اِسرائيلي قوم را چُونڊيوڙا مِنک
7
اِيئي ݾون پَڇي مھَي چار فريشتا ڌرتي رَي چارون ڏِݾون تي اُڀوڙا ڏيٺا۔ او ڌرتي رَي چارون بائيرون نَي بند ڪرتا پڙيا ڪہ نِي ڌرتي تي، نِي ݾمُوندر تي ھانَ نِي ڪَي بَڻ تي ڪو بائيرو لاگَي۔ 2 پَڇي مھَي ھيڪ فريشتو اُوگوڻَي ݾون ماٿَي آوتو ڏيٺو، جڪَي ڪڍي جيتَي ايشوَر رو ٺَپو ھتو۔ اُوئي زور ݾون اُوئون چار فريشتون نَي ڪھيو جڪون نَي ڌرتي ھانَ ݾمُوندر نَي نُقصون ڏيوَڻ رو اِختيار ھتو ڪہ، 3 ”اُوئي ٽيم توڻي ڌرتي، ݾمُوندر ھانَ بَڻون نَي نُقصون نِي ڏيا، جترِي توڻي مھي آپرَي ايشوَر رَي شيوادارون رَي لِلاڙ تي ٺَپا نِي لگائُون۔“ 4 مھَي ݾُڻيو ڪہ جڪون رَي لِلاڙ تي ايشوَر را ٺَپا لاگا ھتا او ھيڪ لَک چوئيتالي ھزار مِنک ھتا ھانَ او اِسرائيلي قوم رَي ٻارھَي قبيلون ݾون ھتا۔5 ٻارھَي ھزار يھُودا رَي قبيلَي را،
ٻارھَي ھزار روبن رَي قبيلَي را،
ٻارھَي ھزار جد رَي قبيلَي را،
6 ٻارھَي ھزار آشر رَي قبيلَي را،
ٻارھَي ھزار نفتالي رَي قبيلَي را،
ٻارھَي ھزار مُنسي رَي قبيلَي را،
7 ٻارھَي ھزار شمعُون رَي قبيلَي را،
ٻارھَي ھزار لاوِي رَي قبيلَي را،
ٻارھَي ھزار اشڪار رَي قبيلَي را،
8 ٻارھَي ھزار زبولُون رَي قبيلَي را،
ٻارھَي ھزار يُوسف رَي قبيلَي را
ھانَ ٻارھَي ھزار بنيامين رَي قبيلَي را ھتا۔
پُورِي دُنيا را چُونڊيوڙا مِنک
9 اِيئي ݾون پَڇي مھَي مِنکون رو موٽو ٽولو ڏيٺو جڪون نَي گِڻڻ ڏُکيو ھتو۔ اِيئي ٽولَي ۾ ھر ھيڪ قوم، ھر ھيڪ قبيلو، ھر ھيڪ ذات، ھر ھيڪ ٻولي را مِنک ھتا۔ اِيئون را آڇا جُبا پيريوڙا ھتا ھانَ او تخت ھانَ گھيٽَي آگھي اُڀا ھتا۔ اِيئون رَي ھاٿون ۾ کجِي رَي ٽاݪَي ھتَي 10 ھانَ او زور ݾون ڪيتا پڙيا ڪہ،”مُگتي، تخت تي ٻيٺوڙَي آپڻَي ايشوَر ھانَ گھيٽَي رَي طرفون ھَي۔“ 11 ݾجائِي فريشتا اُوئي تخت، اَگووڻون ھانَ چارون جيوَو رَي چوڌاري اُڀوڙا ھتا۔ پَڇي اُوئون تخت آگھي موڏَي توڻي نِمي ايشوَر آگھي آپرا شيش نِمايا 12 ھانَ ڪھيو ڪہ، ”آمين۔ آپڻَي ايشوَر رِي بکوڻ، مھما، ݾمجھ، شُڪر، عِزت، قُدرت ھانَ طاقت ھميشا ھوتِي رَي۔ آمين۔“
13 پَڇي اُوئون اَگووڻون ۾ ھيڪَي مھَي ݾون پُوڇو ڪہ،”اَي آڇا جُبا پيريوڙا مِنک ڪُڻ ھَي ھانَ ڪيٿ ݾون آيا ھَي؟“ 14 اِيئي تي مھَي بݪتِي ڏينِي ڪہ،”اي مالڪ، ٿونَي خبر ھوشَي۔“ پَڇي اُوئي مھنَي ڪھيو ڪہ،”اَي اوج مِنک ھَي جڪو تموم گھڻا ڏُک ھانَ مُصيبتون برداش ڪري آيا ھَي ھانَ آپرا گاڀا گھيٽَي رَي لوئِي ݾون ڌوئي آڇا ڪيئا ھَي۔
15 اِيئي رَي ڪري اَي ايشوَر رَي تخت آگھي اُڀا رَي ھَي
ھانَ ڏِن رات اُوئي رَي گھر ۾ اُوئي رِي ڀگتي ڪرتا رَي ھَي۔
جڪو تخت تي ٻيٺو ھَي او اِيئون رِي ݾنڀال ڪرشَي۔
16 اِيئي ݾون پَڇي نَڪو ڪڏي اِيئون نَي بُوک لاگَي، نَڪو تِرݾ لاگَي
ھانَ نَڪو تِݪڪو لاگَي ھانَ نَڪو ڪڏي اِيئون نَي گرمي لاگَي،
17 ڪيونڪہ جڪو گھيٽو بِچ آݪَي تخت تي ٻيٺو ھَي، او اِيئون رو ڌراڙ ھوشَي
ھانَ اِيئون نَي اَمر جيوَن رَي پوڻي ڪڍي لي جاشَي۔
ايشوَر اِيئون رَي اونکيون را ݾجائِي اَنݾُو لُوئي آڇا ڪرشَي۔“