زبُور 1

ݾاچَي مِنک رو مارگ

ڌن ھَي او مِنک،

جڪو بُڇڙون رِي صلاح تي ڪونھي بيتو

ھانَ او ڏوھي مِنکون رَي مارگ تي ڪونھي اُڀتو،

او ٺٺولَي ڪرڻ آݪون رِي ڪچيرِي ۾ ڪونھي ٻيݾتو۔

‏2 پڻ ايشوَر رَي حُڪمون تي بيوَڻ ݾون اُوئي نَي خُوشِي ملَي ھَي

ھانَ اُوئي رو ايشوَر رَي حُڪمون تي ڏِن رات ڌھيون رَي ھَي۔

‏3 او اُوئي بَڻ آݪِي ڪار ھوشَي جڪو دريا رَي ڪپ تي لاگوڙو ھَي،

جڪو آپرَي ٽيم تي ڦل ڏَي ھَي،

ھانَ اُوئي را پونَ ڪڏي ڀِي ڪونھي ڪُوماٽيجتا۔

جڪو ڪئينڪہ او ڪرشَي اُوئي ۾ او ڪامياب ھوشَي۔

‏4 پڻ بُڇڙون رو حال اھڙو ڪونھي،

او بوھ آݪِي ڪار ھَي جڪون نَي بائيرو اُڏائي لي جاوَي ھَي۔ ‏5 

بُڇڙا مِنک ايشوَر رِي عدالت ۾ اُڀي ڪونھي ݾگھَي

ھانَ نَڪو پاپي مِنکون نَي ݾاچَي مِنکون رِي ڪچيرِي ۾ ڪو جگھا ملَي۔

‏6 ڪيونڪہ پرميشوَر ݾاچَي مِنکون رِي آپ رُکاݪِي ڪرَي ھَي،

پڻ بُڇڙون رو مارگ برباد ڪرَي ھَي۔