Lot messarak jio mai Abram
13:1-13
13
Malemi Abram sola balinna ssalai tana Mesir, napole lako padang makase Negeb cappaq tana Kanaan lloqna liu, na sininna to apa napunnai nabawa ngasan, nameundi too to Lot. 2 Gaja sugih joo Abram. Nnampui buda patuoan, nnampui too buda bulawan sola peraq. 3 Mellelei jio mai mesaq ngenan lako ngenan laen, la mangnguju lako kota Betel. Ratumi lako padang naparallaq kota Betel na kota Ai to nanii mpakeqdeh tenda tonna tee, 4 to nani too ngkabuaq ngenan pangkaroban. Jiomo nanii Abram ssompa PUANG Allataala. 5 Moi Lot to meundi lako Abram, nnampui too domba, beke, sapin, na tenda, 6 arannai teqdamo nagannaq to padang nanii torro, sabaq pada budami patuoanna. 7 Iamo nasisakka to tomangrewa patuoanna Abram na tomangrewa patuoanna Lot. Ia joo wattu to-Kanaan unapa sola to-Feris ntorroii joo padang.8 Mangkadami Abram lako Lot nakua, <<Teqda namelo ke sisakkakiq, sabaq ia tee kitaq sikeluargakiq. Gajaq too ke sisakkai to tomangrewa patuoanmu sola tomangrewa patuoankuq. 9 Melo ke messarakmoko, maluah una tee tana. Pileimi umbonnara to mukabudai. Ia ke male tamako, akuq male sun. Ia ke male sunko, akuq male tama.>> 10 Napasilelei Lot nakita joo tana, nakitai kumua sininna Lombok Yordan ratu lako kota Zoar buda wainna, susi bang baraqbah Edena baqtu susi tana Mesir. Ia joo wattu teqdapa nalanynyaqii PUANG Allataala to kota Sodom na Gomora.b 11 Napileimi Lot to Lombok Yordan, namale lako kadellekan. Susimi joo namessarak Lot jio mai Abram. 12 Abram torro jio tana Kanaan, apa ia to Lot malei llelei kota jio Lombok Yordan, arannai ratu lako siandah kota Sodom nampakeqdeh tenda jio. 13 Ia to tau jio kota Sodom, liwaq gajaq panggaukanna, gaja madosa lako PUANG Allataala.
Abram mellele lako Hebron
13:14-18
14 Ia tonna messarakmo Lot, mangkada-I PUANG Allataala lako Abram nakua, <<Mengkita mengguririkko ntuu munii keqdeh. Kitai tama ratu sun, kitai req ratu sauq. 15 Sininna joo tana mukita la Kubenko sola batiqmu, mupumanah tarruhhi.c 16 La Kubenko batiq susi kassiq budanna. Ia ke la denni tau waqding rreken kassiq, waqding toomi rreken batiqmu. 17 Sadiamoko mumale llingkaii joo sininna tana, sabaq iko la Kuben.>> 18 Mangkai joo too, mpalelemi tendana Abram natorro jio kota Hebron, siandah sangngenan garontoq kaju tarbantin punnana Mamre, nampakeqdeh ngenan pangkaroban lako PUANG Allataala jio.