Kajajian 2

Susimi joo to langiq sola lino na sininna issinna Napaden Puang Allataala. 2 Ia tonna allo mangpempitumo, kenden-Mi Puang Allataala tonna mangka mpaden langiq sola lino na sininna issinna. 3 Nabarakkaqii Puang Allataala joo allo mangpempitu, Napattantui menjaji allo malaqbih, sabaq iamo Nanii Puang Allataala kenden tonna mangka ngasanmo njamai to jaman mpaden langiq sola lino na sininna issinna.

4 Susi tee curitanna tonna padenni PUANG Allataala to langiq, lino na sininna issinna. 5 Ia joo wattu teqdapa tananan, moi jio padang, sabaq teqdapa Naparatui PUANG Allataala to uran nateqda toopa tau la njama padang. 6 Apa endekmi to ambun jiong mai litak, mbosokki sininna kuliq padang. 7 Iamo joo wattu Nannala litak PUANG Allataala Nakabuaq tau, Namaneq mburrungngii penawa to illongna. Susimi joo nakepenawa to tau.

Baraqbah Eden

2:8-25

8 Napadenmi PUANG Allataala to baraqbah Eden jio kadellekan, Napanii joo tau mangka Nakabuaq. 9 Napatuomi PUANG Allataala llan joo baraqbah to mangrupa-rupa garontoq kaju makassing namelo to buanna dikande. Na llan tangnga-tangngana joo baraqbah den dua garontoq kaju. Ia to mesaq ianna dikande buanna nabenkiq katuoan, na ia to mesaqna ianna dikande buanna nabenkiq kapaissenan la nnissen umbo to melo na umbo to gajaq.

10 Den mesaq saqdan llan baraqbah Eden to mpaden wai mbosokki joo baraqbah. Ia joo saqdan lolong messun llan mai baraqbah Eden, titawai menjaji appaq saqdan. 11-12 Den disanga Saqdan Pison, to manglekko-lekko ngguririkki tana Hawila. Ia to tana Hawila sigaja melo to bulawanna, naden too jio to lite kaju bunangnguq sola batu paramata disanga krisopras. 13 Den disanga Saqdan Gihon, to manglekko-lekko ngguririkki tana Kus. 14 Den disanga Saqdan Tigris, nnola jio kadellekanna tana Asyur na den disanga Saqdan Efrat.

15 Naalai PUANG Allataala joo tau, Napallanni baraqbah Eden, Napabarakkannii la ngkaresoi joo baraqbah. 16 Napangparentanni PUANG Allataala lako joo tau Nakua, <<Waqding ngasan mukande to bua garontoq kaju llan tee baraqbah, 17 apa ia joo garontoq kaju mpangpeissenan umbonna to melo na umbonna to gajaq, danggiq mukandei buanna, sabaq ia ke mukandei nang la mateko.>>

18 Mangkada omi PUANG Allataala Nakua, <<Teqda namelo ke mesa-mesa bangri to tau. La Kukabuatanni to maka la ntulungngi.>> 19 Nnalami litak PUANG Allataala, nakabuaqi sininna rupa olok-olok gantanan na manuk-manuk jao langiq. Nabawa ngasanmi PUANG Allataala lako tau, la Nanii nnissenni apara nasanganni joo olok-olok sola manuk-manuk. Na ia to sanga nabenni tau, iamo sanganna simesaq-mesaq olok-olok sola manuk-manuk. 20 Susimi joo to tau mben sanga sininna olok-olok manaran, olok-olok masiaq na manuk-manuk jao langiq. Apa moi mesaq, teqda bang nakita to maka la ntulungngi. 21 Iamo Napaleppengngi PUANG Allataala joo tau, Naalaii to buku bambanna mesaq, Namaneq ssulleii jukuq joo Nanii nnala buku bamban. 22 Ia joo buku bamban Nakabuaqi PUANG Allataala mesaq baine, Namaneq ssolanni lako muane. 23 Mangkadami joo muane nakua, <<Iamo tee to buku diala jio mai bukungkuq, na jukuq jio mai jukuqkuq. La disangai baine, sabaq diala jioi mai muane.>> 24 Iamo joo na ia to muane la messarak jio mai tomatuanna natorro sola bainena, namenjaji mesaq sola dua. 25 Ia joo muane sola bainena mangkale-kalei, apa teqda namasiriq.