Nunnungan batiqna Adam ratu lako Nuh
5:1-32
5
Susi tee to nunnunganna batiqna Adam. Ia tonna kabuaqi Puang Allataala to tau, Nakabuaqi sangrupa rupan-Na.a 2 Nakabuaqi Puang Allataala to muane sola baine. Nabarakkaqii, nasangaii <<tolino>>.b 3 Ia tonna umuruq saratuhmo tallungpulo taunna Adam, jaji omi to anakkana muane sangrupa bang Adam, nasangaii Set. 4 Ia tonna jaji Set, karuapa ratuhna taunna Adam tuo, naden unapa baqtu pira-pira anakkana muane sola baine jaji. 5 Kasera ratuhna tallung pulo taun umuruqna Adam namaneq mate.6 Ia tonna umuruq saratuhmo limang taun Set, jajimi to anakkana muane disanga Enos. 7 Ia tonna jaji Enos, karuapa ratuhna pitung taun Set tuo, nadenpa baqtu pira-pira anakkana muane sola baine jaji. 8 Kasera ratuhna sangpulo dua taun umuruqna Set namaneq mate.
9 Ia tonna umuruq kaseramo pulona taunna Enos, jajimi to anakkana muane disanga Kenan. 10 Ia tonna jaji Kenan, karuapa ratuhna sangpulo lima taunna Enos tuo, nadenpa baqtu pira-pira anakkana muane sola baine jaji. 11 Kasera ratuhna limang taun umuruqna Enos, namaneq mate.
12 Ia tonna umuruq pitungpulomo taunna Kenan, jajimi to anakkana muane disanga Mahalaleel. 13 Ia tonna jaji Mahalaleel, karuapa ratuhna patangpulo taunna Kenan tuo, nadenpa baqtu pira-pira anakkana muane sola baine jaji. 14 Kasera ratuhna sangpulo taun umuruqna Kenan, namaneq mate.
15 Ia tonna umuruq annanmo pulona lima taunna Mahalaleel, jajimi to anakkana muane disanga Yared. 16 Ia tonna jaji Yared, karuapa ratuhna tallung pulo taunna Mahalaleel tuo, nadenpa baqtu pira-pira anakkana muane sola baine jaji. 17 Karua ratuhna kaserapulona lima taun umuruqna Mahalaleel, namaneq mate.
18 Ia tonna umuruq saratuhmo annanpulona dua taunna Yared, jajimi to anakkana muane disanga Henokh. 19 Ia tonna jaji Henokh, karuapa ratuhna taunna Yared tuo, nadenpa baqtu pira-pira anakkana muane sola baine jaji. 20 Kasera ratuhna annanpulona dua taun umuruqna Yared, namaneq mate.
21 Ia tonna umuruq annan pulona lima taunna Henokh, jajimi to anakkana muane disanga Metusalah. 22 Ia tonna jaji Metusalah, talluratuhpa taunna Henokh tuo sisobaq tarruh Puang Allataala, nadenpa baqtu pira-pira anakkana muane sola baine jaji. 23-24 Gaja sisobaq tarruh Puang Allataala to Henokh llan katuoanna. Na talluratuhpa annanpulona lima taun umuruqna, Nabawa tuoi Puang Allataala nateqdamo dikita.c
25 Ia tonna umuruq saratuhmo karuapulona pitu taunna Metusalah, jajimi to anakkana muane disanga Lamekh. 26 Ia tonna jaji Lamekh, pituratuhpa karuapulona dua taunna Metusalah tuo, nadenpa baqtu pira-pira anakkana muane sola baine jaji. 27 Kasera ratuhna annanpulona kasera taun umuruqna Metusalah, namaneq mate.
28 Ia tonna umuruq saratuhmo karuapulona dua taunna Lamekh, jajimi to anakkana muane, 29 nasangaii Nuh,d sabaq mangkadai Lamekh nakua, <<Ia tee pea la mpamaringngan jamantaq, ke mangjama mabandaqkiq ngkaresoii tee padang mangka Nasumpai PUANG Allataala.>> 30 Ia tonna jaji Nuh, lima ratuhpa kaserapulona lima taunna Lamekh tuo, nadenpa baqtu pira-pira anakkana muane sola baine jaji. 31 Pituratuh pitungpulo pitu taun umuruqna Lamekh, namaneq mate.
32 Ia tonna umuruq lima ratuhmo taunna to Nuh, jajimi to anakkana muane tallu disanga Sem, Ham na Yafet.