خرُوج 16

آڪاشِي کاڌو من ھانَ ٻَٽيرا

پَڇي ݾجائِي اِسرائيلي ايليم جگھا ݾون بَئير ھويا۔ او مِصر مُلڪ ݾون نڪرڻ ݾون پَڇي ٻيجَي مھيڻَي رِي پنڌرَي تاريخ رو سين رَي رڻ پَٽ ۾ پُگا، جڪو ايليم ھانَ سينا جبل رَي بِچ ۾ ھَي۔ ‏2 اُوئي رڻ پَٽ ۾ اِسرائيلي قوم را ݾجائِي مِنک مُوسيٰ ھانَ ھارُون تي ڪُرڪڻ لاگا۔ ‏3 او ڪيوَڻ لاگا ڪہ، ”اِيئي ݾون ڀلو ھتو ڪہ پرميشوَر مھونَي مِصر مُلڪ ۾ ماري ڇوڙون تو، جڏي مھي موݾ رَي ديگڙون رَي پاݾَي ۾ ٻيݾي ڍئو ڪري ٻاٽِي کاوتا، پڻ ٿي مھونَي اِيئي رڻ پَٽ ۾ بُوکي مارڻ لي آيا ھو۔“

‏4 پَڇي پرميشوَر مُوسيٰ نَي ڪھيو ڪہ، ”ھُون آڪاش ݾون ٿونرَي ݾارُو ڌون جھڙو کاڌو برݾائين۔ اِيئي رَي ڪري ݾجائِي مِنک ھروز ٻاھر جائي آپرِي ضرُورت تي رُگو ھيڪَي ڏِن رو حِصو ڀيڙو ڪرَي۔ اِيئي نمُونَي ھُون اُوئون رو آزمُوتو ڪرين ڪہ او مھارِي بات منَي ھَي، جون نا۔ ‏5 ھر ھفتَي رَي ڇَوين ڏِن يعني جِمَي رو، او جِترو ھروز ڀيڙو ڪرشَي اُوئي ݾون وڌيڪ ڌون لي آوَي ھانَ رونڌَي۔“

‏6 پَڇي مُوسيٰ ھانَ ھارُون ݾجِي اِسرائيلي قوم نَي ڪھيو ڪہ، ”آج شام ٿونَي خبر پڙشَي ڪہ او پرميشوَر ھَي، جڪو ٿونَي مِصر مُلڪ ݾون ڪاڍي لي آيو ھَي۔ ‏7 ݾاڪݪي تارھي ٿي پرميشوَر رِي قُدرت ڏيکشو۔ پرميشوَر ٿونرو ڪُرڪڻ ݾُڻَي ھَي، حقيقت ۾ ٿي مھون تي نا، پڻ پرميشوَر تي ڪُرڪو ھو۔ ‏8 تو ڀِي پرميشوَر ٿونَي کاوڻ رَي ݾارُو شام رو موݾ ھانَ ݾاڪݪي رو ٻاٽِي ڏيشَي ڪہ ٿي ڍئو ڪري ٻاٽِي کائي ݾگھو۔ اِيئي رَي ڪري ٿي مھورَي خلاف نا، پڻ پرميشوَر رَي خلاف ڪُرڪو ھو ھانَ پرميشوَر ٿونرو ڪُرڪڻ ݾُڻيو ھَي۔“

‏9 پَڇي مُوسيٰ ھارُون نَي ڪھيو ڪہ، ”تُو ݾجِي اِسرائيلي قوم نَي ݾُڻا ڪہ پرميشوَر ٿونَي اَڻايا ھَي، ڪيونڪہ اُوئي ٿونرو ڪُرڪڻ ݾُڻيو ھَي، اِيئي رَي ڪري ٿي اُوئي رِي بات ݾُڻو۔“ ‏10 جڏي ھارُون ݾجَي اِسرائيليون ݾون اَي باتون ڪرتو پڙيو، تو اُوئون ݾجون رڻ پَٽ ڏيݾا جويو، تو اُوئون نَي پرميشوَر رو اُجاݪو باڏݪ ۾ ڏيکيجڻ ۾ آيو۔ ‏11 پَڇي پرميشوَر مُوسيٰ نَي ڪھيو ڪہ، ‏12 ”مھَي اِسرائيلي قوم رو ڪُرڪڻ ݾُڻيو ھَي۔ اِيئي رَي ڪري تُو اُوئون نَي ڪَي ڪہ ٿي شام رو موݾ ھانَ ݾاڪݪي رو ڍئو ڪري ٻاٽِي کاشو ھانَ ٿونَي خبر پڙشَي ڪہ ھُون پرميشوَر ٿونرو ايشوَر ھون۔“

‏13 پَڇي اِيئون ھويو ڪہ شام رو ٻَٽيرون رو ولر آيو، جڪَي ݾون تنٻُو ڍڪيجي گيا ھانَ ݾاڪݪي تارھي تنٻُوئون رَي چوڌاري ماڪ پڙيوڙِي ھتِي۔ ‏14 جڏي او ماڪ اُڏِي، تو اُوئون ڏيٺو ڪہ نِنڪِي گول شئي ڌرتي تي پڙِي ھَي، جڪو نِنئي گَڙون جھڙِي ھتِي۔ ‏15 او ڏيکي اِسرائيلي آپت ۾ ڪيوَڻ لاگا ڪہ، من؟ جڪَي رو مطلب ھَي، ”اَي ڪِي ھَي؟“ ڪيونڪہ اُوئون نَي خبر ڪونھي ھتِي ڪہ اَي ڪِي ھَي۔

اِيئي تي مُوسيٰ اُوئون نَي ڪھيو ڪہ، ”اَي اوج ڌون ھَي، جڪو پرميشوَر ٿونَي کاوڻ رَي ݾارُو ڏينو ھَي۔ ‏16 اِيئي رَي ڪري پرميشوَر رو حُڪم اَي ھَي ڪہ، ’ٿي آپرَي آپرَي خاندان رِي ضرُورت تي ھر ھيڪ رَي ݾارُو ھيڪ اومر يعني ٻي ݾير من ڀيڙو ڪرَي ھانَ ھر ھيڪ اِترو ڀيڙو ڪرَي، جِترا اُوئي رَي تنٻُو ۾ مِنک رَي ھَي۔‘“ ‏17 پَڇي اِسرائيليون اِيئوج ڪيئو ھانَ آپرَي آپرَي خاندان رَي حِساب ݾون ڪَي گھٽ تو ڪَي وڌيڪ من ڀيڙو ڪيئو۔ ‏18 جڏي اُوئون اُوئي من نَي اومر ماپ ݾون ماپيو، تو ھر ھيڪ خاندان ڪڍي کاوڻ رَي ݾارُو پُورو پُورو ھتو ھانَ ڪَي ڪڍي ڀِي گھڻو جون ٿوڙو ڪونھي ھويو۔ ‏19 مُوسيٰ اُوئون نَي ڪھيو ڪہ، ”ڪو ڀِي اُوئي من ۾ ݾاڪݪي توڻي بچائي نِي راکَي۔“ ‏20 تو ڀِي ڪئينڪہ مِنکون اُوئي رِي بات ڪونھي منِي ھانَ ݾاڪݪي توڻي ڪئين من بچائي راکيو، اِيئي رَي ڪري اُوئي ۾ ڪيڙا پڙيا ھانَ او من ڪِنو ھويو۔ اِيئي بات تي مُوسيٰ اُوئون تي ڪاوڙيو۔ ‏21 اِيئي نمُونَي او آپرَي آپرَي خاندان رَي حِساب ݾون من ڀيڙو ڪرتا ھانَ جڏي تِݪڪو لاگتو، تو او من پِگھري جاوتو۔

‏22 پَڇي ڇَوين ڏِن يعني جِمَي رو اِيئون ھويو ڪہ جِترو من او ھروز ڀيڙو ڪرتا، اُوئي ݾون وڌيڪ ڀيڙو ڪيئو يعني چار ݾير ڀيڙو ڪيئو۔ پَڇي اِسرائيلي قوم رَي ݾجَي ݾردارون اَي بات مُوسيٰ نَي آئي ݾُڻائِي۔ ‏23 مُوسيٰ اُوئون نَي ڪھيو ڪہ، ”پرميشوَر رو اَي حُڪم ھَي ڪہ ݾووارَي خاص آروم رو ڏِن يعني پرميشوَر رو پويتر ڏِن ھَي۔ اِيئي رَي ڪري ٿونَي جڪو ڪئين رونڌڻو ھَي، او رونڌو ھانَ جڪو ڪئين بچَي، تو اُوئي نَي ݾووارَي توڻي ݾنڀالي راکيا۔“ ‏24 پَڇي جون مُوسيٰ ڪھيو ھتو، اُوئون ٻيجَي ڏِن رَي ݾارُو ريوَڻ ڏينو، او نَڪو خراب ھويو ھانَ نَڪو اُوئي ۾ ڪيڙا پڙيا۔ ‏25 پَڇي مُوسيٰ ڪھيو ڪہ، ”آج اَي کائو، ڪيونڪہ آج پرميشوَر رو پويتر ڏِن ھَي ھانَ ٿونرَي ݾارُو آروم رو ڏِن ھَي، اِيئي رَي ڪري آج ٿونَي ميدون ۾ من ڪونھي ملَي۔ ‏26 ھفتَي را ڇَي ڏِن ٿي من ڀيڙو ڪريا، پڻ ݾاتوين ڏِن يعني ڇنڇر رو من ڪونھي ملَي، ڪيونڪہ ݾاتوون ڏِن پرميشوَر رو پويتر ڏِن ھَي۔“

‏27 پَڇي ݾاتوين ڏِن اِيئون ھويو ڪہ اُوئون ۾ ڪئينڪہ مِنک من ڀيڙو ڪرڻ گيا، پڻ اُوئون نَي ڪئين ڪونھي مِليو۔ ‏28 اِيئي تي پرميشوَر مُوسيٰ نَي ڪھيو ڪہ، ”ٿي ڪترِي توڻي مھارَي باتون ھانَ مھارِي شريعت ڪونھي منو؟ ‏29 جوئو، مھَي پرميشوَر ٿونَي پويتر ڏِن ڏينو ھَي، اِيئي رَي ڪري ھُون ڇَوين ڏِن ٻيئون ڏِنون رو کاڌو ڏيئون ھون۔ ٿي ݾاتوين ڏِن آپرَي آپرَي تنٻُو ۾ رھيا ھانَ ڪو ڀِي ٻاھر نِي نڪرَي۔“ ‏30 اِيئي رَي ڪري مِنکون ݾاتوين ڏِن آروم ڪيئو۔

‏31 پَڇي اِسرائيليون اُوئي ڌون رو نون من راکيو۔ او آڇو ھانَ ڌوڻَي رَي ٻيج جھڙو ھتو ھانَ اُوئي رو ݾَواد ماکِي رَي رس رِي گھڙيوڙِي ٻاٽِي جھڙو ھتو۔ ‏32 پَڇي مُوسيٰ ڪھيو ڪہ، ”پرميشوَر رو اَي حُڪم ھَي ڪہ ٿي اِيئي من ۾ ٻي ݾير آپرِي آوڻ آݪِي پيڙھِي رَي ݾارُو راکيا، جڏي او اَي من ڏيکَي جڪو مھَي ٿونَي رڻ پَٽ ۾ اُوئي ٽيم کݪايو ھتو، جڏي ھُون ٿونَي مِصر مُلڪ رِي غُلومي ݾون ڪاڍي لي آيو ھتو۔“ ‏33 پَڇي مُوسيٰ ھارُون نَي ڪھيو ڪہ، ”ھيڪ ٺيڪر لَي ھانَ ٻي ݾير من اُوئي ۾ ڀر ھانَ اُوئي نَي پرميشوَر آگھي راک ڪہ او آوڻ آݪِي پيڙھِي رَي ݾارُو پڙيو رَي۔“ ‏34 پَڇي جون پرميشوَر مُوسيٰ نَي حُڪم ڏينو ھتو، اُوئيج نمُونَي ھارُون اُوئي من رَي ٺيڪر نَي وچن رِي ݾنڏُوڪ رَي ݾومھو راکيو ڪہ او پڙيو رَي۔ ‏35 اِسرائيلي قوم نَي چاليھ ݾال من مِلتو رھيو ھانَ او اُوئي ٽيم توڻي من کاوتا رھيا، جترِي توڻي او آباد مُلڪ ڪنعان رِي حد توڻي پُگا ڪونھي۔ ‏36 اُوئون ڏِنون ۾ اومر ھيڪ ماپ ڪرڻ رو ٺيڪر ھوتو، جڪو اندازن ٻي ݾير رو ھتو ھانَ او ايفا رو ڏھون حِصو ھتو۔