Kajajian
Puang Allataala mpaden langiq na lino sola issinna
1:1–2:7
1
Ia tonna anuq, Napadenni Puang Allataala to langiq sola lino. 2 Teqdapa namangrupa lino tee lino, na teqda toopa issinna. Malillinpa to tasik maluah, na ia to Roh Allataala mentiaq-tiaq jao wai.3 Mangkada-I Puang Allataala Nakua, <<La den arrang,>> naden arrang.a 4 Nakitai Puang Allataala kumua melo joo arrang, Napasisarakki to mariwang na malillin. 5 Nasangaii allo joo mariwang, na bongi joo malillin. Bongimi namaneq makaleq. Iamo pamulanna allo.
6 Mangkada-I Puang Allataala Nakua, <<La den pesapaq nnallaqi wai jaona liu na wai jiongna liu.>>b 7 Napadenmi Puang Allataala to pesapaq nnallaqi wai jiongna liu na wai jaona liu. Jajimi susi joo. 8 Nasangaii Puang Allataala langiq joo pesapaq. Bongimi namaneq makaleq. Iamo allo mangpenduan.
9 Mangkadai Puang Allataala Nakua, <<La sirempunni lako mesaq ngenan to wai doqna langiq, napajan to makasena.>> Jajimi susi joo. 10 Nasangaii gantanan Puang Allataala joo litak, na ia to nanii sirempun wai, Nasangaii tasik. Melo ngasan Nakita Puang Allataala joo.
11 Mangkada-I Puang Allataala Nakua, <<La cumucuk jiong mai litak to sininna tananan, moi tananan keliseq sola mangrupa-rupa garontoq kaju kembua.>> Jajimi susi joo. 12 Tuomi jiong mai litak to sininna tananan susinna mangrupa-rupa tananan keliseq na mangrupa-rupa garontoq kaju kembua. Melo ngasan Nakita Puang Allataala joo. 13 Bongimi namaneq makaleq. Iamo allo mangpentallun.
14 Mangkada-I Puang Allataala Nakua, <<La den baqtu pira-pira to mangngarrang jao langiq, la mpasisulle masiang na bongi. Iamo tanda wattu dinii rreken allo, taun na pangramean. 15 La mangngarrang jao langiq, naarrangngii tee lino.>> Jajimi susi joo. 16 Napadenmi Puang Allataala to mangngarrang dua matonggo. Ia to laqbi matonggo, mangngarrang ke alloi. Ia to matonggona mesaq, mangngarrang ke bongii. Napaden tooi to sininna bintuin. 17 Na sininna joo Napajaoi langiq la nnarrangngi lino. 18 Iamo Napattantu mangngarrang ke alloi na mangngarrang ke bongii, mpasisulle masiang na malillin. Melo ngasan Nakita Puang Allataala joo. 19 Bongimi namaneq makaleq. Iamo allo mangpennappaq.
20 Mangkada-I Puang Allataala Nakua, <<La ponno to mangrupa-rupa olok-olok siorongan jiong wai, la den too manuk-manuk sitiaran jao langiq.>> 21 Napadenni Puang Allataala joo olok-olok tonggo jiong tasik sola mangrupa-rupa olok-olok jiong wai na mangrupa-rupa manuk-manuk. Melo ngasan Nakita Puang Allataala joo. 22 Nabarakkaqi ngasanni Nakua, <<Membatiq kamuq misabuda-budanna, miponno jiong tasik, na ia to manuk-manuk llan lino la sabuda-budanna.>> 23 Bongimi namaneq makaleq. Iamo joo allo mangpellima.
24 Mangkada-I Puang Allataala Nakua, <<La ponno to mangrupa-rupa olok-olok jao gantanan, susinna olok-olok manaran na olok-olok masiaq, la biccuqna la matonggona.>> Jajimi susi joo. 25 Nakabuaqmi Puang Allataala to mangrupa-rupa olok-olok jao gantanan, olok-olok masiaq na olok-olok manaran, la biccuqna la matonggona. Melo ngasan Nakita Puang Allataala joo.
26 Mangkada-I Puang Allataala Nakua, <<Melo ke ngkabuaq-Kiq tau Tasangrupa, nakuasai tee lino sola issinna, susinna bale jiong tasik, manuk-manuk jao langiq, olok-olok jao gantanan la biccuqna la matonggona na olok-olok manaran.>>c 27 Nakabuaqi Puang Allataala to tau Napasangrupa rupan-Na. Susimi joo naden to muane sola baine.d 28 Nabarakkaqii Puang Allataala Nakuanni, <<Membatiq kamuq misabuda-budanna, miponnoii tee lino, mikuasaii to bale jiong tasik, manuk-manuk jao langiq na olok-olok jao gantanan.>>e
29 Mangkada o-Mi Puang Allataala Nakua, <<Kuben kamuq sininna tananan keliseq sola sininna bua kaju llan lino mipukande. 30 Na ia to sininna makkenyawa laenna to tuo llan lino, susinna manuk-manuk jao langiq na olok-olok jao gantanan, la Kubenni reu sola daun menjaji kandena.>> Jajimi susi joo. 31 Gaja melo ngasan Nakita Puang Allataala joo Napaden. Bongimi namaneq makaleq, iamo allo mangpennannan.