Menara Babel
11:1-9
11
Ia tonna anuq, ia to tau llan lino mesaqra basana na sangrupa too kadanna. 2 Ia tonna male sompaq lako kadellekan, ratumi lako mesaq padang malappah jio tana Babilonia, natorro jio. 3 Sipangkada-kadami nakua, <<Melo ke ngkabuaqkiq batu tela tatunu meloi namakaccaq.>> Iamo joo batu tela napasileqkeq tera nakabuaq bola. 4 Nakuapa, <<Melo ke ngkabuaqkiq mesaq kota tapakeqdeh mesaq menara ratu deq langiq, takaissenan na danggiq tamale sisarak-sarak llan lino.>>5 Mellaomi PUANG Allataala la ngkitai joo kota sola menara napakeqdeh tolino. 6 Nakuamo PUANG Allataala, <<Ia tuu lako tau, mesaqra bangsa na mesaqra basana. Maneq napamulari to akkattana na apami to naakkattai napugauk, nang la jaji. 7 Melo ke mellao-Kiq Tapasisalai basana, danggiq nasipahang.>> 8 Susimi joo to tolino Napasisarak-sarak PUANG Allataala jio mai joo tana, natitaleh llan lino, pajami ngkabuaqi joo kota. 9 Iamo nadisanga Babelb joo kota ratu lako too, sabaq jiomo nanii PUANG Allataala mpasisalai basana, na jiomo ntuu joo Nanii PUANG Allataala mpasisarak-sarakki lako sininna padang llan lino.
Batiqna Sem
11:10-26
10 Iamo tee to nunnungan batiqna Sem. Duang taun mangkanna wai ssamboi lino tonna saratuhmo taunna Sem, jajimi to anakkana muane disanga Arpakhsad. 11 Lima ratuhpi taunna Sem tuo mangkanna jaji Arpakhsad, nadenpa baqtu pira-pira anakkana muane sola baine jaji namaneq mate.
12 Ia tonna umuruq tallungpulomo lima taunna Arpakhsad, jajimi to anakkana muane disanga Selah. 13 Pataratuhpi tallung taun Arpakhsad tuo mangkanna jaji Selah, nadenpa baqtu pira-pira anakkana muane sola baine jaji namaneq mate.
14 Ia tonna umuruq tallungpulomo taunna Selah, jajimi to anakkana muane disanga Eber. 15 Pataratuhpi tallung taun Selah tuo mangkanna jaji Eber, nadenpa baqtu pira-pira anakkana muane sola baine jaji namaneq mate.
16 Ia tonna umuruq tallungpulomo appaq taunna Eber, jajimi to anakkana muane disanga Peleg. 17 Pataratuhpi tallung pulo taunna Eber tuo mangkanna jaji Peleg, nadenpa baqtu pira-pira anakkana muane sola baine jaji namaneq mate.
18 Ia tonna umuruq tallungpulomo taunna Peleg, jajimi to anakkana muane disanga Rehu. 19 Dua ratuhpi kasera taunna Peleg tuo mangkanna jaji Rehu, nadenpa baqtu pira-pira anakkana muane sola baine jaji namaneq mate.
20 Ia tonna umuruq tallungpulomo dua taunna Rehu, jajimi to anakkana muane disanga Serug. 21 Dua ratuhpi pitung taun Rehu tuo mangkanna jaji Serug, nadenpa baqtu pira-pira anakkana muane sola baine jaji namaneq mate.
22 Ia tonna umuruq tallungpulomo taunna Serug, jajimi to anakkana muane disanga Nahor. 23 Dua ratuhpi taunna Serug tuo mangkanna jaji Nahor, nadenpa baqtu pira-pira anakkana muane sola baine jaji namaneq mate.
24 Ia tonna umuruq duangpulomo kasera taunna Nahor jajimi to anakkana muane disanga Terah. 25 Saratuh sangpulo kaserapi taunna Nahor tuo mangkanna jaji Terah, nadenpa baqtu pira-pira anakkana muane sola baine jaji namaneq mate.
26 Ia tonna umuruq pitungpulomo taunna Terah, jajimi to anakkana tallu muane disanga Abram, Nahor na Haran.
Batiqna Terah
11:27-32
27 Iamo tee to nunnungan batiqna Terah. Ia to Terah tallu anakkana disanga Abram, Nahor na Haran. Den mesaq anakkana Haran muane disanga Lot. 28 Ia joo Haran mate jioi kampong kajajianna disanga Ur-Kasdim. Ia joo wattu tuo unapi ambeqna. 29 Ia to Abram sibalii Sarai, na Nahor sibali Milka anakkana Haran. Denpa anakkana Haran muane disanga Yiska. 30 Ia to Sarai tamanangngi.