Kajajian 6

Kagajatan napugauk tolino

6:1-8

Ia tonna sabuda-budannamo to tolino, na buda anak baine najajian, 2 nakitami anak dewata kumua simalolo to anaqdara tolino, anna pada mpileii joo anaqdara to nakabudai, napubainei. 3 Nakuamo PUANG Allataala, <<Ia to penawa Kuben tolino natuo, teqda nalatorro tarruh llan kalena sabaq la mate. Mangpamula too, ia to umuruqna tolino saratuhra duangpulo taunna.>> 4 Ia joo wattu, den tau sigaja tande na matonggo pangkaleanna. Mangkai joo wattu, den unapa batiqna anak dewata to nasikabalii tolino. Iamo pangbarani na gaja kaissenan tonna anuq.

5 Ia tonna kitai PUANG Allataala kumua gaja gajaqmi panggaukanna to tolino, na ia mandamo llan penawanna to tuli la mangpanggaukan gajaq, 6 Napenassanni PUANG Allataala ngkabuaq tolino, Napumasse tooi penawan-Na. 7 Nakuamo PUANG Allataala mangkada, <<La Kulanynyaqi to tolino mangka Kupaden, na olok-olok jao gantanan, la biccuq la matonggo, na manuk-manuk jao langiq, sabaq menassan-Naq mangka mpadenni.>> 8 Apa ia to Nuh Napumasannang PUANG Allataala.

Curita Nabi Nuh

6:9-22

9 Susi tee curitanna jiona Nuh. Ia joo wattu, Nuh mandamo tomakassing na teqda caccana jio mai sininna tolino, natattaq tuo sisobaq Puang Allataala. 10 Den tallu anakkana muane, iamo to Sem, Ham na Yafet. 11 Apa ia to sininna tau laen teqdamo melo panggaukanna jio pengkitan-Na Puang Allataala, lako-lako oi kamasaqgatan mandamo napugauk. 12 Nakitai Puang Allataala tee lino na kagajatan mandamo Nakita, sabaq sininna tau gajaq ngasanmi sipaqna.

13 Mangkada-Mi Puang Allataala lako Nuh Nakua, <<Kupattantumo la llanynyaqi ngasanni to sininna apa tuo llan lino. Kulanynyaqi ngasanni sola lino, sabaq kamasaqgatan mandamo llan tee lino. 14 La rrempunko kaju gofir to liwaq mawatang mukabuaq mesaq kappalaq tonggo. La musapuqi ter lanna liu sola saleanna, musapaq-sapaqi to lanna liu. 15 Ia joo kappalaq la mukabuaq, saratuh tallung pulo tallu metereq landona, duangpulo dua metereq sangkahna, na sangpulo tallu metereq tandena. 16 Deaii joo kappalaq, paendekki patangpulo appaq senti to petuona, danggiq namarante. Patallung lataqi joo kappalaq, mukabuatanni salliq jio saqdena. 17 Ingaranni, la mparatu-Naq wai ssamboi lino, nalanynyaqii to sininna apa tuo sola makkenyawa llan lino. 18 Apa la mpaden-Naq janji lako iko. La mentamako ntuu joo kappalaq sola bainemu na anakkamu sola mamintummu. 19-20 La mupatama too kappalaq sisangpasang to sisangrupa manuk-manuk jao langiq na olok-olok jao gantanan la biccuqna la matonggona, danggiq nalanynyaq ngasan. 21 Pasadiako mangrupa-rupa kande mupatamai kappalaq to la mukandena sola la nakandena olok-olok.>> 22 Napugauk ngasan Nuh susi to Napangparentan Puang Allataala.