ايشوَر رو چُونڊيوڙو بادشاھ
2
ڌاريا مِنک ڪيئون بگاوت ڪرَي ھَي؟او ڪيئون اجائَي باتون ٺاوَي ھَي؟
2 پرميشوَر رَي خلاف ھانَ اُوئي رَي چُونڊيوڙَي مَسيح رَي خلاف،
دُنيا را بادشاھ اُڀا ھويا ھَي
ھانَ او آپت ۾ صلاح ڪري ڪَي ھَي ڪہ،
3 ”آئو تو آپي اُوئون رَي ݾونڪڙون توڙي آزاد ھوئون
ھانَ اُوئون رَي رنڍوڙَي کولي اݪگَي نوکي ڇوڙون۔“
4 او جڪو آڪاش تي ھَي اُوئون تي ھاݾَي ھَي۔
پرميشوَر اُوئون تي ٺٺولَي ڪرشَي۔
5 پَڇي او اُوئون نَي ريݾ ۾ ڇينڀَي ھَي۔
ھانَ او آپرِي گھڻِي ريݾ ۾ اُوئون نِي پريشون ڪرَي ھَي۔
6 پرميشوَر ڪَي ھَي ڪہ،
”مھَي آپ، آپرَي بادشاھ نَي پويتر صيئون رَي جبل ݾون چُونڊيو ھَي۔“
7 اِيئي تي بادشاھ ڪھيو ڪہ،
”پرميشوَر مھَي ݾون اَي واعدو ڪيئو ھَي ڪہ،
تُو مھارو ڏيڪرو ھَي
ھانَ ھُون ٿارو پِتا ھون۔“
8 تُو مھَي ݾون مونگ تو ھُون
ݾجَي قومون ٿارَي حوالي ڪرين،
ھانَ ݾجِي ڌرتي رو ݾجو ڪئينڪہ ٿنَي ڏئين۔
9 تُو اُوئي تي لوھ رِي بادشاھي رِي گيڏِي ݾون حڪُومت ڪرِي،
تُو اُوئي نَي مٽِي رَي ٺيڪرون آݪِي ڪار،
ڀونگي ڀور ڀور ڪري ڇوڙين۔“
10 اِيئي رَي ڪري اي بادشاھون، ٿي ݾمجھي جائو،
ھانَ اي دُنيا تي حڪُومت ڪرڻ آݪون ٿي ڀِي ݾمجھ راکو۔
11 ٿي پرميشوَر رَي ٻِي ۾ اُوئي رِي ڀگتي ڪرو،
ھانَ اُوئي رَي نون رَي خُوشَي ڪرو۔
12 ايشوَر رَي ڏيڪرَي نَي ميٺکَي ڏيئو۔
اِيئون نِي ھووَي ڪہ او ريݾ ۾ آوَي،
ھانَ ٿونَي مارگ مَئيج ماري ڇوڙَي،
ڪيونڪہ ھمَي اُوئي نَي ريݾ بيگِي آوڻ آݪِي ھَي۔
بڌائي ھووَي اُوئي نَي جڪون ݾجون رو وِشواس اُوئي تي ھَي۔