Puang Allataala ssua Abram ssalai kampongna
12:1-9
12
Den wattu Namangkada PUANG Allataala lako Abram Nakua, <<Ee Abram, salaii kampongmu, salai tooi to keluargamu sola bolana ambeqmu, mumale lako tana to la Kupakitanko.a 2 La Kupebudai to batiqmu, namenjaji bangsa liwaq tonggo. La Kubarakkaqiko, na la Kupakaissenanko. Susimi joo mumenjaji barakkaq lako tau laen. 3 La Kubarakkaqi to tombarakkaqiko, la Kusumpai to tossumpaiko. La Kubarakkaqi to sininna bangsa llan lino, sabaq iko.>>b4-5 Malemi Abram susi to Naparentanni PUANG Allataala mellele jio mai kota Haran naratu lako tana Kanaan. Nasolanni to Sarai balinna sola Lot anakkurena. Nabawa tooi to sininna napunnai sola kaunanna. Ia joo wattu umuruq pitungpulomi lima taunna Abram. 6 Ia tonna ratu lako tana Kanaan, malemi Abram llingkaii joo kampong, arannai ratu lako mesaq garontoq kaju tarbantin jio Morec siandah kota Sikhem. Ia joo wattu, to-Kanaan unapa ntorroii to tana Kanaan.
7 Ia joo wattu mpangpekitanni kale-Na PUANG Allataala lako Abram namangkada Nakua, <<Iamo tee tana Kanaan, la Kuben batiqmu.>> Napakeqdehmi Abram jio to ngenan pangkaroban lako PUANG Allataala.d 8 Mangkai joo too, mellelemi lako membuntunna jio kadellekanna kota Betel, nampakeqdeh tenda jio parallaqna kota Betel na kota Ai. Nampakeqdeh too ngenan pangkaroban, namassompa lako PUANG Allataala. Ia to kota Betel llan kalambunan, na ia to kota Ai jio kadellekan. 9 Mpatarruh omi kalingkanna Abram mangnguju sauq padang makase Negeb.
Abram jio tana Mesir
12:10-20
10 Ia tonna masainmo pebarrangan jio tana Kanaan, malei Abram doq tana Mesir la mentoratu jio, sabaq gaja sussa nnampaq kande jio tana Kanaan. 11 Ia tonna la mentamamo tana Mesir, mangkadami Abram lako Sarai balinna nakua, <<Kuissen kumua gaja loloko bene, 12 na ia ke nakitako to-Mesir, naissenni kumua balingkuqko, la naeloranko iko tuo na ia tee akuq la napatei. 13 Jaji melo ke mukua bangmo adingkuqko, naelorannaq tuo, na iko napusabaq nataratteqnaq.>>e
14 Ia tonna mentamamo tana Mesir Abram sola balinna, gaja lolo nakita to-Mesir to Sarai. 15 Ia tonna kitai pangjamana rajana to-Mesir, malemi mpaui lako raja to kamaloloanna Sarai, nadisolan tama istanana raja. 16 Natammui rampaqi rajana to-Mesir to Abram, sabaq madoangngi lako Sarai. Dibenmi kaunan, domba, beke, sapin, keledai sola unta to Abram. 17 Apa Naparatuanni PUANG Allataala mangrupa-rupa saki mematean to rajana to-Mesir sola sininna tau llan istana, sabaq nnalai balinna Abram. 18 Natambaii rajana to-Mesir to Abram nakuanni kumua, <<Ciapari mupugaukki susi tee lako akuq? Ciapari nateqda mupauannaq kumua balimmu tee Sarai? 19 Ciapari mukua adimmu, iamo kualai la kupubaine? Indeqi to bainemu, alai mumale sola!>> 20 Napangparentanmi rajana to-Mesir lako baqtu pira-pira taunna, namale ssolan Abram ssalai tana Mesir sola balinna, nabawa ngasanni to napunnai.