خرُوج 9

مِصر مُلڪ ۾ پونچوِي آفت

پَڇي پرميشوَر مُوسيٰ نَي ڪھيو ڪہ، ”فرعُون بادشاھ ڪڍي جا ھانَ اُوئي نَي ڪَي ڪہ، ’پرميشوَر، جڪَي نَي مھي عبراني قوم آݪا آپرو ايشوَر منون ھون، او ڪَي ھَي ڪہ تُو مھارَي مِنکون نَي جاوڻ ڏي، تو او جائي مھارِي ڀگتي ڪرَي۔‘ ‏2 جي تُو اُوئون نَي جاوڻ ڪونھي ڏَي، ‏3 تو پَڇي تُو جوئي ڪہ پرميشوَر رو ڪھر ٿارَي مال ۾ جڪو ٻنِي ۾ ھَي، يعني گھوڙون، گڏون، اُونٺون، ڍگون، ڍگيون ھانَ رڍون ٻڪريون تي اھڙو پڙشَي، جڪَي ݾون اُوئون ۾ موت رِي وبا بِکري جاشَي۔ ‏4 پڻ پرميشوَر اِسرائيلي قوم رو مال، مِصري قوم رَي مال ݾون ڌار ڪرشَي ھانَ اِسرائيلي قوم رو ھيڪ ڀِي جِنار ڪونھي مرَي۔“ ‏5 پَڇي پرميشوَر ڪھيو ڪہ، ”ھُون ݾووارَي اِيئي مُلڪ ۾ اَي ڪوم ڪرين۔“

‏6 پرميشوَر ٻيجَي ڏِن اِيئوج ڪيئو ھانَ مِصري قوم رو ݾجو مال مري گيو، پڻ اِسرائيلي قوم رو ڪو ڀِي مال ڪونھي مُوئو۔ ‏7 پَڇي فرعُون بادشاھ آپرا مِنک ميليا، تو خبر پڙِي ڪہ اِسرائيلي قوم رَي مال ۾ ھيڪ ڀِي ڪونھي مُوئو۔ تو ڀِي فرعُون بادشاھ رو من ڪاٺو ھويو ھانَ اُوئي اِسرائيليون نَي جاوڻ ڪونھي ڏينا۔

مِصر مُلڪ تي ڇھين آفت

‏8 پَڇي پرميشوَر مُوسيٰ ھانَ ھارُون نَي ڪھيو ڪہ، ”ٿي ٻيئي بٺَي رِي راک آپرَي مُٺيون ۾ ليئو ھانَ مُوسيٰ راک نَي فرعُون رَي رُوبرو آڪاش ڏيݾا اُڏاوَي۔ ‏9 تو او راک پُورَي مِصر مُلڪ ۾ پِکڙي جاشَي، پَڇي مِنکون رَي ڏيل ھانَ جِنارون تي رت گَڙ ھوئي جاشَي۔“ ‏10 اِيئي تي مُوسيٰ ھانَ ھارُون بٺَي رِي راک لي جائي فرعُون بادشاھ آگھي آڪاش ڏيݾا اُڏائِي، تو اُوئي ݾون جِنارون ھانَ مِنکون رَي ڏيل تي رت گَڙ ھوئي گيا۔ ‏11 مِصري جادُوگر مُوسيٰ ݾومھا اُڀي ڪونھي ݾگھيا، ڪيونڪہ اُوئون رَي ھانَ ݾجَي مِصري مِنکون رَي ڏيل تي رت گَڙ نڪريوڙا ھتا۔ ‏12 جون پرميشوَر مُوسيٰ نَي ڪھيو ھتو، اِيئوج ھويو ھانَ فرعُون بادشاھ اُوئون رِي بات ڪونھي منِي، ڪيونڪہ پرميشوَر اُوئي رو من ڪاٺو ڪيئو ھتو۔

مِصر مُلڪ تي ݾاتوين آفت

‏13 پَڇي پرميشوَر مُوسيٰ نَي ڪھيو ڪہ، ”تُو ݾاڪݪي تارھي فرعُون بادشاھ ڪڍي جائي ھانَ اُوئي نَي ڪئي ڪہ، ’پرميشوَر، جڪَي نَي مھي عبراني قوم آݪا آپرو ايشوَر منون ھون، اُوئي ڪھيو ھَي ڪہ، ”مھارا مِنک جاوڻ ڏي، تو او جائي مھارِي ڀگتي ڪرَي۔ ‏14 جي ٿَي اِيئون ڪونھي ڪيئو، تو ھُون آپرَي ݾجَي آفتون ٿَي تي، ٿارَي وزيرون ھانَ ٿارَي مِنکون تي ميلين ڪہ ٿنَي خبر پڙَي ڪہ ݾجِي دُنيا ۾ مھَي جھڙو قُدرت آݪو ٻيجو ڪو ڀِي ڪونھي۔ ‏15 جي مھارِي مرضِي ھوئِي ھووَنت، تو ھُون ھڻون توڻي آپرِي قُدرت ݾون اھڙِي وبا ميلون تو، جڪَي ݾون ٿنَي ھانَ ٿارَي مِنکون نَي دُنيا ݾون مِٽائي ڇوڙون تو۔ ‏16 پڻ مھَي حقيقت ۾ ٿنَي اِيئي رَي ڪري جيتو ريوَڻ ڏينو ڪہ ھُون آپرِي قُدرت ٿنَي بتائُون ھانَ ݾجِي دُنيا را مِنک مھارَي نون رِي بکوڻ ڪرَي۔ ‏17 پڻ تُو اَڃون ڀِي آپرو آپنَي موٽو ݾمجَھي ھَي ھانَ مھارَي مِنکون نَي جاوڻ ڪونھي ڏيتو۔ ‏18 اِيئي رَي ڪري ھُون ݾووارَي اِيئج ٽيم، اھڙا موٽا موٽا گَڙا برݾائين جڪو مِصر مُلڪ ۾ آج توڻي ڪڏي ڀِي ڪونھي برݾيا۔ ‏19 ھمَي تُو آپرا مِنک ميلي آپرو ڌڻ مال ھانَ جڪو ڪئين ٻاھر ھَي، او گھري لي آوَي ڪيونڪہ جڪو مِنک جون جِنار ٻاھر ھوشَي، او ݾجائِي گَڙون رَي ڪري مري جاشَي۔“‘“ ‏20 اِيئي تي فرعُون بادشاھ رَي وزيرون ۾ جڪو ڀِي پرميشوَر رِي اِيئي بات ݾون ٻيئاجو، او آپرا نوڪر ھانَ آپرو مال گھري لي آيو۔ ‏21 پڻ جڪون پرميشوَر رِي بات تي ڌھيون ڪونھي ڏينو، اُوئون آپرا نوڪر ھانَ مال ٻاھر ريوَڻ ڏينو۔

‏22 پَڇي پرميشوَر مُوسيٰ نَي ڪھيو ڪہ، ”تُو آپرو ھاٿ آڪاش ڏيݾا ڪر، تو ݾجَي مِصر مُلڪ ۾ اِنسونون، جِنارون، پوک ھانَ بَڻون تي گَڙا پڙَي۔“ ‏23 اِيئي تي مُوسيٰ آپرِي گيڏِي آڪاش ڏيݾا ڪِي، تو کيوَڻ ڀيڙا گَڙا برݾيا ھانَ کيوَڻ ڌرتي تي کِري۔ اِيئي نمُونَي پرميشوَر مِصر مُلڪ تي گَڙا برݾايا۔ ‏24 ڌرتي تي گَڙا برݾتا رھيا ھانَ کيوَڻ گرجتِي رئِي۔ اِيئي ݾون پيل مِصر مُلڪ ۾ اھڙا موٽا گَڙا ڪڏي ڀِي ڪونھي پڙيا۔ ‏25 ݾجَي مِصر مُلڪ ۾ گَڙون رَي ڪرَي ݾجائِي اِنسون ھانَ جِنار جڪو ٻاھر ھتا، او مري گيا ھانَ ݾجِي پوک ھانَ بَڻ برباد ھوئي گيا۔ ‏26 پڻ جشن رَي علائقَي ۾ جيٿ اِسرائيلي ريتا، اوٿ گَڙا ڪونھي پڙيا۔

‏27 پَڇي فرعُون بادشاھ آپرا مِنک ميلي مُوسيٰ ھانَ ھارُون نَي اَڻائي ڪھيو ڪہ، ”اِيئي دفعَي مھَي موٽو ڏوھ ڪيئو ھَي، واقعي پرميشوَر ݾاچو ھَي، پڻ ھُون ھانَ مھارا مِنک ڏوھي ھون۔ ‏28 مھربونِي ڪري ھمَي ٿي پرميشوَر نَي مِنٿ ڪرو ڪہ اَي کيوَڻ رو شور ھانَ گَڙا برݾڻ بند ھووَي۔ تو پَڇي ھُون ٿونَي جاوڻ ڏئين ھانَ ھمَي ٿونَي ايٿ وڌيڪ ڪونھي ريوَڻو پڙَي۔“ ‏29 اِيئي تي مُوسيٰ اُوئي نَي ڪھيو ڪہ، ”ھُون شھر ݾون ٻاھر نڪري آپرا ھاٿ کڻي پرميشوَر نَي مِنٿ ڪرين، تو پَڇي کيوَڻ ھانَ گَڙا برݾڻ بند ھوئي جاشَي، تو پَڇي ٿنَي خبر پڙشَي ڪہ رُگو پرميشوَر پُورِي دُنيا رو مالڪ ھَي۔ ‏30 پڻ مھنَي خبر ھَي ڪہ تُو ھانَ ٿارا مِنک پرميشوَر ݾون ڪونھي ٻيئاجتا۔“

‏31 گَڙون رَي ڪري ݾِڻي ھانَ جَئو رِي پوک برباد ھوئي گئِي، ڪيونڪہ جَئو را ݾِٽا نڪريوڙا ھتا ھانَ ݾِڻي را گُل لاگوڙا ھتا۔ ‏32 پڻ عام ڪڻڪ ھانَ ݾُٺِي ڪڻڪ برباد ھوئڻ ݾون بچي گئِي، ڪيونڪہ او اَڃون توڻي ڦُوٽِي ڪونھي ھتِي۔

‏33 پَڇي مُوسيٰ فرعُون بادشاھ ݾون ھوئي شھر ݾون ٻاھر نڪريو ھانَ آپرا ھاٿ کڻي پرميشوَر نَي مِنٿ ڪِي، تو کيوَڻ، گَڙا ھانَ مي بند ھوئي گيا۔ ‏34 جڏي فرعُون بادشاھ ڏيٺو ڪہ مي، کيوَڻ ھانَ گَڙا بند ھويا را، تو اُوئي ھانَ اُوئي رَي وزيرون پرميشوَر رِي بات ڪونھي منِي ھانَ آپرا من ڪاٺا ڪيئا۔ ‏35 فرعُون بادشاھ رو من ڪاٺو ھويو، اِيئي رَي ڪري اُوئي اِسرائيليون نَي جاوڻ ڪونھي ڏينا۔ اِيئوج ھويو جون پرميشوَر مُوسيٰ نَي ڪھيو ھتو۔