Wai ssamboi lino
7:1-24
7
Ia tonna mangkamo joo kappalaq, mangkada-Mi PUANG Allataala lako Nuh Nakua, <<Iko mandamo Kukita mpugauk pakkaeloran-Kuq too allo. Jaji mentamamoko ntuu kappalaq sola sininna repokkomu. 2 La muala sipitung pasang to olok-olok hallalaq, apa ia to harangna sisangpasangra. 3 La muala too sipitung pasang to sininna rupa manuk-manuk mentiaq jao langiq, naden membatiq llan lino. 4 Pitung allopi Kuparatu uran, na patangpulo allona patangpulo bonginna teqda nalapaja uran, na sininna to apa tuo mangka Kupaden, la Kulanynyaqi ngasan.>> 5 Napugaukmi Nuh sininna to mangka Naparentanni PUANG Allataala. 6 Annanmi ratuhna taun umuruqna Nuh tonna ratu to wai ssamboi lino. 7 Mentamami kappalaq Nuh sola bainena na anakkana sola anak mamintunna, mpasalamaq kalena jio mai wai ssamboi lino.a 8 Ratu ngasan tooi to mangrupa-rupa olok-olok, la hallalaqna, la harangna, manuk-manuk na olok-olok jao gantanan, 9 ratui sisangpasang, mentama kappalaq sola Nuh, susi to Napangparentan Puang Allataala.10 Pitung allo mangkanna Napangparentan Puang Allataala lako Nuh, naratu to wai ssamboi lino. 11-13 Ia joo wattu annanmi ratuhna taun umuruqna Nuh. Tanggalaq sangpulo pitu bulan dua, namentama kappalaq to Nuh sola bainena, na tallu anakkana, iamo to Sem, Ham na Yafet, sola tallu anak mamintunna. Ia toomo joo allo namengkalimbua to wai jiong mai litak, nauran tarruh susi wai tibollo jao mai langiq,b patangpulo allona, patangpulo bonginna. 14 Mangka toomi mentama kappalaq to mangrupa-rupa olok-olok jao gantanan la manaranna la masiaqna, la biccuqna la matonggona, namentama too to mangrupa-rupa manuk-manuk, 15-16 ratu mpellambiqi Nuh. Mentamami sisangpasang to sininna olok-olok rrundun Nuh, susi to Napangparentan Puang Allataala lako Nuh. Ia tonna llan ngasanmo, Nasalliqmi PUANG Allataala joo kappalaq. 17 Patangpulo allona patangpulo bonginna teqda pajana uran naendek to wai ssamboi lino, naendek joo kappalaq. 18 Saendek-endeknami to wai, na nnawang-awang joo kappalaq. 19 Samatande-tandenami to wai, arannai nasamboi to buntu liwaq matande. 20 Endek tarruh to wai, arannai nalewanni pitu metereq to coppoq buntu. 21-23 Sininna to makkenyawa mate ngasan, susinna tolino, olok-olok jao gantanan la manaranna la masiaqna, la biccuqna la matonggona na sininna manuk-manuk jao langiq. Susimi joo Puang Allataala llanynyaqi sininna to makkenyawa llan lino. Apa Nuh mandara sola to nasolan mentama kappalaq teqda namasolang. 24 Saratuh limangpulo allona to wai ssamboi lino, namaneq mpamulai mere.