نُوح نَي ايشوَر رِي برڪت
9
پَڇي ايشوَر نُوح ھانَ اُوئي رَي ڏيڪرون نَي اَي برڪت ڏينِي ڪہ، ”آپرِي نسل بڌائو ھانَ ݾجِي ڌرتي تي بِکري جائو۔ 2 ݾجائِي جيوَو، پکي، ݾِرڪڻ آݪا جِنار ھانَ مڇَي مھَي ٿونرَي اِختيار ۾ ڏينَي ھَي۔ اُوئون ݾجون ماٿَي ٿونرِي اِختياري ھوشَي۔ 3 جھڙَي نمُونَي مھَي ڌون، ݾاگ ھانَ ڦل کاوڻ ݾارُو ڏينا ھَي، اُوئيج نمُونَي ݾجَي جِنارون رو موݾ ڀِي ٿونَي کاوڻ رَي ݾارُو ڏيئون ھون۔ 4 ٿي او جِنار باڍيا ھانَ جترِي توڻي اُوئون رو لوئِي نِي نڪرَي، اُترِي توڻي اُوئون رو موݾ نِي کايا، ڪيونڪہ لوئِي ݾون زندگِي ھَي۔ 5 پڻ جي ڪَي اِنسون نَي ڪو ٻيجو اِنسون جون جِنار مارَي، تو ھُون اُوئي رو پلوند ضرُور لئين۔ 6 ڪيونڪہ مھَي اِنسون نَي آپرَي رُوپ تي ٺاھيو ھَي۔ اِيئي رَي ڪري جڪو ڀِي ڪَي اِنسون نَي مارشَي، تو اُوئي رَي بدلَي اُوئي نَي ضرُور ماريو جاشَي۔ 7 ھمَي ٿي آپرِي نسل بڌائو ھانَ پُورِي ڌرتي تي بِکري جائو۔“نُوح ݾون ايشوَر رو وچن
8 پَڇي ايشوَر نُوح ھانَ اُوئي رَي ڏيڪرون نَي ڪھيو ڪہ، 9 ”ڌھيون ڏي ݾُڻو، آج ݾون ھُون ٿون ݾون ھانَ ٿونرِي نسل ݾون وچن ڪرون ھون 10 ھانَ ݾجَي ݾاݾ آݪون ݾون ڀِي وچن ڪرون ھون، يعني ݾجَي پکيون ھانَ ݾجَي جِنارون ݾون جڪو ٿون ڀيڙا ٻيڙَي ݾون اُتريا ھَي۔ 11 ٿون ݾون مھارو اَي وچن ھَي ڪہ ڀڙي ڪڏي ڀِي ٻوڏ رَي ڪري ݾجائِي ݾاݾ آݪا مرَي ڪونھي ھانَ نَڪو ڪڏي ڌرتي ٻوڏ رَي ڪري برباد ھووَي۔ 12 اَي وچن جڪو مھَي ٿون ݾون ھانَ ݾجَي ݾاݾ آݪون ݾون ڪيئو ھَي، اِيئي رو نِشون اَي ھَي ڪہ، 13 ھُون آپرو ڏونگڙو باڏݪون ۾ راکون ھون۔ اَي ڏونگڙو مھارَي ھانَ ڌرتي رَي بِچ ۾ وچن رو نِشون ھوشَي۔ 14 جڏي ڀِي ھُون ڌرتي تي مي برݾائين، تو مھارو ڏونگڙو باڏݪون ۾ ڏيکيجشَي، 15 پَڇي جڪو وچن مھَي ٿون ݾون ھانَ ݾجَي جِنارون ݾون ڪيئو ھَي، او ياد راکين ھانَ ڀڙي ڪڏي ڀِي ٻوڏ رَي ڪري ݾجائِي ݾاݾ آݪا مارون ڪونھي، 16 ڪيونڪہ مھارو ڏونگڙو باڏݪون ۾ ڏيکيجشَي ھانَ ھُون او جوئي آپرو وچن ھميشا ياد راکين، جڪو مھَي ݾجَي ݾاݾ آݪون ݾون ڪيئو ھَي۔ 17 اَي ڏونگڙو اُوئي وچن رو نِشون ھَي، جڪو مھَي ڌرتي رَي ݾجَي ݾاݾ آݪون ݾون ڪيئو ھَي۔“
نُوح ھانَ اُوئي را ڏيڪرا
18 نُوح را ڏيڪرا جڪو ٻيڙَي ݾون اُتريا، او سِم، حام ھانَ يافت ھتا۔ حام رو ھيڪ ڏيڪرو ھتو، جڪَي رو نون ڪنعان ھتو۔ 19 نُوح رَي اِيئون تينون ڏيڪرون را اولاد ݾجِي ڌرتي تي بِکري گيا۔ 20 نُوح ٻنِي ڪرتو ھانَ او پيلڪو مِنک ھتو، جڪَي انگُورون رو باگ لگايو۔ 21 پَڇي ھيڪ ڏِن اُوئي انگُورون رو اھڙو رس پيئو، جڪو پڪوڙو ھتو، اُوئي ݾون اُوئي نَي نشو آيو۔ او نشَي رِي حالت ۾ آپرَي تنٻُو ۾ اُگھاڙو پڙيو ھتو۔ 22 ڪنعان رو ٻاپ حام تنٻُو ۾ گيو ھانَ آپرَي ٻاپ نَي اُگھاڙو ڏيٺو ھانَ ٻاھر آئي آپرَي ڀايون نَي ݾُڻايو۔ 23 اِيئي تي سِم ھانَ يافت ھيڪ گاڀو لي آپرَي کوئَي تي راکي ھانَ پاڇلئي پگي بَئي تنٻُو ۾ گيا ھانَ آپرَي ٻاپ رِي اُگھاڙ ڍڪِي۔ اُوئون آپرا مونڏا ٻيجَي پاݾَي ڪيئا ھتا ڪہ آپرَي ٻاپ رِي اُگھاڙ نِي ڏيکَي۔ 24 جڏي نُوح ھوش ۾ آيو، تو اُوئي نَي خبر پڙِي ڪہ اُوئي رَي نِنئي ڏيڪرَي حام اُوئي رِي عِزت رو خيال ڪونھي ڪيئو۔ 25 پَڇي اُوئي ڪھيو ڪہ،
”ڪنعان تي ايشوَر رِي لعنت ھووَي،
اُوئي را اولاد آپرَي ڀايون رَي غُلومون را غُلوم ھووَي۔
26 پرميشوَر رِي بکوڻ ھووَي، جڪو سِم رو ايشوَر ھَي۔
ڪنعان را اولاد سِم رَي اولادون را غُلوم ھووَي۔
27 ايشوَر يافت را اولاد بڌاوَي۔
او سِم رَي اولادون ڀيڙو رَي۔
ڪنعان را اولاد يافت رَي اولادون را ڀِي غُلوم ھووَي۔“