Meremi to wai ssamboi lino
8:1-19
8
Naingaran Puang Allataala to Nuh sola sininna olok-olok nasolan llan kappalaq. Napupangngiriqi Puang Allataala to angin, namangpamula mere to wai. 2 Sininna wai mengkalimbua jiong mai litak na uran jao mai langiq Napapaja Puang Allataala. 3 Saratuh limangpulo allona wai ssamboi lino, namaneq mpamulai mere. 4 Ia tonna tanggalaq sangpulo pitu bulan pitu, sampemi joo kappalaq jao mesaq coppoq membuntunna Ararat. 5 Tanggalaq mesaq bulan sangpulo tonna samere-merenamo to wai, mangpamulami pajan to coppoq buntu.6 Ia tonna patangpulomo allona,a nabukkaqmi Nuh to pentiroan kappalaq, 7 nalaqparanni to kaok mesaq, namentiaq messun mentama bangpa kappalaq, arannai mere tongan to wai. 8 Nalaqparan omi Nuh mesaq to jangan-jangan la nanii ngkanassai kumua mere tonganmiraka to wai. 9 Apa teqda ngenan la nanii taqpa, sabaq nasamboi unapi wai to sininna padang, jaji polei lako kappalaq. Mpengkoronganni limanna Nuh lako joo jangan-jangan napatama poleqi kappalaq. 10 Mangtajanni Nuh pitung allo, namaneq laqparan poleqi joo jangan-jangan. 11 Na ia tonna karuenmo naissenmi Nuh kumua meremi to wai, sabaq pole poleqmi joo jangan-jangan lako Nuh mbawa sanglambah daun zaitun malolo jio tillokkona. 12 Natajan omi Nuh pitung allo, namaneq laqparan poleqi to mesaq jangan-jangan, apa teqdamo napole. 13 Ia tonna tanggalaq mesaq bulan mesaq meremi to wai. Ia joo wattu annanmi ratuhna sangtaun umuruqna Nuh. Nabukkaqmi Nuh to deana joo kappalaq nakitai kumua mangpamulami makase to padang. 14 Ia tonna tanggalaq duangpulo pitu bulan dua, makase lalomi to padang.
15 Nakuamo Puang Allataala lako Nuh, 16 <<Messunmoko llan mai kappalaq sola bainemu, anakkamu na mamintummu. 17 Pasun ngasan toomi to sininna olok-olok mupatama kappalaq. Pasunmi to manuk-manuk na olok-olok jao gantanan la biccuqna la matonggona, nawaqding membatiq nasabuda-budanna llan lino.>> 18 Messunmi Nuh llan mai kappalaq sola bainena, anakkana sola mamintunna. 19 Messun ngasan toomi to olok-olok dipatama kappalaq, olok-olok jao gantanan la biccuqna la matonggona na manuk-manuk, napada male sola sangrupanna.
Mpassompanni karoba Nuh
8:20-22
20 Nakabuaqmi Nuh to ngenan pangkaroban, nanii mangkaroba lako PUANG Allataala. Naalai sisangrupa to manuk-manuk sola olok-olok hallalaq, napangkaroban ditunui jao ngenan pangkaroban. 21 Napumasannang PUANG Allataala to passompan bunangnguq, Nakuamo llan penawan-Na, <<Teqdamo Kulassumpaii tee lino, napubuaq panggaukan gajaqna tolino, moiraka namangpamula biccuqna, gajaqmi pangpikkirisanna. Teqdamo Kulassolangan poleqi to sininna apa tuo, susi to mangka Kupugauk. 22 Padami masainna den tee lino, la pada toomi masainna teqda pajana sisulle to wattu mangngamboh sola mpebuai asseleq padang, la sisulle bang to wattu macakkeq na wattu malussu, pebarrangan na peuranan, masiang na bongi.>>