خرُوج 32

اِسرائيلي قوم رو ݾونَي رو ٽوگھڙو ٺاوڻ

(اِستشنا 9‏:6‏-29)

جڏي ݾجَي مِنکون ڏيٺو ڪہ مُوسيٰ جبل ݾون اُترڻ ۾ دير ڪِي ھَي، تو او ھارُون ڪڍي گيا ھانَ اُوئي نَي ڪھيو ڪہ، ”تُو مھورَي ݾارُو ڏيوتا ٺا، جڪو مھورِي اَگووڻِي ڪرَي، ڪيونڪہ مھونَي خبر ڪونھي ڪہ مُوسيٰ جڪو مھونَي مِصر مُلڪ ݾون ڪاڍي لي آيو ھَي، ھمَي او ڪيٿ ھَي؟“ ‏2 ھارُون اُوئون نَي ڪھيو ڪہ، ”ٿونرَي لُگايون، ڏيڪريون ھانَ ڏيڪرون رَي ڪونون ۾ جڪو ڀِي ݾونَي رَي باݪڪَي ھَي، او ڪاڍي مھَي ڪڍي لي آئو۔“ ‏3 اِيئي نمُونَي ݾجائِي مِنک ݾونَي رَي باݪڪَي ڪاڍي اُوئي ڪڍي لي آيا۔ ‏4 ھارُون ݾونَي رَي او باݪڪَي لي اوزارون ݾون گھڙي ٽوگھڙَي رو ھيڪ بُت ٺاھيو۔ مِنک او جوئي ڪيوَڻ لاگا ڪہ، ”اي اِسرائيلي قوم، اَي آپڻو او ڏيوتا ھَي، جڪو آپون نَي مِصر مُلڪ ݾون ڪاڍي لي آيو ھَي۔“ ‏5 پَڇي ھارُون اُوئي بُوتَي رَي ݾارُو ھيڪ ٻَليدون رِي جگھا ٺائِي ھانَ اُوئي ايلون ڪيئو ڪہ، ”ݾووارَي پرميشوَر رو پَرٻ ھوشَي۔“ ‏6 پَڇي ٻيجَي ڏِن ݾاڪݪي تارھي اُوئون ٻاݪڻ آݪو ٻَليدون ھانَ خيريت را ٻَليدون ڪيئا۔ پَڇي ݾجون ڀيڙون ھوئي کاڌو پيئو ھانَ عياشِي ڪرڻ لاگا۔

‏7 پَڇي پرميشوَر مُوسيٰ نَي ڪھيو ڪہ، ”تُو جبل ݾون ھيٺا جا، ڪيونڪہ ٿارا مِنک جڪون نَي تُو مِصر مُلڪ ݾون ڪاڍي لي آيو ھَي، او خراب ھويا را۔ ‏8 او مِنک اُوئي مارگ ݾون جڪَي رو مھَي اُوئون نَي حُڪم ڏينو ھتو، او ڇيڪا ڦِري گيا ھَي، ڪيونڪہ اُوئون آپرَي ݾارُو ݾونَي رو ھيڪ ٽوگھڙو ٺاھيو ھَي ھانَ اُوئي رِي پُوجا ڪري اُوئي رَي ݾارُو ٻَليدون ڪيئا ھَي۔ پَڇي مِنکون ڪھيو ڪہ، ’اي اِسرائيلي قوم، اَي ٿارو او ڏيوتا ھَي، جڪو ٿونَي مُلڪ مِصر ݾون ڪاڍي لي آيو ھَي۔‘“ ‏9 پَڇي پرميشوَر مُوسيٰ نَي ڪھيو ڪہ، ”مھَي ڏيٺو ھَي ڪہ اَي قوم ضدي قوم ھَي۔ ‏10 اِيئي رَي ڪري ھمَي تُو مھارَي بِچ ۾ نِي آ، ڪيونڪہ مھنَي اُوئون تي تموم گھڻِي ريݾ ھَي، اِيئي رَي ڪري ھُون اُوئون تي آپرو ڪھر ميلين ھانَ اُوئون نَي مِٽائي ڇوڙين۔ پڻ ھُون ٿنَي ھيڪ موٽِي قوم ٺائين۔“ ‏11 اِيئي تي مُوسيٰ پرميشوَر آپرَي ايشوَر نَي مِنٿ ڪري ڪھيو ڪہ، ”اي پرميشوَر تُو آپرِي قوم تي ريݾ ڪيئون ڪرَي ھَي، جڪون نَي تُو آپرِي موٽِي قُدرت ھانَ آپرَي طاقت آݪَي ھاٿ ݾون مِصر مُلڪ ݾون ڪاڍي لي آيو ھَي؟ ‏12 مِصري قوم آݪا اِيئون نِي ڪَي ڪہ تُو اِسرائيلي قوم نَي دوکو ڏي ايٿ لي آيو ھَي ڪہ تُو اُوئون نَي جبلون ۾ ماري ڇوڙَي ھانَ اُوئون نَي ݾجِي ڌرتي ݾون مِٽائي ڇوڙَي؟ اِيئي رَي ڪري تُو دايا ڪري آپرو ڪھر نِي ميل ھانَ آپرَي مِنکون نَي ختم ڪرڻ رو خيال ڦِٽو ڪر۔ ‏13 تُو آپرَي ٻونھون اڀراھيم، اضحاق ھانَ يعقُوب نَي ياد ڪر، جڪون ݾون ٿَي آپرو ݾونݾ لي اَي ڪھيو ھتو ڪہ، ’ھُون ٿونرِي نسل نَي آڪاش رَي تارون جِترا بڌائين ھانَ اَي ݾجون مُلڪ جڪَي رو مھَي واعدو ڪيئو ھَي، ٿونرِي نسل نَي ڏئين ڪہ او ھميشا اُوئي مُلڪ را بارݾ ھووَي۔‘“ ‏14 اِيئي تي پرميشوَر اِسرائيلي قوم نَي مِٽاوڻ رو خيال ڦِٽو ڪيئو، جون اُوئي ڪھيو ھتو ڪہ ھُون آپرَي مِنکون نَي مِٽائي ڇوڙين۔

مُوسيٰ رِي اِسرائيلي قوم تي ريݾ

‏15 پَڇي مُوسيٰ ايشوَر رَي حُڪمون رَي ٻيئي تڪتَي جڪون رَي ٻيئون پاݾَي لِکيوڙو ھتو، آپرَي ھاٿون ۾ لي جبل ݾون ھيٺو اُتريو۔ ‏16 او ٻيئي تڪتَي ايشوَر رَي ٺاھيوڙَي ھتَي ھانَ اُوئون تي جڪو ڀِي لِکيوڙو ھتو، او ايشوَر پٿر تي کوتري لِکيو ھتو۔ ‏17 جڏي يشُوع مِنکون رو ھُل ݾُڻيو، تو اُوئي مُوسيٰ نَي ڪھيو ڪہ، ”مِنکون رَي جھيڙَي جھگڙَي رو ھُل ݾُڻيجَي پڙيو۔“ ‏18 اِيئي تي مُوسيٰ ڪھيو ڪہ، ”اَي ھُل نَڪو تو جيتڻ آݪَي نارون رو ھَي، نَڪو تو ھاريجڻ آݪون رو، پڻ مھنَي تو گاوڻ بجاوڻ رو ھاڪو ݾُڻيجَي پڙيو۔“

‏19 جڏي مُوسيٰ تنٻُوئون رَي نيڙو گيو، تو اُوئي ٽوگھڙَي رو بُت ھانَ مِنکون رو ناچڻ ڏيٺو۔ اِيئي تي اُوئي نَي تموم گھڻِي ريݾ آئِي ھانَ او جبل ݾون ھيٺو آيو ھانَ پٿر رَي تڪتَي زمين تي نوکي ڀونگي ڇوڙيئَي۔ ‏20 پَڇي مُوسيٰ اُوئون رو ٺاھيوڙو ٽوگھڙَي آݪو بُت باݾڏي ۾ ٻاݪي ڇوڙيو ھانَ اُوئي نَي ݾِنيو پيݾي پوڻي ۾ مِلايو ھانَ پَڇي او پوڻي اِسرائيلي قوم نَي پياڙيو۔ ‏21 مُوسيٰ، ھارُون نَي ڪھيو ڪہ، ”اِيئون مِنکون ٿَي ݾون ڪِي ڪيئو ھتو، جڪو ٿَي اِيئون نَي اترَي موٽَي پاپ ۾ ڦݾايا ھَي؟“ ‏22 ھارُون ڪھيو ڪہ، ”مھارا مالڪ، مھَي تي ريݾ نِي ڪر، تُو تو اِيئون مِنکون نَي اوݪکَي ھَي ڪہ اَي ھميشا بُڇڙائي ڪرڻ رَي ݾارُو تيار رَي ھَي۔ ‏23 اِيئون مھنَي ڪھيو ھتو ڪہ، ’مھورَي ݾارُو ھيڪ ڏيوتا ٺا، جڪو مھورِي اَگووڻِي ڪرَي، ڪيونڪہ مھونَي خبر ڪونھي ڪہ مُوسيٰ جڪو مھونَي مِصر مُلڪ ݾون ڪاڍي لي آيو ھَي، ھمَي او ڪيٿ ھَي؟‘ ‏24 اِيئي تي مھَي اِيئون نَي ڪھيو ڪہ، ’جڪَي ڪڍي ݾونو ھووَي، او مھَي ڪڍي لي آوَي۔‘ پَڇي اُوئون مھنَي ݾونو ڏينو ھانَ مھَي او باݾڏي ۾ گھاتيو، تو ھيڪ ݾونَي رو ٽوگھڙو نڪري آيو۔“

‏25 جڏي مُوسيٰ ڏيٺو ڪہ مِنک آپَي ݾون ٻاھر ھَي، ڪيونڪہ ھارُون اُوئون نَي کُلِي ڇُوٽ ڏينِي ھتِي ھانَ اِسرائيلي آپرَي دُشمنون آگھي خوار ھويا ھَي، ‏26 تو مُوسيٰ تنٻُوئون رَي ٻاھر اُڀي ڪھيو ڪہ، ”جڪو ڀِي پرميشوَر رَي پاݾَي ھَي، او مھَي ڪڍي آوَي۔“ اِيئي تي لاوِي قبيلَي را ݾجائِي مِنک اُوئي ڪڍي ڀيڙا ھويا۔ ‏27 پَڇي مُوسيٰ اُوئون نَي ڪھيو ڪہ، ”پرميشوَر اِسرائيلي قوم رو ايشوَر اِيئون ڪَي ھَي ڪہ، ’ٿون ۾ ھر ھيڪ آپرَي ڪرڪ ݾون تلوار ٻونڌَي ھانَ ھر ھيڪ در ڦِري ݾجَي تنٻُوئون ۾ آپرَي ڀايون، آپرَي ساٿيون ھانَ آپرَي پاڙَي آݪَي نَي ماري ڇوڙَي۔‘“ ‏28 اِيئي تي لاوِي قبيلَي رَي مِنکون جون مُوسيٰ اُوئون نَي ڪھيو ھتو، اُوئون اِيئوج ڪيئو۔ اُوئي ڏِن مِنکون ۾ اندازن تين ھزار آڏمي ماريجا۔ ‏29 پَڇي مُوسيٰ لاوِي قبيلَي رَي مِنکون نَي ڪھيو ڪہ، ”ٿون آج پرميشوَر رَي ݾارُو آپرو آپنَي ڌار ڪيئا ھَي ھانَ ٿي آپرَي ڏيڪرون ھانَ آپرَي ڀايون رَي خلاف ھويا ھو، اِيئي رَي ڪري آج پرميشوَر ٿونَي برڪت ڏيشَي۔“

مُوسيٰ رِي اِسرائيلي قوم رَي ݾارُو پارت

‏30 ٻيجَي ڏِن مُوسيٰ مِنکون نَي ڪھيو ڪہ، ”ٿون موٽو پاپ ڪيئو ھَي، پڻ تو ڀِي ھُون ھڻون پرميشوَر ڪڍي اُونچا جبل تي جائُون ھون۔ ھوئي ݾگھَي ڪہ ھُون ٿونرَي پاپون رو ايوَزو ڏي ݾگھون۔“ ‏31 پَڇي مُوسيٰ پرميشوَر ڪڍي پاڇو گيو ھانَ ڪيوَڻ لاگو ڪہ، ”مھنَي ڏُک ھَي، اِيئون مِنکون موٽو پاپ ڪيئو ھَي۔ اُوئون آپرَي ݾارُو ݾونَي رو ڏيوتا ٺاھيو ھَي۔ ‏32 ھمَي مھربونِي ڪري جي تُو اِيئون رو پاپ معاف ڪرَي، تو ٺيڪ ھَي، نِي تو مھارو نون اُوئي ڪِتاب ݾون مِٽائي ڇوڙ، جڪَي ۾ ٿَي آپرَي مِنکون را نون لِکيا ھَي۔“ ‏33 پرميشوَر مُوسيٰ نَي ڪھيو ڪہ، ”جڪَي مھارو پاپ ڪيئو ھَي، ھُون اُوئي رو نون آپرَي ڪِتاب ݾون مِٽائي ڇوڙين۔ ‏34 ھمَي تُو جا ھانَ مِنکون نَي اُوئي جگھا تي لي جا، جڪو مھَي ٿنَي بتائِي ھَي۔ جو، مھارو فريشتو ٿارَي آگھي آگھي بيشَي، پڻ ھُون آپرَي راکيوڙَي ڏِن تي اُوئون نَي اُوئون رَي پاپ رِي سزا ڏئين۔“

‏35 پَڇي پرميشوَر، اِسرائيلي قوم تي آپرو ڪھر ميليو، ڪيونڪہ اُوئون ٽوگھڙَي رَي بُت رِي پُوجا ڪِي ھتِي، جڪو اُوئون ھارُون ݾون ٺڙائو ھتو۔