ڏُکون ۾ مدد رَي ݾارُو ايشوَر نَي پُڪار
اُستاد ھانَ گاوڻ آݪون رَي ݾارُو دائُود رو ڀجن
6
اي پرميشوَر، تُو مھنَي آپرِي ريݾ ۾ نِي ڇينڀھانَ نِي مھنَي آپرِي ريݾ ۾ ڪو گھڻِي سيکت ڏي۔
2 اي پرميشوَر، مھَي تي دايا ڪر ڪيونڪہ ھُون بي ھِمٿو ھوئي گيو ھون۔
اي پرميشوَر، تُو مھنَي ݾاجو ݾُورو راک،
ڪيونڪہ مھارَي ھاڏکيون ۾ ݾاݾ ھائِي ڪونھي۔
3 مھارو ڏيل ڀِي تموم گھڻو تڙپَي ھَي۔
ھانَ تُو اي مھارا پرميشوَر ڪترِي توڻي؟
4 اي پرميشوَر، مھَي تي دايا ڪر ھانَ مھارِي جان نَي بچا،
تُو آپرِي دايا رَي ڪري مھَي تي ڪِرپا ڪر۔
5 ڪيونڪہ مرڻ ݾون پَڇي ڪو ڀِي ٿنَي ياد ڪونھي ڪرَي۔
جِي ھاوي، ڪُڻ مُڪوم ۾ ٿارِي بڏائي ڪرشَي۔
6 ھُون ݾُڏڪا ڀري ڀري ٿڪو رو۔
ھروز رات رو روئي روئي مھارو بِڇوڻو اَݾوئون ݾون ڀيني جاوَي ھَي۔
7 ڏُکون ۾ روئي روئي مھارَي اونکَي اُونڏَي گئِي رَي
ھانَ مھارَي ݾجون دُشمنون رَي ڪري،
او دُنڌلاوڻ لاگَي ھَي۔
8 اي ݾجَي بُڇڙون، ٿي مھارَي اونکيون ݾون ٽَݪي جائو۔
ڪيونڪہ پرميشوَر مھارَي روئڻ رِي مِنٿ ݾُڻي رِي۔
9 پرميشوَر مھارِي مِنٿ ݾُڻي رِي۔
پرميشوَر مھارِي پراٿنا ݾُڻي رِي۔
10 مھارا ݾجا دُشمن خراب ھانَ خوار ھوشَي۔
او پاڇا جاشَي،
ھانَ او ٻيئاجي خوار ھوئي ھٽي جاشَي۔