Abram ntulung Lot
14:1-16
14
Ia tonna mangparenta Amrafel rajana to-Babiloniaa, Ariokh rajana to-Elasar, Kedorlaomer rajana to-Elam na Tideal rajana to-Goyim 2 mangmesai nnewa lima raja laen, iamo to Bera rajana to-Sodom, Birsya rajana to-Gomora, Syinab rajana to-Adma, Semeber rajana to-Zeboim na rajana kota Bela to disanga too kota Zoar. 3 Ia tee lima raja sola tentarana sadia parari, namangmesa jio Lombok Sidim to disanga too Tasik Maceqla. 4 Sangpulo duami taunna nakuasai Raja Kedorlaomer tee lima raja, apa ia tonna taun mangpessangpulo tallu mangngewami. 5 Ia tonna taun mangpessangpulo appaqnamo, malei Raja Kedorlaomer sola joo raja nasibawan ntaloi joloq to-Refaim jio kota Asyterot-Karnaim, to-Zuzim jio Ham, to-Emim jio Syawe-Kiryataim. 6 Moi to-Hori to torro jao membuntunna Seir, nataloi tooi naulaqi ratu lako padang El-Paran jio randan padang makase. 7 Mangkai joo too, pole bokoqmi Raja Kedorlaomer sola to nasibawan lako kota En-Mispat to disanga kota Kades too allo, nataloi ngasanni to to-Amalek, sola to-Amori to ntorroi kota Hazezon-Tamar.8 Ia tonna mangka joo, ia to rajana to-Sodom, rajana to-Gomora, rajana to-Adma, rajana to-Zeboim, rajana to-Bela baqtu to-Zoar mpasadiai tentarana jiong Lombok Sidim 9 la nnewa Kedorlaomer rajana to-Elam, Tideal rajana to-Goyim, Amrafel rajana to-Babilonia, na Ariokh rajana to-Elasar. Appaq raja nnewa lima raja. 10 Ia joo Lombok Sidim buda ter mengkalimbua jio, na ia tonna pengkulleii palai to rajana to-Sodom sola rajana to-Gomora jio mai kapararian sola tentarana, den to polloh doq. Na ia to tuo unapa palai deq membuntunna. 11 Na ia joo appaq raja pataloi, naala ngasanni to sininna napunnai tau jio kota Sodom na Gomora moi to dikandena, namaneq ssalaii. 12 Moi Lot anakkurena Abram najokko tooi, naalai ngasanni to napunnai sabaq torro jioi kota Sodom.
13 Apa den mesaq tau laqpah, namale mpaui lako Abram to-Ibrani to apa mangka jaji. Ia to Abram torro jioi siandah garontoq kaju tarbantinna mesaq to-Amori disanga Mamre. Na ia to sileqtona Mamre disanga Eskol na Aner. Ia tee tau tallu nasibawan Abram ke malei parari. 14 Ia tonna saqdingngi Abram kumua dijokkoi to Lot anakkurena, nasua ngasanni sirempun to taunna to simacca parari, talluratuh sangpulo karua tau to jaji llan tendana Abram, naulaqi joo appaq raja ratu lako kota Dan. 15 Ntuumo jio nanii ntawai to taunna, napapirang torroanni, na ia tonna bongimo nararii to ewana nataloii. Naulaqi tuu lako tonnewai ratu lako kota Hoba jio reqna kota Damsyik. 16 Sininna to mangka naala ewa naala poleqi Abram nabawai pole. Nasolan tooi pole to Lot anakkurena sola to napunnai, moi tuu lako baine sola tau to dibawa mabela laenna.
Melkisedek mbarakkaqi Abram
14:17-24
17 Ia tonna mangkamo Abram ntalo Raja Kedorlaomer sola joo raja nasibawan, polemi Abram. Malemi to rajana to-Sodom ntammuii jio Lombok Syawe to disanga too Lombok Raja. 18 Ratui Melkisedek, raja jio kota Salem, mbawan Abram roti sola anggur. Ia tee Melkisedek imangna Puang Allataala to njaoanni sininna dewata. 19 Nabarakkaqii to Abram nakua, <<Dennaa upaq Nabarakkaqikiq Puang Allataala to mpaden langiq sola lino, Puang Allataala to njaoanni sininna dewata. 20 Dipakalaqbih Puang Allataala, to njaoanni sininna dewata, to mangka mbenko kapataloan ntaloi ewamu.>> Mangkai joo too, nabenni Abram lako Raja Melkisedek tawa sangpulona to sininna naala jio mai tonnewai.b
21 Nakuamo rajana to-Sodom lako Abram, <<Alami to barang, apa ia to taungkuq papoleannaq.>> 22 Apa mebalii Abram nakua, <<Massumpanaq mpau sangan-Na PUANG Allataala, to njaoanni sininna dewata, to mpaden langiq sola lino, 23 kumua teqda kulannala apammu, moi sanglambah bannang baqtu sangleqto ulang sandalaq, dikua nadanggiq mumangkada kumua, <Akuqra nasugih Abram.> 24 Danggiqmo naden kuputawa. Iamo tawakuq to mangkamo nakande taungkuq. Apa ia to Aner, Eskol sola Mamre to kusolan male parari, akeqmo napada nnala tawana.>>