ڏَݾ حُڪم
20
پَڇي ايشوَر اَي ݾجَي باتون ڪري ڪھيو ڪہ، 2 ”ھُونج پرميشوَر ٿونرو ايشوَر ھون، جڪو ٿونَي مِصر مُلڪ رِي غُلومي ݾون ڪاڍي لي آيو ھون۔3 تُو مھَي ݾون ٽاݪ ٻيجَي ڪَي ڀِي ڏيوتا نَي، نِي مَني۔
4 تُو آپرَي ݾارُو ڪو ڀِي مُورتِي نِي ٺائي۔ نَڪو ڪَي شئي رِي صُورت ٺائي۔ جڪو اُونچا آڪاش تي، جون ڌرتي تي جون ڌرتي ھيٺا پوڻي ۾ ھووَي۔ 5 تُو اُوئون آگھي آپرو شيش نِي نِمائي ھانَ نِي اُوئون رِي ڀگتي ڪري، ڪيونڪہ ھُون پرميشوَر ٿارو غيرتِي ايشوَر ھون۔ جڪو مھَي ݾون دُشمنِي راکَي ھَي، ھُون اُوئون رَي ݾجَي اولاد نَي تيجِي ھانَ چوٿِي پيڙھِي توڻي ٻاپ ڏاڏون رَي پاپون رِي سزا ڏيئون ھون۔ 6 پڻ جڪو مھَي ݾون پريم ڪرَي ھَي ھانَ مھارَي حُڪمون تي بَي ھَي، اُوئون تي ھزاري پيڙھيون توڻي دايا ڪرون ھون۔
7 تُو مھارو نون اجايو نِي لئي، ڪيونڪہ ھُون پرميشوَر ٿارو ايشوَر ھون۔ جڪو ڀِي مھارو نون اجايو ليشَي، تو ھُون اُوئي نَي سزا ڏئين۔
8 تُو پويتر ڏِن نَي پويتر ݾمجھي ياد راکي۔ 9 تُو ڇَي ڏِن آپرا ݾجائِي ڪوم ڪري۔ 10 پڻ ݾاتوون ڏِن پرميشوَر ٿارَي ايشوَر رو پويتر ڏِن ھَي، اِيئي رَي ڪري تُو اُوئي ڏِن ڪو ڀِي ڪوم نِي ڪري۔ نِي تُو، نِي ٿارو ڏيڪرو، نِي ٿارِي ڏيڪرِي، نِي ٿارو نوڪر، نِي ٿارِي ٻونھِي، نِي ٿارو جِنار، نِي ڪو پرديسي جڪو ٿَي ڪڍي ريتو ھووَي۔ 11 ڪيونڪہ مھَي پرميشوَر ڇھون ڏِنون ۾ آڪاش، ڌرتي، ݾمُوندر ھانَ جڪو ڪئين اُوئون ۾ ھَي، او ݾجائِي ٺاھيا ھانَ ݾاتوين ڏِن ووندو ھويو۔ اِيئي رَي ڪري مھَي ݾاتوين ڏِن نَي برڪت ڏي اُوئي نَي پويتر ڏِن ٺاھيو ھَي۔
12 تُو آپرَي ما ٻاپ رِي عِزت ڪري ڪہ اُوئي مُلڪ ۾ ٿارِي عُمر موٽِي ھووَي، جڪو ھُون ٿنَي ڏئين۔
13 تُو خُون نِي ڪري۔
14 تُو زنا نِي ڪري۔
15 تُو چورِي نِي ڪري۔
16 تُو ڪيرَي خلاف ڪُوڙِي ݾاک نِي ڀري۔
17 تُو لالچ نِي ڪري، نِي ڪيرَي گھر رو، نِي ڪيرِي لُگائِي رو، نِي ڪيرَي نوڪر رو، نِي ڪيرِي ٻونھِي رو، نِي ڪيرَي ڍگَي جون گڏَي رو، يعني تُو ڪَي ڀِي شئي رِي لالچ نِي ڪري۔“
مِنکون نَي ايشوَر رو ٻِي
18 جڏي ݾجَي مِنکون باڏݪ رو گوڙ ھانَ نَر ݾِينگَي رو باجڻ ݾُڻيو ھانَ کيوَڻ رو چمڪڻ ھانَ جبل ݾون ڌُونئو نڪرتو ڏيٺو، تو او ٻِي ۾ ڏڪڻ لاگا ھانَ جبل ݾون ھٽي اُڀا۔ 19 پَڇي اُوئون مُوسيٰ نَي ڪھيو ڪہ، ”تُوج مھون ݾون باتون ڪرتو ڪر ھانَ مھي ݾُڻتا ريشون، پڻ ايشوَر مھون ݾون باتون نِي ڪرَي، ڪيٿ اِيئون نِي ھووَي ڪہ مھي مري جائُون۔“ 20 مُوسيٰ مِنکون نَي ڪھيو ڪہ، ”ٻيئاجو نِي، ڪيونڪہ ايشوَر اِيئي رَي ڪري آيو ھَي ڪہ او ٿونرو آزمُوتو لَي ھانَ ٿونَي ايشوَر رو ٻِي ھووَي ڪہ ٿي پاپ نِي ڪرو۔“ 21 او مِنک اݪگا اُڀا رھيا ھانَ مُوسيٰ اُوئي ڪاݪَي باڏݪ رَي نيڙو گيو، جيٿ ايشوَر ھتو۔
ٻَليدون رِي جگھا رو حُڪم
22 پَڇي پرميشوَر مُوسيٰ نَي ڪھيو ڪہ، ”تُو اِسرائيلي قوم نَي اَي ڪئي ڪہ ٿون آپ ڏيٺو ڪہ مھَي آڪاش ݾون ٿون ݾون باتون ڪيئَي۔ 23 ٿي مھارِي جگھا ڪَي ٻيجَي ڏيوتا رِي ݾونَي جون چوندِي رِي مُورتِي نِي ٺاھيا ھانَ نِي اُوئي رِي ڀگتي ڪريا۔ 24 ٿي مھارَي ݾارُو مٽِي رِي ھيڪ ٻَليدون رِي جگھا ٺاھيا ھانَ اُوئي تي آپرَي رڍون ٻڪريون ھانَ ڍگَي ڍگون رَي ٻاݪڻ آݪا ٻَليدون ھانَ خيريت را ٻَليدون ڪريا۔ جيٿ ڀِي مھارَي نون رو ٻَليدون ڪيئو جاشَي، ھُون ھر ھيڪ جگھا تي آئي ٿونَي برڪت ڏئين۔ 25 جي ٿي مھارَي ݾارُو پٿر رِي ٻَليدون رِي جگھا ٺائو، تو گھڙيوڙَي پٿر ݾون نِي ٺاھيا، ڪيونڪہ جي ٿونرا اوزار اُوئي پٿر تي لاگشَي، تو ٿي اُوئي ٻَليدون رِي جگھا نَي پليت ڪري ڇوڙشو۔ 26 ٿي ٻَليدون رِي جگھا تي چڙھڻ رَي ݾارُو چاڙھي نِي ٺاھيا، ڪيٿ اِيئون نِي ھووَي ڪہ چاڙھي چڙھتي بِݪا ٿونرِي اُگھاڙ ٻَليدون رِي جگھا تي ڏيکيجَي۔“