يِترو رو مُوسيٰ ݾون مِلڻ
18
مُوسيٰ رو ݾُݾرو يِترو جڪو مديان مُلڪ رو ھيڪ پُوجاري ھتو، جڏي اُوئي نَي ݾجَي باتون رِي خبر پڙِي ڪہ ايشوَر مُوسيٰ ھانَ آپرِي اِسرائيلي قوم رَي ݾارُو ڪِي ڪِي ڪيئو ھَي ھانَ ڪيڪر پرميشوَر اِسرائيلي قوم نَي مِصر مُلڪ ݾون ڪاڍي لي آيو ھَي۔ 2 اِيئي تي يِترو آپرِي ڏيڪرِي يعني مُوسيٰ رِي لُگائِي صفُورا نَي آپ ڀيڙِي لِي، جڪَي نَي مُوسيٰ پيل مائيترون ۾ ميلِي ھتِي۔ 3 اُوئي مُوسيٰ را ٻيئي ڏيڪرا ڀيڙا ليئا۔ مُوسيٰ ھيڪَي ڏيڪرَي رو نون اَي ڪئي جيرسُوم راکيو ھتو ڪہ، ”ھُون پرديس ۾ مُسافر ھون۔“ 4 ٻيجَي ڏيڪرَي رو نون اَي ڪئي اليعزر راکيو ھتو ڪہ، ”مھارَي اَبا رو ايشوَر مھارو مددگار ھويو، ڪيونڪہ اُوئي مھنَي فرعُون بادشاھ رِي تلوار ݾون بچايو۔“ 5 پَڇي يِترو مُوسيٰ رِي لُگائِي ھانَ ٻيئي ڏيڪرا ڀيڙا لي مُوسيٰ ڪڍي اُوئي رڻ پَٽ ۾ گيو، جيٿ ايشوَر رَي جبل رَي نيڙو اُوئي رو تنٻُو لاگوڙو ھتو۔ 6 يِترو مُوسيٰ نَي ڪئي ميليو ڪہ، ”ھُون ٿارو ݾُݾرو يِترو، ٿارِي لُگائِي ھانَ ٿارا ٻي ڏيڪرا ڀيڙا لي ٿَي ڪڍي آيو ھون۔“ 7 اَي ݾُڻي مُوسيٰ آپرَي ݾُݾرَي ݾون مِلڻ رَي ݾارُو ٻاھر نڪريو ھانَ اُوئي آگھي جُھڪي اُوئي نَي ميٺکِي ڏينِي ھانَ او ھيڪَي ٻيجَي ݾون خير خبر پُوڇتا تنٻُو ۾ آيا۔ 8 پَڇي مُوسيٰ آپرَي ݾُݾرَي نَي ݾجو ڪئين ݾُڻايو ڪہ پرميشوَر اِسرائيلي قوم رَي ݾارُو فرعُون بادشاھ ھانَ مِصري قوم ݾون ڪِي ڪيئو ھانَ اِيئون مِنکون تي مارگ ۾ ڪھڙا ڪھڙا ڏُک آيا ھانَ پرميشوَر اُوئون نَي ڪيڪر بچايا ھَي۔ 9 يِترو اَي ݾُڻي تموم گھڻو خُوش ھويو ڪہ پرميشوَر اِسرائيلي قوم رَي ݾارُو موٽا موٽا ڪوم ڪيئا ھانَ اُوئون نَي مِصري قوم رَي ھاٿون ڇوڙايا۔ 10 پَڇي يِترو ڪھيو ڪہ، ”پرميشوَر رِي بڏائي ھووَي، جڪَي ٿونَي مِصري قوم ھانَ فرعُون بادشاھ رِي غُلومي ݾون آزاد ڪرايا۔ 11 ھمَي مھنَي خبر پڙِي ھَي ڪہ پرميشوَر ݾجَي ڏيوتائون ݾون موٽو ھَي۔ اُوئي مِصري قوم ݾون اِيئي رَي ڪري اِيئون ڪيئو، ڪيونڪہ اُوئون مگرُورِي ۾ اِسرائيليون ݾون ݾُٺو سلُوڪ ڪونھي راکيو۔“12 پَڇي يِترو ايشوَر رَي ݾارُو ٻاݪڻ آݪو ٻَليدون ڪيئو ھانَ ڪئين ٻيجا ڀِي ٻَليدون ڪيئا۔ پَڇي ھارُون ھانَ اِسرائيلي قوم را ݾجائِي اَگووڻ مُوسيٰ رَي ݾُݾرَي ڪڍي آيا۔ اُوئون ݾجون ڀيڙا ھوئي ايشوَر رَي ݾارُو ڪيئوڙَي ٻَليدون رِي ٻاٽِي کاڌِي۔
فيصلَي رَي ݾارُو مِنک چُونڊڻ
13 پَڇي ٻيجَي ڏِن مُوسيٰ مِنکون را فيصلا ڪرڻ ٻيٺو ھانَ مِنک اُوئي ڪڍي ݾاڪݪي ݾون لي شام توڻي اُڀا رھيا۔ 14 جڏي مُوسيٰ رَي ݾُݾرَي اَي ݾجو ڪئين ڏيٺو، جڪو او مِنکون رَي ݾارُو ڪرتو، تو اُوئي مُوسيٰ نَي ڪھيو ڪہ، ”تُو ڪيئون آپ ھيکلو ٻيٺو ھَي ھانَ ݾجائِي مِنک ݾاڪݪي ݾون لي شام توڻي ٿَي ڪڍي اُڀا رَي ھَي؟ تُو مِنکون ݾون اِيئون ڪيئون ڪرَي ھَي؟“ 15 مُوسيٰ آپرَي ݾُݾرَي نَي ڪھيو ڪہ، ”مِنک اِيئي رَي ڪري مھَي ڪڍي آوَي ھَي ڪہ او ايشوَر رِي مرضِي پُوڇَي 16 ھانَ جڏي اِيئون ۾ ڪو ڀِي جھيڙو جھگڙو ھووَي، تو او مھَي ڪڍي آوَي ھَي ھانَ ھُون اِيئون را فيصلا ڪرون ھون ھانَ ھُون اِيئون نَي ايشوَر رِي شريعت ھانَ اصُول ݾُڻائُون ھون۔“ 17 اِيئي تي مُوسيٰ رَي ݾُݾرَي اُوئي نَي ڪھيو ڪہ، ”تُو اَي ݾُٺو ڪونھي ڪرتو۔ 18 تُو ھيکلو اِيئون نَي ݾنڀالي ڪونھي ݾگھَي۔ اِيئي نمُونَي تُو ھانَ اَي ݾجائِي جڪو ٿَي ڪڍي آوَي ھَي، پڪ ݾون ٿڪي جاشَي۔ 19 اِيئي رَي ڪري جڪو ھُون ٿنَي صلاح ڏيئون، او ݾُڻ۔ ايشوَر ھميشا ٿَي ڀيڙو ھووَي۔ تُو آپرَي مِنکون رَي ݾارُو ايشوَر ڪڍي گيو ڪر ھانَ اِيئون را ݾجائِي مسئلا ايشوَر نَي ݾُڻايا ڪر۔ 20 تُو اِيئون نَي ايشوَر رِي شريعت ھانَ اصُول ݾيکايا ڪر ھانَ جڪَي مارگ تي اِيئون نَي بيوَڻو ھَي ھانَ جڪو ڪوم اِيئون نَي ڪرڻا ھَي، او ڪوم اِيئون نَي ݾُڻايا ڪر۔ 21 تُو اِيئون مِنکون ۾ اھڙا ڏاھا مِنک چُونڊ، جڪو ايشوَر ݾون ٻيئاجتا ھووَي، ڀروسَي جھڙا ھانَ رشوَت ݾون نفرت ڪرتا ھووَي۔ اُوئون نَي ھزار ھزار، ݾئو ݾئو، پنجاھ پنجاھ ھانَ ڏَݾ ڏَݾ رَي ٽولون ماٿَي اَگووڻ راک۔ 22 اِيئي نمُونَي او اَگووڻ مِنکون را ھر ٽيم فيصلا ڪرتا رَي، پڻ جڏي موٽا فيصلا آوَي، تو او ٿَي ڪڍي لي آوَي ھانَ نِنئي باتون را فيصلا آپ ڪرتا رَي۔ اِيئي نمُونَي او ٿارِي مدد ڪرشَي ھانَ ٿارو بوجھ ڀِي ھلڪو ريشَي۔ 23 جي ايشوَر ڀِي ٿنَي اَي حُڪم ڏَي ڪہ تُو اِيئوج ڪر، تو تُو آپرا ڪوم پُورا ڪري ݾگھِي ھانَ اَي مِنک ڀِي خُوش ھوئي آپرَي گھري جاشَي۔“
24 پَڇي مُوسيٰ آپرَي ݾُݾرَي يِترو رِي بات منِي ھانَ جون اُوئي ڪھيو ھتو، اِيئوج اُوئي ڪيئو۔ 25 پَڇي مُوسيٰ ݾجِي اِسرائيلي قوم ۾ اَگووڻ چُونڊيا ھانَ اُوئون نَي ھزار ھزار، ݾئو ݾئو، پنجاھ پنجاھ ھانَ ڏَݾ ڏَݾ رَي ٽولون ماٿَي راکيا۔ 26 پَڇي اَي مِنک ھر ٽيم آپرَي مِنکون را فيصلا ڪرڻ لاگا۔ او ڏُکيا فيصلا مُوسيٰ ڪڍي لي آوتا، پڻ نِنڪَي باتون را فيصلا آپ ڪرتا۔
27 پَڇي يِترو مُوسيٰ ݾون موڪلائي آپرَي مُلڪ ڏيݾا بُوئو گيو۔