خرُوج 11

پرميشوَر رو ڏَݾوين آفت رَي بارَي ۾ ݾُڻاوڻ

پَڇي پرميشوَر مُوسيٰ نَي ڪھيو ڪہ، ”ھُون فرعُون بادشاھ ھانَ مِصري قوم تي ھيڪ ٻيجِي آفت ميلين، پَڇي او ٿونَي ايٿ ݾون جاوڻ ڏيشَي۔ اَي پڪِي بات ھَي، او ٿون ݾجون نَي ايٿ ݾون زورِي ڪاڍشَي۔ ‏2 اِيئي رَي ڪري ھمَي تُو آپرَي مِنکون نَي ݾُڻا ڪہ ھر ھيڪ آڏمي آپرَي پاڙَي آݪَي ݾون ھانَ ھر ھيڪ لُگائِي آپرَي پاڙَي آݪِي ݾون چوندِي ھانَ ݾونَي را گيڻا لَي۔“ ‏3 پرميشوَر اِسرائيلي قوم نَي مِصري قوم رِي نظر ۾ عِزت ڏينِي ھانَ مِصر مُلڪ ۾ فرعُون بادشاھ را نوڪر ھانَ ݾجائِي مِنک مُوسيٰ رِي تموم گھڻِي عِزت ڪرتا۔

‏4 پَڇي مُوسيٰ فرعُون بادشاھ نَي ڪھيو ڪہ، ”پرميشوَر اِيئون ڪھيو ھَي ڪہ، ’ھُون آڌِي رات رو مِصر مُلڪ رَي بِچ ݾون لنگھين ‏5 ھانَ مِصر مُلڪ را ݾجائِي موڀِي ڏيڪرا، يعني تخت تي ٻيٺوڙَي فرعُون بادشاھ ݾون لي اُوئي ٻونھِي توڻي جڪو گھٽِي پيݾتِي ھوشَي، ݾجون را موڀِي ڏيڪرا ھانَ ݾجَي مال را پيلڪا نَر ڦݪ مري جاشَي۔ ‏6 پُورَي مِصر مُلڪ ۾ اِترو تو موٽو ماتم ھوشَي، اھڙو ماتم نَڪو ڪڏي پيل ھويو ھانَ نَڪو ڪڏي ھووَي۔ ‏7 پڻ اِسرائيلي قوم رَي مِنکون ھانَ جِنارون نَي ڪئين ڪونھي ھووَي ڪہ ٿونَي خبر پڙَي ڪہ پرميشوَر رِي نظر ۾ اِسرائيلي قوم ھانَ مِصري قوم ۾ ڪِترو فرق ھَي۔‘“ ‏8 پَڇي مُوسيٰ اَي ڀِي ڪھيو ڪہ، ”ٿارا اَي ݾجائِي نوڪر مھَي ڪڍي آشَي ھانَ مھَي آگھي جُھڪي ڪشَي ڪہ، ’تُو ڀِي نڪر ھانَ ٿارا مِنک ڀِي نڪرَي۔‘ اِيئي ݾون پَڇي ھُون بُوئو جائين۔“ اَي ڪئي او تموم گھڻِي ريݾ ۾ فرعُون ݾون بُوئو گيو۔

‏9 پَڇي پرميشوَر مُوسيٰ نَي ڪھيو ڪہ، ”فرعُون ٿونرِي اِيئي رَي ڪري ڪونھي ݾُڻَي ڪہ ھُون مِصر مُلڪ ۾ تموم گھڻا پرچا بتائُون۔“ ‏10 مُوسيٰ ھانَ ھارُون اَي ݾجائِي پرچا فرعُون بادشاھ نَي بتايا، پڻ پرميشوَر فرعُون بادشاھ رو من ڪاٺو ڪيئو ھتو ھانَ اُوئي اِسرائيليون نَي آپرَي مُلڪ ݾون جاوڻ ڪونھي ڏينا۔