Mpugaukki dosa to tolino
3:1-13
3
Sininna olok-olok jao gantanan to Napaden PUANG Allataala, ulahmo to maccana mangngakkalan. Den wattu namale joo ulah lako joo baine nakutanaii kumua, <<Nakuan tonganra kamuqka Puang Allataala kumua, <Danggiq kandei to sininna bua kaju llan tee baraqbah?> >>a 2 Mebalii joo baine nakua, <<Waqding ia kikande to bua kaju llan tee baraqbah, 3 apa ia to garontoq kaju llan tee tangnga baraqbah Napangnganggai Puang Allataala Nakua, <Danggiq mikandei baqtu danggiq mikakaqi buanna sabaq la mipumate.> >> 4 Apa nakua ulah lako joo baine, <<Nang teqdara milamate, 5 apa iara Namangkada Puang Allataala susi joo, sabaq ia ke mikandei, la macca kamuq misusi Puang Allataalab nnissen umbo to melo na umbo to gajaq.>> 6 Nakitai joo baine kumua melo joo bua kaju, la marasa dikande. Macinnai namangpikkiriq kumua ia ke nakandei la mandalan pangtangngaranni. Naalai to buanna nakandei, naben tooi to muanena nasolan, nakande todai. 7 Mangkanna joo too, maneqri naissen kumua mangkale-kalei paleq sola dua. Nnalami daun arac, napasilapik-lapikki napessaqwakki.8 Ia tonna mangngiriq-iriq to angin karuen, ssaqdingmi PUANG Allataala lumingka llan baraqbah, malajaqi namembuni sola dua llan allaq garontoq kaju, dikua danggiq Nakitai PUANG Allataala.
9 Apa metamba-I PUANG Allataala lako muane Nakua, <<Umboroko?>> 10 Mebalii joo muane nakua, <<Ia tongkusaqding lingka-Taq llan baraqbah, malajaqnaq sabaq mangkale-kalenaq, kumembuni.>> 11 Nakuamo Puang Allataala, <<Indara mpauanko kumua mangkale-kaleko? Mukanderika to bua kaju Kuanggaiko ngkandei?>> 12 Mebalii joo muane nakua, <<Ia tee baine Tabennaq la ntulungnaq, iamo mbennaq joo bua kaju kukandei.>> 13 Mangkada-Mi PUANG Allataala lako joo baine Nakua, <<Apamora to mangka mupugauk?>> Mebalii joo baine nakua, <<Kukandei joo bua kaju, sabaq napakenanaq ulah.>>d
Puang Allataala mpattantu pangsessa
3:14-21
14 Mangkada-Mi PUANG Allataala lako joo ulah Nakua, <<Tampak ropuko, sabaq panggaukanmu. La disessako laqbi mabandaq na ia to sininna olok-olok, la manaranna, la masiaqna. Mangpamula too, la lumolokko, na litak kandemu ratu lako matemu. 15 La Kupasimusu tarruhko joo baine, Kupasimusu tooi batiqmu na batiqna. Ia to batiqna la nnicak-icak ulummu, na ia to batiqmu la ngkengke kambutuqna.>>e 16 Mangkada-I Puang Allataala lako joo baine Nakua, <<La Kupamasussako ke kebaqtangko, nagaja paqdik ke keanakko. Apa la tattaqko macinna lako muanemu, nakuasaiko.>> 17 Na lako joo muane Nakua Puang Allataala, <<Disumpai to padang, sabaq balimmura mupesaqdingngi, mukandei to bua kaju Kuanggaiko ngkandei. Ratu lako matemu la maparriqko nnangahhi to la muputuona jio mai padang.f 18 Ia to padang la natuoi mangrupa-rupa duri mumasussa mpusarai, na ia to tananan tuo jio padang, iamo kandemu. 19 La sasu aqpuhpoko nnangahhi to la muputuona ratu lako matemu. La pole poleqko lako litak ke matemoko, sabaq dikabuaqko jio mai litak.>>
20 Ia joo muane disanga Adamg, nasangaii Hawa to bainena, sabaq iamo menjaji indona sininna tolino.h
21 Naalai PUANG Allataala to balulang olok-olok Nakabuaqi pakean Napapakeii joo Adam sola bainena.
Adam sola Hawa diulaqi llan mai baraqbah Eden
3:22-24
22 Mangkada-I PUANG Allataala Nakua, <<Ia joo tolino, susimi-Kiq, naissenmi umbo to melo na umbo to gajaq. Jaji parallu dijagai joo garontoq kaju mpaden katuoan na danggiq naalai to buanna nakandei arannai tuo tarruh.>>i 23 Naulaqimi PUANG Allataala llan mai baraqbah Eden, Nasuai njamai to litak to dinii nnalai. 24 Ia tonna mangka Puang Allataala nnulaqii, Napajioi kadellekan baraqbah to baqtu pira-pira malaekaq disanga kerubj mangjaga, na den too laqboh lando dukku namempirik-pirik. Iamo njagai lalan mentama joo baraqbah nanii garontoq kaju katuoan.