, mudilamun. 16 Ia to batiq mangpennappaqmu la pole poleqi lako ntee tana. Teqdapa Kulannulaqii to to-Amori indeq tana Kanaan, ke teqda unai namanggauk liwaq gajaq sipatoqna la dinii ssessai.>>
17 Ia tonna kabuhmo allo malillinmi, teqda nakalannaii naden dapoh merambu, naden sulo dukku nnola llan parallaqna joo jukuq dijiri. 18 Iamo joo allo Nampaden janji PUANG Allataala lako Abram namangkada Nakua, <<La Kuben batiqmu tee tana, mangpamula jio mai salu Mesirf ratu lako saqdan matonggo Efrat.g 19 Iamo to tanana to-Keni, to-Kenas, to-Kadmon, 20 to-Het, to-Feris, to-Refaim, 21 to-Amori, to-Kanaan, to-Girgasi na to-Yebus.>>