موڀِي ڏيڪرا پرميشوَر رَي نون ڪرڻ
13
پَڇي پرميشوَر مُوسيٰ نَي ڪھيو ڪہ، 2 ”اِسرائيلي قوم ۾ جايوڙا ݾجائِي موڀِي ڏيڪرا ھانَ جِنارون را پيلڪا نَر ڦݪ مھارَي نون را ڪريا، ڪيونڪہ او مھارا ھَي۔“بِنا کَمير ٻاٽِي رو پَرٻ
3 پَڇي مُوسيٰ مِنکون نَي ڪھيو ڪہ، ”ٿي اَي ڏِن ياد راکيا، جڪَي ۾ ٿي مِصر مُلڪ رِي غُلومي ݾون نڪريا ھتا، ڪيونڪہ پرميشوَر آپرِي قُدرت ݾون ٿونَي اوٿ ݾون ڪاڍي لي آيو، اِيئي رَي ڪري ٿي اِيئي ڏِن کَمير آݪِي ٻاٽِي نِي کايا۔ 4 ٿي ابيب مھيڻَي ۾ آج رَي ڏِن مِصر مُلڪ ݾون نڪريا ھو۔ 5 اِيئي رَي ڪري جڏي پرميشوَر ٿونَي ڪنعاني، حِتي، اموري، حوِي ھانَ يبُوسي قومون رَي مُلڪ ۾ پُگاوَي، جڪو خُوشحال ھانَ آباد مُلڪ ھَي جڪَي رو ݾونݾ پرميشوَر ٿونرَي ٻاپ ڏاڏون ݾون ليئو ھتو ڪہ او ٿونَي او مُلڪ ڏَي، تو ٿي اِيئي مھيڻَي ۾ اَي پَرٻ ملھاوتا رھيا۔ 6 ݾاتون ڏِنون توڻي ٿي بِنا کَمير ٻاٽِي کايا ھانَ ݾاتوين ڏِن پرميشوَر رو پَرٻ ملھايا۔ 7 ٿي ݾاتوين ڏِن بِنا کَمير ٻاٽِي کايا، پڻ کَمير آݪِي ٻاٽِي ھانَ کَمير ٿونرَي آݾَي پاݾَي ڪيٿ ڀِي نظر نِي آوَي۔ 8 ٿي اِيئي ڏِن تي آپرَي اولادون نَي ݾمجھايا ڪہ، ’ھُون اَي ڏِن اِيئي رَي ڪري ملھائُون پڙيو، ڪيونڪہ اُوئي ٽيم پرميشوَر مھنَي مِصر مُلڪ ݾون آزاد ڪرايو ھتو۔‘ 9 اَي پَرٻ اھڙو ھوشَي، جھڙو ٿونرَي ھاٿ تي ھيڪ نِشون ھانَ ٿونرَي اونکيون آگھي ھيڪ يادگيرِي ھووَي ڪہ پرميشوَر رِي شريعت ٿونرِي زِبون تي ھووَي، ڪيونڪہ پرميشوَر آپرِي قُدرت ݾون ٿونَي مِصر مُلڪ ݾون آزاد ڪرايا ھَي۔ 10 اِيئي رَي ڪري ٿي ھر ݾال اِيئون ڏِنون ۾ اَي پَرٻ ملھاوتا رھيا۔“
موڀِي ڏيڪرون رَي بارَي ۾ ھدايت
11 پَڇي مُوسيٰ اَي ڀِي ڪھيو ڪہ، ”جڏي پرميشوَر ٿون ݾون ھانَ ٿونرَي ٻاپ ڏاڏون ݾون ڪيئوڙَي واعدَي تي ٿونَي ڪنعانيون رَي مُلڪ ۾ پُگاوَي ھانَ او مُلڪ ٿونَي ڏَي، 12 تو ٿي موڀِي ڏيڪرا ھانَ جِنارون را پيلڪا نَر پرميشوَر رَي نون را ڪريا، ڪيونڪہ جِنارون را ݾجائِي نَر پرميشوَر را ھوشَي۔ 13 گڏَي رَي پيلڪَي نَر رَي بدلَي ۾ گھيٽو ڏيا ھانَ جي ٿي اُوئي رَي بدلَي ڪئين نِي ڏيئو، تو اُوئي بِڇيرَي رِي نَݾ ڀونگي ڇوڙيا۔ ٿون ݾجون نَي آپرَي موڀِي ڏيڪرون رو بدلو ڏيوَڻو ھَي۔ 14 جڏي آوڻ آݪَي زمونَي ۾ ٿونرا اولاد ٿون ݾون پُوڇَي ڪہ، ’اَي ڪِي ھَي؟‘ تو ٿي اُوئون نَي ݾُڻايا ڪہ، ’پرميشوَر آپرِي قُدرت ݾون مھونَي مِصر مُلڪ رِي غُلومي ݾون ڪاڍي لي آيو ھتو۔ 15 جڏي فرعُون بادشاھ مھونَي آزاد ڪونھي ڪيئا، تو پرميشوَر مِصر مُلڪ ۾ اِنسونون را موڀِي ڏيڪرا ھانَ جِنارون را پيلڪا نَر ڦݪ ماريا ھتا، اِيئي رَي ڪري مھي جِنارون رَي ݾجَي نَرون نَي پرميشوَر رَي آگھي ٻَليدون ڪرون ھون، پڻ آپرَي موڀِي ڏيڪرون رَي بدلَي گھيٽو ڏيئون ھون۔ 16 اَي ٿونرَي ھاٿ تي ھيڪ نِشون ھانَ ٿونرَي اونکيون آگھي ھيڪ يادگيرِي ھووَي، ڪيونڪہ پرميشوَر آپرِي قُدرت ݾون مھونَي مِصر مُلڪ ݾون ڪاڍي لي آيو ھتو۔‘“
باݾڏي ھانَ باڏݪ رو ٿونڀو
17 جڏي فرعُون بادشاھ اُوئون مِنکون نَي جاوڻ رِي موڪل ڏينِي، تو ايشوَر اُوئون نَي فلستِي قوم رَي مُلڪ ݾون ڪونھي لي گيو، جيٿ ݾون مارگ نيڙو ھتو۔ پڻ ايشوَر ڪھيو ڪہ، ”اِيئون نِي ھووَي ڪہ اَي مِنک جھيڙو جھگڙو ڏيکي مِصر مُلڪ پاڇا جاوَي۔“ 18 اِيئي رَي ڪري ايشوَر اُوئون نَي رڻ پَٽ ݾون قُلزم ݾمُوندر ڏيݾا لي گيو۔ اِسرائيلي مِصر مُلڪ ݾون ھٿيار لي نڪريا ھتا۔
19 مُوسيٰ، يُوسف رَي ھاڏکَي آپ ڀيڙَي لي گيو، ڪيونڪہ يُوسف اِسرائيلي قوم نَي ݾونݾ ڏي ڪھيو ھتو ڪہ، ”ايشوَر ضرُور ٿونَي ياد ڪرشَي ھانَ ٿي ايٿ ݾون مھارَي ھاڏکَي آپ ڀيڙَي لي جايا۔“
20 پَڇي اِسرائيلي سُڪات رَي علائقَي ݾون بُوئا ھانَ رڻ پَٽ رَي ڪپ تي ايتام رَي علائقَي ۾ تنٻُو لگايا۔ 21 پرميشوَر اُوئون آگھي آگھي بيتو ھانَ اُوئون نَي مارگ بتاوڻ رَي ݾارُو ڏِن رو باڏݪ رو ٿونڀو ھانَ رات رو اُجاݪو ڏيوَڻ رَي ݾارُو باݾڏي رو ٿونڀو ھوتو ڪہ او ڏِن رات بَئي ݾگھَي۔ 22 ڏِن رو باڏݪ رو ٿونڀو ھانَ رات رو باݾڏي رو ٿونڀو، ھر ٽيم اُوئون آگھي آگھي بيتو۔