ايشوَر ݾون اِنصاف رَي ݾارُو پراٿنا
دائُود بادشاھ، اَي ڀجن ڪُوش بنياميني رَي باتون رَي ڪري گايو۔
7
اي پرميشوَر مھارا ايشوَر، تُو مھارِي پناھ ھَي۔ݾجا جڪو مھارَي لاري لاگوڙا ھَي اُوئون ݾون مھنَي بچا ھانَ مھنَي ڇوڙا۔
2 اِيئون نِي ھووَي ڪہ او بگڙ ھوئي آوَي ھانَ مھنَي جھالَي
ھانَ چيري ڦاڙي ٽُڪڙا ٽُڪڙا ڪري ڇوڙَي۔
جي اِيئون ھويو تو ٻيجو ڪو ڀِي مھارو بچاوڻ آݪو ڪونھي ھووَي۔
3 اي پرميشوَر مھارا ايشوَر، جي مھارَي ھاٿون ݾون ڪَي ݾون ظُلم ھويو ھَي۔
4 ھانَ جي ڪَي دوست ݾون ڀلائي رَي بدلَي ڪو بُڇڙائي ھوئِي ھَي
ھانَ جي اُوئي نَي ڀلائي ڪري ڪونھي بچايو۔
5 تو ڀلي دُشمن مھارَي لاري لاري آوَي ھانَ مھنَي جھالَي۔
ھاوي، او آوَي ھانَ مھارِي زندگِي
ھانَ مھارِي عِزت نَي مٽِي ۾ مِلاوَي۔ (سِلاھ)
6 اي پرميشوَر، تُو آپرِي ريݾ ۾ اُٺ
ھانَ آپرَي ڪھر ۾ مھارَي دُشمنون رَي ݾومھو ھو۔
ھانَ مھارَي ݾارُو جاگ۔
ٿَي تو اِنصاف رو حُڪم
ڏي ڇوڙيو ھَي۔
7 اي ايشوَر، چارئي پاݾَي رَي تموم گھڻَي قومون ٿَي ڪڍي آوَي
ھانَ تُو اُوئون ماٿَي آڪاش ݾون آپرو حُڪم ھلا۔
8 پرميشوَر قومون رو اِنصاف ڪرَي ھَي۔
اي پرميشوَر، تُو ݾچائي ݾون مھارو اِنصاف ڪر۔
9 تُو بُڇڙون رِي بُڇڙائي نَي مِٽائي ڇوڙ،
ݾاچون رِي ݾچائي نَي پڪا راک۔
اي ݾاچا ايشوَر،
تُو دِل ھانَ دِماگ نَي اوݪکَي ھَي۔
10 ايشوَر تُو مھارو ٻلھ ھَي،
جڪو ݾاچَي من نَي اوݪکَي ھَي۔
11 ايشوَر تُو ݾچائي ݾون اِنصاف ڪرڻ آݪو ھَي۔
ھاوي، تُو اھڙو ايشوَر ھَي جڪو بُڇڙون نَي ھروز ريݾ بتاوَي ھَي۔
12 پڻ جي بُڇڙون آپرِي بُڇڙائي نِي ڇوڙِي،
تو او آپرِي تلوار نَي تِکِي ڪرشَي
ھانَ تير ڪموڻ نَي ڇِڪي تيار اُڀو ريشَي۔
13 او آپرَي تيرون نَي باݾڏي رِي جھاݪ ڪري ڇوڙشَي،
ھاوي، او بُڇڙون رَي ݾارُو موت رو سيمون ھوشَي۔
14 جوئو، پاپي مِنکون ݾون بُڇڙائي ڪيڪر تو، اُلٽِي آݪِي ڪار نڪرَي ھَي،
پڻ او بُڇڙائي ݾون پڪيجا را،
ھانَ اُوئون ۾ ڪُوڙ جنم ليئو۔
15 او ٻيجون رَي ݾارُو اُونڏَي کڏون کوترَي ھَي،
ھانَ جڪو کڏ اُوئون کوتري ھتِي،
آپج اُوئي ۾ کِريا۔
16 او آپرَي حرڪتون ۾ کرشَي۔
ھانَ اُوئون رو ظُلم اُوئون رَي موڏَي تي
پاڇو آئي لاگشَي۔
17 پڻ اي مھارا پرميشوَر، ھُون ٿارِي مرضِي ݾون ٿارو شُڪر ڪرتو رئين
ھانَ ھُون مھانَ ايشوَر نون رِي ھر ٽيم بڏائي ڪرتو رئين۔