Janjin-Na Puang Allataala lako Nuh
9:1-17
9
Nabarakkaqii Puang Allataala to Nuh sola anakkana Nakua, <<Keanak keampo kamuq na buda batiqmi mponnoi lino.a 2 Sininna olok-olok llan lino la ngkalajaq kamuq mikuasai tooi, la olok-olok jao gantanan, la manuk-manuk jao langiq, la bale jiong tasik. 3 Sininna joo olok-olok waqding ngasan mikande. Susi too to sininna tananan macikkiq, la Kuben kamuq menjaji kandemi. 4 Ia to teqda lalo nawaqding mikande, iamo to jukuq denpa rarana, sabaq ia to penawa llanni rara.b 5 Ia to tompatei padanna rupa tau, la Kupabalahhi. Ia to tau baqtu olok-olok ke mpateii tolino, la Kupabalahhi. 6 Ia to tompatei padanna rupa tau, la napatei toda tau, sabaq ia to tolino Nakabuaq Puang Allataala Napasangrupa rupan-Na.c 7 Membatiqmo kamuq, misabuda-budanna ntorroi lino.>>d8 Mpatarruhhi kadan-Na Puang Allataala lako Nuh sola lako anakkana Nakua, 9 <<Pesaqdingngii! La mpaden-Naq janjing-Kuq lako kamuq sola lako batiqmi, 10 na sininna olok-olok tuo susinna manuk-manuk, olok-olok manaran na olok-olok masiaq baqtu sininna to misolan messun llan mai kappalaq. 11 Susi tee to janjing-Kuq lako kamuq kumua, sininna to tuona, teqdamo naladilanynyaqi wai ssamboi lino. Teqdamo naladen poleq wai ssamboi lino la mangsolangngi. 12 Ia to menjaji tanda janjing-Kuq lako kamuq na batiqmi sola sininna olok-olok tuo to misolan messun llan mai kappalaq, 13 iamo to tarauwe Kupajao langiq, tandana kumua mangka-Naq mpaden janji lako tee lino. 14 Ia ke Kupabombonni to saleuq, napajan to tarauwe tindak deq langiq, 15 Kuingaranmi to janjing-Kuq lako kamuq sola lako mangrupa-rupa olok-olok tuo kumua, teqdamo naladen poleq wai ssamboi lino la ssolangngi sininna to tuo llan lino. 16 Ia ke Kukita omi to tarauwe tindak jao langiq Kuingaran omi to janjing-Kuq teqda anggena lako sininna tolino na lako mangrupa-rupa olok-olok tuo llan lino. 17 Iamo joo tanda janjing-Kuq to Kupaden lako sininna tau na olok-olok tuo llan lino.>>
Nuh sola anakkana
9:18-29
18 Ia to anakkana Nuh nasolan messun llan mai kappalaq, iamo to Sem, Ham na Yafet. Ia tee Ham, iamo ambeqna Kanaan. 19 Ia tee tallu anakkana Nuh, iamo tojolona sininna bangsa llan lino. 20 Nuh menjaji mesaq to pangbaraqbah, iamo pamulanna mangbaraqbah anggur. 21 Den wattu tonna mangka nnisoq anggurna, malangoi namangkale-kale mammaq llan tendana. 22 Nakitami Ham to kasirisanna ambeqna, nacuritai lako sileqtona jio salean tenda. Ia to Ham ambeqna Kanaan. 23 Mangkai joo too, malemi Sem sola Yafet nnala dodo napatiassei jao kamalaqna sola duai, nalumingka bokoq ssamboii to kasirisanna ambeqna, dikua danggiq nakitai. 24 Ia tonna teqdamo namalango Nuh, naissenni to apa napugauk anak tampakkana, 25 nakuamo,
<<Tampak ropu to Kanaan.e
La napukaunanni kaunanna sileqtona.>>
26 Nakuapa, <<Dipakalaqbih to PUANG Allataala to nasompa Sem,
akeq na ia to Kanaan la napukaunan Sem.
27 Dennaa upaq Napemaluahhii Puang Allataala to ngenan nanii mariqpih Yafet.
Dennaa upaq na ia to batiqna la torro sola batiqna Sem.
Akeq na ia to Kanaan napukaunan Yafet.>>
28-29 Ia tonna mangka nasamboi wai to lino, tallu ratuhpa limangpulo taunna Nuh tuo, namaneq mate. Jaji nadeteq kasera ratuhna limangpulo taun umuruqna.