رُکاݪِي رِي پراٿنا
اُستاد ھانَ گاوڻ آݪون رَي ݾارُو دائُود رو ڀجن
5
اي پرميشوَر مھارَي باتون تي ڪونَ ڏي،ھانَ مھارَي من رَي ݾُڏڪون نَي ݾُڻ۔
2 اي مھارا بادشاھ، اي مھارا ايشوَر،
مھارِي مِنٿ رَي ھيلَي نَي ݾُڻ۔
3 اي مھارا پرميشوَر، تُو ݾاڪݪي پور رو مھارَي ھيلَي نَي ݾُڻَي ھَي۔
ھُون ݾاڪݪي پور رو ٿَي ݾون پراٿنا ڪري
اُوئي رِي بݪتِي رو اِنتظار ڪرين۔
4 ڪيونڪہ تُو اھڙو ايشوَر ھَي،
جڪو بُڇڙائي ݾون خُوش ڪونھي،
پڻ بُڇڙا مِنک ٿارَي پاݾَي ۾ ڀِي آئي ڪونھي ݾگھَي۔
5 پاپي مِنک ٿارَي آگھي اُڀي ڪونھي ݾگھَي۔
اي مھارا ايشوَر، ٿنَي بُڇڙائي ݾون نفرت ھَي۔
6 او جڪو ڪُوڙ ٻولَي ھَي،
تُو اُوئون نَي مِٽائي ڇوڙِي۔
ايشوَر نَي خُونِي ھانَ دوکو ڏيوَڻ آݪَي مِنک ݾون تموم گھڻِي نفرت ھَي۔
7 پڻ اي مھارا ايشوَر،
ھُون ٿارِي گھڻِي ڪِرپا رَي ڪري ٿارَي گھر ۾ آئين۔
ھُون ٿارِي عِزت ڪري،
ٿارَي پويتر ايشوَر رَي گھر ڏيݾا مونڏو ڪري
اُوئي نَي نمسڪار ڪرين۔
8 اي مھارا پرميشوَر، مھارا دُشمن تموم گھڻا ھويا را،
اِيئي رَي ڪري تُو مھارِي اَگووڻِي ڪر۔
9 ڪيونڪہ اُوئون رَي موڏَي ۾ ڪو ڀِي ݾاچِي بات ڪونھي نڪرتِي،
ھانَ او رُگو ٺٺولَي ڪرتا رَي ھَي۔
اُوئون رَي ڪيئوڙَي باتون ٻيجون رَي ݾارُو موت ھَي۔
10 اي مھارا ايشوَر، تُو اُوئون نَي ڏوھي ڪر
تو او آپرَي باتون ۾ ڦاݾي برباد ھوئي جاوَي۔
ايشوَر تُو اُوئون نَي اُوئون رَي پاپون رَي ڪري گيݾلي ٻاھر نوکي ڇوڙ،
ڪيونڪہ اُوئون ٿارِي نافرمونِي ڪِي ھَي۔
11 پڻ او جڪو ٿَي تي وِشواس راکَي ھَي،
او ݾجا خُوش ھانَ آباد ريشَي۔
او ھر ٽيم خُوشِي ݾون ٿارا گُڻ گاوتا ريشَي۔
ھانَ جڪو ٿَي ݾون پريم ڪرَي ھَي ٿَي ۾ خُوش رَي۔
12 اي پرميشوَر، تُو ݾاچَي مِنک نَي آشيرواد ڏئِي۔
ھانَ تُو آپرِي دايا رِي ڍال ݾون اُوئون نَي بچاوتو رئِي۔