خرُوج 12

فَسح رَي پَرٻ رِي تياري

پَڇي پرميشوَر مِصر مُلڪ ۾ مُوسيٰ ھانَ ھارُون نَي ڪھيو ڪہ، ‏2 ”آج ݾون اَي مھيڻو ٿونرَي ݾارُو ݾال رو پيلڪو مھيڻو ھوشَي۔ ‏3 ٿي ݾجِي اِسرائيلي قوم نَي اَي ڪو ڪہ اِيئي مھيڻَي رَي ڏَݾوين ڏِن ھر ھيڪ خاندان رو اَگووڻ آپرَي خاندان رَي ݾارُو ھيڪ گھيٽو لَي۔ ‏4 جي ڪَي خاندان ۾ گھيٽو کاوڻ رَي ݾارُو مِنک گھٽ ھووَي، تو او آپ ڀيڙا اھڙا پاڙَي آݪا شامل ڪرَي، جڪَي را ڀاتِي ٿوڙا ھووَي۔ پَڇي او ٻيئي ڀيڙا ھوئي مِنکون رَي کاوڻ رَي حِساب ݾون ھيڪ گھيٽو لَي۔ ‏5 اِيئي رَي ڪري ڪہ ھر ھيڪ آپرَي ݾارُو رڍون جون ٻڪريون ۾ ھيڪ ھيڪ ڦݪ چُونڊَي، جڪو بي عيب ھانَ ھيڪَي ݾال رو نَر ھووَي۔ ‏6 ٿي اِيئي مھيڻَي رِي چوڏھين تاريخ توڻي اُوئون رِي ݾنڀال ڪريا ھانَ شام رو اِسرائيلي قوم رو ھر ھيڪ خاندان اُوئي نَي باڍَي۔ ‏7 پَڇي جڪَي گھرون ۾ او کاشَي، اوٿ ݾون ٿوڙيو لوئِي لي آپرَي گھر رَي در رَي ٻيئون ٻوھيون ھانَ ماٿلِي چوکٽ تي لگاوَي۔ ‏8 او موݾ نَي اُوئيج رات باݾڏي تي ڀُونجي بِنا کَمير ٻاٽِي ھانَ کارَي ݾاگ ۾ ڀيڙو کاوَي۔ ‏9 اُوئي موݾ نَي ڪاچو جون پوڻي ۾ اُٻاݪي نِي کاوَي، پڻ اُوئي نَي ݾيݾاگرِي، کُريون ھانَ ٻيجَي ݾجَي حِصون ݾُوڌو باݾڏي تي ڀُونجي کاوَي۔ ‏10 اُوئي ۾ ڪئين ڀِي ݾاڪݪي توڻي بچاوَي نِي ھانَ جي اُوئي ۾ ڪئين ݾاڪݪي توڻي بچَي، تو اُوئي نَي باݾڏي ۾ ٻاݪي ڇوڙَي۔ ‏11 ٿي کاوڻ ݾون پيل آپرا ݾندرا ٻونڌيا، آپرَي پگون ۾ جُتا پيريا ھانَ آپرَي ھاٿ ۾ گيڏِي ليا۔ ٿي او موݾ ڇيڪا ڇيڪا کايا، ڪيونڪہ اَي فَسح يعني مُگتي رو ٻَليدون پرميشوَر رَي ݾارُو ھوشَي۔ ‏12 اُوئيج رات ھُون مِصر مُلڪ ݾون لنگھين ھانَ اوٿ اِنسون را ݾجائِي موڀِي ڏيڪرا ھانَ جِنارون را ݾجائِي پيلڪا نَر ڦݪ ماري ڇوڙين۔ ھُون مِصر مُلڪ رَي ݾجَي ڏيوتائون نَي ڀِي سزا ڏئين، ڪيونڪہ ھُونج پرميشوَر ھون۔ ‏13 جڏي ھُون مِصري قوم را موڀِي ڏيڪرا مارين، تو ٿونَي ڪئين ڪونھي ھووَي، ڪيونڪہ جڪون گھرون تي لوئِي رو نِشون لاگوڙو ھوشَي، تو ھُون او لوئِي ڏيکي، او گھر ڇوڙتو جائين۔ ‏14 ٿي اَي ڏِن ھميشا ياد راکيا ھانَ ھر ݾال پيڙھِي ݾون پيڙھِي توڻي پرميشوَر رو پَرٻ ݾمجھي ملھايا۔“

بِنا کَمير ٻاٽِي رو پَرٻ

‏15 پَڇي پرميشوَر ڪھيو ڪہ، ”ٿي ݾات ڏِن ھروز بِنا کَمير ٻاٽِي کايا۔ پيلڪَي ڏِن ݾون کَمير آپرَي گھر ݾون ٻاھر نوکيا، ڪيونڪہ جڪو مِنک پيلڪَي ڏِن ݾون لي ݾاتون ڏِنون توڻي کَمير آݪِي ٻاٽِي کاشَي، تو او اِسرائيلي قوم ݾون ڪاڍيو جاشَي۔ ‏16 ٿي ݾجائِي پيلڪَي ڏِن ھانَ ݾاتوين ڏِن مھارِي ڀگتي رَي ݾارُو ڀيڙا ھويا۔ اُوئون ٻيئون ڏِنون ۾ ݾيڌَي ݾون ٽاݪ ٻيجو ڪو ڀِي ڪوم نِي ڪريا۔ ‏17 ٿي بِنا کَمير ٻاٽِي رو اَي پَرٻ ھر ݾال ملھايا، ڪيونڪہ مھَي اُوئي ڏِن ٿونرا قبيلا مِصر مُلڪ رِي غُلومي ݾون آزاد ڪرايا ھتا۔ اِيئي رَي ڪري ٿي او ڏِن ھميشا ھر پيڙھِي توڻي پرميشوَر رَي پَرٻ رو ڏِن ڪري ملھايا۔ ‏18 ٿي پيلڪَي مھيڻَي رِي چوڏھين تاريخ رِي شام ݾون لي ايڪِي تاريخ رِي شام توڻي بِنا کَمير ٻاٽِي کايا۔ ‏19 ݾاتون ڏِنون توڻي ٿونرَي گھر ۾ کَمير نِي ھووَي، ڪيونڪہ جڪو ڀِي کَمير آݪِي شئي کاشَي، تو اُوئي نَي اِسرائيلي قوم ݾون ڪاڍيو جاشَي، پَڇي ڀلي او اِسرائيلي قوم رو ھووَي، جون ڪو ٻيجِي قوم آݪو جڪو اِسرائيلي قوم ڀيڙو شامل ھويو ھووَي۔ ‏20 ٿي اُوئون ڏِنون ۾ ڪو ڀِي کَمير آݪِي شئي نِي کايا۔ ٿي جيٿ ڀِي رو اوٿ رُگو بِنا کَمير ٻاٽِي کايا۔“

پيلڪو فَسح رو پَرٻ

‏21 پَڇي مُوسيٰ اِسرائيلي قوم رَي ݾجَي اَگووڻون نَي اَڻائي ڪھيو ڪہ، ”ٿون ۾ ھر ھيڪ مِنک آپرَي خاندان رَي حِساب ݾون ھيڪ ھيڪ گھيٽو لَي ھانَ اُوئي نَي فَسح رَي پَرٻ تي باڍَي۔ ‏22 پَڇي اُوئي رو لوئِي ھيڪَي ٺون ۾ گھاتَي ھانَ زُوفَي بَڻ رو ھيڪ ڇُگو لَي ھانَ اُوئي نَي لوئِي ۾ ٻوڙي در رَي ٻيئون ٻوھيون ھانَ ماٿلِي چوکٽ تي لگاوَي۔ اُوئي ݾون پَڇي ٿون ۾ ڪو ڀِي مِنک ݾاڪݪي توڻي آپرَي گھر ݾون ٻاھر نِي نڪرَي۔ ‏23 ڪيونڪہ جڏي پرميشوَر مِصري قوم نَي مارڻ رَي ݾارُو مِصر مُلڪ ݾون لنگھشَي، تو جڪون گھرون رَي درون رَي ٻيئون ٻوھيون ھانَ ماٿلَي چوکٽون تي لوئِي لاگوڙو ڏيکشَي، تو پرميشوَر اُوئون گھرون نَي ڇوڙتو جاشَي ھانَ موت رَي فريشتَي نَي ٿونرَي گھرون ۾ آوڻ ڪونھي ڏَي۔ ‏24 اَي ريت، ٿي ھانَ ٿونرا ݾجائِي اولاد ھر ݾال پَرٻ آݪِي ڪار ملھاوتا رھيا۔ ‏25 جڏي ٿي اُوئي مُلڪ ۾ پُگو، جڪَي رو واعدو پرميشوَر ٿون ݾون ڪيئو ھَي، تو ٿي اَي پَرٻ ھميشا ملھاوتا رھيا۔ ‏26 جڏي ٿونرا اولاد ٿون ݾون پُوڇَي ڪہ، ’آپي اَي پَرٻ ڪيئون ملھاھُون ھون؟‘ ‏27 تو ٿي اُوئون نَي ڪھيا ڪہ، ’اَي فَسح رو پَرٻ پرميشوَر رَي ݾارُو ھَي۔ اِيئي ڏِن پرميشوَر مِصر مُلڪ را موڀِي ڏيڪرا ماريا ھتا، پڻ اِسرائيلي قوم رَي گھرون نَي ڦِٽا ڪيئا ھانَ اُوئون نَي بچايا ھتا۔‘“

اِيئي تي اِسرائيليون پرميشوَر آگھي آپرا شيش نِمايا۔ ‏28 پَڇي اِسرائيلي قوم اِيئوج ڪيئو، جون پرميشوَر مُوسيٰ ھانَ ھارُون نَي ڪھيو ھتو۔

مِصر مُلڪ تي ڏَݾوين آفت

‏29 پَڇي آڌِي رات رو پرميشوَر مِصر مُلڪ رَي تخت تي ٻيٺوڙَي فرعُون بادشاھ رَي موڀِي ڏيڪرَي ݾون لي جيل ۾ قيدي توڻي ھر ھيڪ مِنک رو موڀِي ڏيڪرو ماري ڇوڙيو، اترِي توڻي ڪہ جِنارون را پيلڪا نَر ڀِي ماري ڇوڙيا۔ ‏30 فرعُون بادشاھ ھانَ اُوئي را ݾجائِي نوڪر ھانَ ݾجائِي مِصري مِنک رات رو اُٺي ٻيٺا ھانَ مِصر مُلڪ ۾ تموم گھڻو ماتم ھويو، ڪيونڪہ ڪو ڀِي گھر اھڙو ڪونھي ھتو، جڪَي ۾ ڪو ڀِي نِي مُوئو ھووَي۔ ‏31 اِيئي تي فرعُون بادشاھ رات رو مُوسيٰ ھانَ ھارُون نَي اَڻائي ڪھيو ڪہ، ”ٿي آپرِي اِسرائيلي قوم نَي لي جائو ھانَ مھارِي مِصري قوم ݾون نڪري جائو ھانَ جون ٿي ڪو ھو، اِيئوج آپرَي پرميشوَر رِي ڀگتي ڪرو۔ ‏32 جون ٿونرِي مرضِي ھَي آپرَي رڍون ٻڪرَي ھانَ ڍگا ڍگَي ڀِي لي جائو ھانَ مھارَي ݾارُو ڀِي آشيرواد مونگيا۔“

اِسرائيلي قوم رو مِصر مُلڪ ݾون نڪرڻ

‏33 مِصري قوم رِي مرضِي ھتِي ڪہ اِسرائيلي ڇيڪا ڇيڪا مِصر مُلڪ ݾون نڪري جاوَي، ڪيونڪہ مِصري قوم آݪا اَي ݾمجھتا ڪہ او اِسرائيلي قوم رَي ڪري مرَي پڙيا۔ ‏34 اِسرائيليون بِنا کَمير گويوڙو آٽو ٺيڪرون ݾُوڌو گاڀون ۾ بيڙھي آپرَي ڪونڌون تي کڻيو۔ ‏35 اِسرائيلي قوم مُوسيٰ رَي ڪيوَڻ تي مِصري قوم ݾون ݾونَي چوندِي را گيڻا ھانَ گاڀا مونگي ليئا۔ ‏36 جڪو ڪئين اِسرائيلي قوم مونگيو، او اُوئون ڏينو، ڪيونڪہ پرميشوَر اُوئون نَي مِصري قوم رِي نظر ۾ تموم گھڻِي عِزت ڏينِي ھانَ اِيئي نمُونَي اُوئون مِصري قوم نَي ڦُري ليئا۔

‏37 پَڇي اِسرائيليون رعمسيس شھر ݾون سُڪات شھر توڻي پينڏو ڪيئو۔ اَي مِنک لُگايون ھانَ ٻاݪون ݾون ٽاݪ اندازن ڇَي لَک رُگو آڏمي ھتا۔ ‏38 اِسرائيلي قوم ڀيڙو ھيڪ ٻيجِي قوم رو ڀِي موٽو ٽولو ھتو ھانَ اُوئون ڀيڙَي تموم گھڻَي رڍون ٻڪرَي ھانَ ڍگا ڍگَي ھانَ ٻيجا جِنار ڀِي ھتا۔ ‏39 اِسرائيلي قوم اُوئي بِنا کَمير گويوڙَي آٽَي ݾون ٻاٽَي گھڙئَي، جڪو او مِصر مُلڪ ݾون آپ ڀيڙو لي آيا ھتا، ڪيونڪہ اُوئون نَي مِصر مُلڪ ݾون زورِي ڪاڍيا ھتا ھانَ او گويوڙَي آٽَي ۾ کَمير مِلائي ڪونھي ݾگھيا ھانَ نَڪو آپرَي ݾارُو ٻاٽَي گھڙي ݾگھيا۔

‏40 اِسرائيلي قوم نَي مِصر مُلڪ ۾ ريتَي چار ݾئو ٽيھ ݾال ھويا ھتا۔ ‏41 جڏي چار ݾئو ٽيھ ݾال پُورا ھويا، تو اُوئيج ڏِن پرميشوَر رو ݾجو لشڪر مِصر مُلڪ ݾون ٻاھر نڪريو ھتو۔ ‏42 اَي او رات ھَي، جڪَي ۾ پرميشوَر اِسرائيليون نَي مِصر مُلڪ ݾون ڪاڍي لي آيو۔ اِيئي رَي ڪري اِسرائيلي قوم رَي ݾارُو اَي ضرُوري ھَي ڪہ او اُوئي رات نَي پرميشوَر رَي ݾارُو ھيڪِي پيڙھِي ݾون ٻيجِي پيڙھِي توڻي ملھاوتا رَي۔

فَسح پَرٻ رَي ݾارُو اصُول

‏43 پَڇي پرميشوَر مُوسيٰ ھانَ ھارُون نَي ڪھيو ڪہ، ”فَسح رَي پَرٻ رَي ݾارُو اَي اصُول ھَي ڪہ ڪو ڀِي ٻيجِي قوم آݪو، او نِي کاوَي۔ ‏44 پڻ جي ڪُڻ مول رو ليئوڙو غُلوم ھووَي ھانَ اُوئي رو کَتنو ڪرايو ھووَي، تو او کائي ݾگھَي ھَي۔ ‏45 پڻ مزُور ھانَ پرديسي جڪو ٻيجِي قوم را ھَي، او اُوئي نَي نِي کاوَي۔ ‏46 ٻَليدون رو موݾ گھر ۾ کايا، يعني اُوئي رو ھيڪ ڀِي ٽُڪڙو گھر ݾون ٻاھر نِي لي جايا ھانَ نِي ٿي اُوئي رِي ڪو ھاڏکِي ڀونگيا۔ ‏47 اِسرائيلي قوم را ݾجائِي مِنک مھارَي اِيئون باتون تي عمل ڪرَي۔ ‏48 جي ڪُڻ ٻيجِي قوم رو مِنک ٿون ڀيڙو ريتو ھووَي ھانَ پرميشوَر رَي فَسح رو پَرٻ ملھاوڻ رِي مرضِي ھووَي، تو اُوئون را ݾجائِي آڏمي آپرو کَتنو ڪراوَي۔ تو پَڇي او فَسح رو پَرٻ ملھاوَي۔ اِيئي نمُونَي اُوئي نَي اِيئون ݾمجھو جاشَي ڪہ اُوئي رو جنم ٿونرَي مُلڪ ۾ ھويو ھووَي۔ پڻ جڪَي رو کَتنو ڪونھي ھويوڙو، تو او اَي نِي کاوَي۔ ‏49 مھارو اَي اصُول نِي رُگو ٿونرَي ݾارُو، پڻ ٻيجَي قومون رَي ݾارُو ڀِي ھَي، جڪو ٿون ڀيڙا رَي ھَي۔“ ‏50 اِيئي نمُونَي ݾجَي اِسرائيليون اِيئوج ڪيئو، جون پرميشوَر مُوسيٰ ھانَ ھارُون نَي حُڪم ڏينو ھتو۔ ‏51 اُوئي ڏِن پرميشوَر اِسرائيلي قوم رَي ݾجَي مِنکون نَي مِصر مُلڪ ݾون ٻاھر ڪاڍي لي گيو۔