6
جِترا ڀِي وِشواسي غُلومي ۾ ڦاٿوڙا ھَي، او آپرَي مالڪ رِي تموم گھڻِي عِزت ڪرَي ڪہ ايشوَر رَي نون رِي ھانَ آپڻَي ݾيکايوڙَي باتون رِي بدنومي نِي ھووَي۔ 2 جڪَي وِشواسي غُلوم را مالڪ ڀِي وِشواسي ھَي او اِيئون نِي ݾمجَھي ڪہ آپرَي مالڪ رِي وڌيڪ عِزت ڪرڻ رِي ضرُوري ڪونھي ڪيونڪہ مھي اُوئي را وِشواسي ڀائي ھون پڻ او مالڪ رِي اَي ݾوچي وڌيڪ شيوا ڪرَي ڪہ اُوئون ݾون فائدو ليوَڻ آݪا وِشواسي ھانَ پيارا ڀائي ھَي۔تُو اَي ݾجَي باتون مِنکون نَي ݾيکا ھانَ ھدايت ڪر۔ 3 جي ڪُڻ مِنک آپڻَي پرڀُو يسُوع مَسيح رَي صحيح باتون ھانَ وِشواس رَي بارَي ۾ ݾيکايوڙَي باتون ڪونھي منتو پڻ ڪُوڙَي باتون ݾيکاوَي ھَي، 4 تو او مگرُور ھَي ھانَ اُوئي نَي ڪو ڀِي خبر ڪونھي۔ اُوئي رِي بَحث ڪرڻ ھانَ ھر بات ۾ جھيڙو ڪرڻ رِي عادت ھَي۔ اِيئون باتون ݾون ݾاݪ، جھيڙا، گِلا ھانَ شَڪ پيدا ھووَي ھَي۔ 5 اھڙَي مِنکون ۾ ھميشا جھيڙو رَي ھَي ھانَ اُوئون رو عقل بِگڙي جاوَي ھَي ھانَ اُوئون ۾ ڪو ڀِي ݾاچ ڪونھي ريتو۔ او اَي ݾمجَھي ھَي ڪہ نيڪِي ݾون بيوَڻ ۾ مالِي فائدو ھوشَي۔
6 بيشڪ نيڪِي ݾون بيوَڻ رو تموم گھڻو فائدو ھَي پڻ شرط اَي ھَي ڪہ اِنسون ڪڍي جڪو ڪئين ھَي او اُوئي ۾ خُوش رَي۔ 7 ڪيونڪہ آپي جگت ۾ کالِي ھاٿ آيا ھون ھانَ کالِي ھاٿ پاڇا جاشون۔ 8 جي آپون ڪڍي رُگو ٻاٽِي ھانَ گاڀا ھَي، تو اُوئي ۾ خُوش رون۔ 9 پڻ جڪو مِنک شاھُوڪار ھوئڻ رو ݾوچَي ھَي، تو او آزمُوتَي ۾ پڙَي ھَي ھانَ تموم گھڻَي بي ݾمجھ ھانَ نُقصون آݪَي خواھشون رَي جاݪ ۾ ڦاݾَي ھَي جڪو مِنکون نَي ݾَڦا تباھ ھانَ برباد ڪري ڇوڙَي ھَي۔ 10 ڪيونڪہ ڌن ݾون پريم ڪرڻ ھر نمُونَي رِي بُڇڙائي رِي پاݪ ھَي۔ ڪئينڪہ مِنک ڌن رِي خواھش ۾ پڙي وِشواس ݾون ڦِري جاوَي ھَي ھانَ ھر نمُونَي رَي ڏُکون ۾ ڦاݾي جاوَي ھَي۔
تيمٿيس رَي ݾارُو ھدايت
11 اي ايشوَر را شيواداري، تُو اِيئون باتون ݾون پرھو ناݾ ھانَ ݾاچ، نيڪِي، وِشواس، پريم، صبر ھانَ نِرملائي رِي اُميد راک۔ 12 وِشواس رِي جنگ ݾُٺَي نمُونَي بِڙھ ھانَ اُوئي اَمر جيوَن نَي ڪاٻُو ڪر جڪَي رَي ڪري تُو اَڻايوڙو ھَي ھانَ تموم گھڻَي گواھون رَي رُوبرو وِشواس راکيو ھتو۔ 13 ايشوَر جڪو ݾجون نَي زندگِي ڏَي ھَي ھانَ مَسيح يسُوع جڪَي پينطُس پِلاطُس رَي ݾومھو آپرَي بارَي ۾ ڪيئوڙَي باتون منئَي، ھُون او باتون گواھ راکي ٿنَي حُڪم ڏيئون ھون ڪہ، 14 تُو آپڻَي پرڀُو يسُوع مَسيح رَي پاڇَي آوڻ توڻي ايشوَر رَي حُڪم تي بي عيب ھانَ بي الزوم ھوئي بيتو رَي۔ 15 ايشوَر جڪو تموم گھڻو برڪت آݪو ھانَ ھيڪج حاڪم ھَي ھانَ او جڪو بادشاھون رو بادشاھ ھانَ پرڀُوئون رو پرڀُو ھَي، اوج آپرَي راکيوڙَي ٽيم تي مَسيح نَي ظاھر ڪرشَي۔ 16 رُگو اوج شرُوع ݾون ھميشا توڻي ريشَي، او اُوئي اُجاݪَي ۾ رَي ھَي جيٿ ڪو ڀِي پُگي ڪونھي ݾگھتو۔ نَڪو ڪَي اُوئي نَي ڏيٺو ھَي ھانَ نَڪو ڪُڻ اُوئي نَي جوئي ݾگھتو۔ اُوئي رِي عِزت ھانَ بادشاھي ھميشا ھوتِي رَي۔ آمين۔
17 جڪو وِشواسي اِيئي جگت ۾ شاھُوڪار ھَي اُوئون نَي حُڪم ڏي ڪہ او مگرُور نِي ھووَي، او مِٽڻ آݪَي ڌن تي نا، پڻ ايشوَر تي اُميد راکَي جڪو آپون نَي ݾجَي شيون تموم گھڻَي ڏَي ھَي ڪہ آپي خُوش رون۔ 18 اُوئون نَي حُڪم ڏي ڪہ او نيڪِي ڪرَي، ݾُٺا ڪوم ڪري شاھُوڪار ھووَي، سخِي ھووَي ھانَ ٻيجون رِي مدد ڪرڻ رَي ݾارُو تيار رَي۔ 19 اِيئي نمُونَي او آوڻ آݪَي ٽيم رَي ݾارُو اھڙو ڌن ڀيڙو ڪرشَي جڪَي رو بُنياد پڪو ريشَي، جڪَي تي اُڀي او حقيقي زندگِي تي پڪا رئي ݾگھشَي۔
20 اي تيمٿيس خُوشِي رِي خبر رِي اِمونت جڪو ٿارَي حوالي ڪيئوڙِي ھَي اُوئي رِي ݾنڀال ڪر۔ اجايو بَڪ بَڪ ھانَ مُخالفت آݪَي باتون ݾون بَچ جڪون نَي مِنک گيونَ ݾمجَھي ھَي۔ 21 ڪئينڪہ مِنک آپرو آپنَي اھڙَي گيونَ ۾ ھوشيار ݾمجَھي ھَي ھانَ وِشواس رَي صحيح مارگ ݾون ڦِري گيا ھَي۔
ٿون ݾجون تي ايشوَر رِي ڪِرپا ھوتِي رَي۔