Kajajian 4

Kain sola Habel

4:1-16

Mangkai joo too, sisolami mammaq Adam na Hawa bainena. Kebaqtangmi Hawa najaji Kain. Nakuamo Hawa, <<Pangtulung-Na PUANG Allataala kujajian mesaq anak muane.>> 2 Njajian poleq omi mesaq anak muane, nasangaii Habel. Ia to Habel mangrewa beke sola domba, na ia to Kain mangbaraqbahhi. 3 Baqtu pira-pirami masainna, naalami Kain piraq to asseleq padangna, napassompanni lako PUANG Allataala. 4 Naala todami Habel baqtu pira-pira to anak domba pamungah, napassompanni to loppona lako Puang Allataala. Napumasannang PUANG Allataala to Habel sola passompanna. 5 Apa ia to Kain sola passompana teqda Napumasannangngi PUANG Allataala. Iamo nagaja birih namenggamuru bang. 6 Nakutanaii PUANG Allataala Nakua, <<Ciapari mumabirih, ciapari mumenggamurura? 7 Ia kenna la melo to mupugauk, la metawaroko, apa ia ke gajaqi to mupugauk, sadiamo to dosa la mentama penawammu. Ia ke la nakuasaiko dosa, nang la muewai mukuasaii.>> 8 Nakuamo Kain lako Habel adinna, <<Tamalera lako baraqbah.>> Ia tonna jiomo baraqbah sola dua, taqpa nabunoi Kain to adinna, napateii.

9 Nakutanaimi PUANG Allataala to Kain Nakua, <<Umbori Habel, adimmu?>> Mebalii Kain nakua, <<Teqda kuissenni. Tangngianaq to mangparakana adingkuq.>> 10 Mangkada-I Puang Allataala Nakua, <<Ciapari mupugaukki tee panggaukan gajaq? Sumarroi lako Akuq to rarana adimmu jiong mai litak, butung to gamara metaqda la dipembalaran. 11 Tampak ropumoko too, teqda mulannii tee padang to butung mpupenganga angaqna nnammaq rarana adimmu to mupatei. 12 Ia ke mantananko, teqda nalakeasseleq. La mpalaianko kalemu male sompaq llan lino.>> 13 Nakuamo Kain lako PUANG Allataala, <<Gaja watang tuu Tasessannaq, tangkukulle la mpassanni. 14 Nang Taulaqimoq too llan mai ntee padang, la membunimoraq jio mai olo-Taq. La mpalaiannaq kalekuq male sompaq llan tee lino. Nang la napateinaq ke denni tau kusitammuan lako lalan.>> 15 Apa Nakua PUANG Allataala, <<Teqda nasusi joo! Ia to tompateiko, la dipembalaranko manglokkon pempitu.>> Namaneq mpalakoii PUANG Allataala tanda to Kain, dikua danggiq napateii tau ke denni nasitammuan. 16 Malaimi Kain jio mai olo-Na PUANG Allataala, namariqpih jio tana Nod jio kadellekanna baraqbah Eden.

Batiqna Kain

4:17-24

17 Sisolami mammaq Kain na bainena, kebaqtangmi bainena, najaji Henokh. Nabangunmi Kain to mesaq kota, nasangaii kota Henokh susi sanganna anakkana. 18 Disanga Irad to anakkana Henokh, Irad njajian Mehuyael, na Mehuyael njajian Metusael, na Metusael njajian Lamekh. 19 Ia to Lamekh dua bainena, disanga Ada sola Zila. 20 Ada njajian Yabal, na ia to batiqna Yabal, iamo to torro llan tenda na ia to jamanna mangrewa. 21 Ia to adinna Yabal, disanga Yubal, na ia to batiqna Yubal iamo tomacca mangcuqbekan sola massuling. 22 Zila njajian Tubal-Kain, na ia to batiqna pande bassi sola tambaga. Den adinna Tubal-Kain baine disanga Naama.

23 Mangkadai Lamekh lako dua bainena nakua,

<<Ee Ada sola Zila, pesaqdingngii!

Ee balingkuq sola dua, parinawai kadangkuq!

Mpateinaq mesaq muane,

sabaq nakojong-kojongnaq.

Kupatei joo kallolo,

sabaq natundunnaq nakambang-kambang kalekuq.

24 Nasabaq ia ke Kain dipatei la dipembalaranni manglokkon pempitu,

apa ia ke akuq dipatei la dipembalarannaq manglokkon pempitungpulo pitu.>>

Set sola Enos

4:25-26

25 Sisola omi mammaq Adam na Hawa, najaji mesaq to anakkana muane, nasangaii Set, sabaq nakua Hawa, <<Naben omoq Puang Allataala mesaq anak muane sullena Habel, to mangka napatei Kain.>> 26 Ia to Set njajian mesaq anak muane nasangaii Enos. Iamo joo wattu namangpamula to tau mpau sangan-Na PUANG Allataala ke massompai.