پيدائيش 7

پرميشوَر نُوح نَي ڪھيو ڪہ، ”تُو آپرَي ݾجَي ڀاتيون ݾُوڌو ٻيڙَي ۾ چڙھ، ڪيونڪہ مھَي ڏيٺو ھَي ڪہ اِيئي زمونَي ۾ تُوج ھيڪ ݾاچو مِنک ھَي، جڪَي را خيال ھانَ ڪوم ݾُٺا ھَي۔ ‏2 تُو ݾجائِي حِلال جِنارون را ݾات ݾات جوڙا ھانَ حروم جِنارون رو ھيڪ ھيڪ جوڙو، يعني نَر ھانَ مادَي آپ ڀيڙا لَي ‏3 ھانَ ھر نمُونَي رَي پکيون ۾ ݾات ݾات جوڙا، يعني نَر ھانَ مادَي لَي ڪہ اُوئون رِي نسل بيتِي رَي۔ ‏4 ݾاتون ڏِنون ݾون پَڇي ھُون چاليھ ڏِنون توڻي ڌرتي تي ڏِن رات مي برݾائين ھانَ ݾجائِي جِنار جڪو مھَي ٺاھيا ھَي، ختم ڪري ڇوڙين۔“ ‏5 اِيئي تي نُوح اِيئوج ڪيئو، جون پرميشوَر اُوئي نَي حُڪم ڏينو ھتو۔

‏6 جڏي ڌرتي تي ٻوڏ آئِي ھتِي، تو اُوئي ٽيم نُوح رِي عُمر ڇَي ݾئو ݾال ھتِي۔ ‏7 نُوح، اُوئي رِي لُگائِي، اُوئي را ڏيڪرا ھانَ اُوئي رَي بوئارَي ٻوڏ ݾون بچڻ رَي ݾارُو ٻيڙَي ۾ چڙھيا۔ ‏8 ھر نمُونَي را حِلال ھانَ حروم جِنار، پکي ھانَ ڌرتي تي ݾِرڪڻ آݪَي ݾجَي جِنارون را جوڙا، ‏9 نَر ھانَ مادَي نُوح ڀيڙا ٻيڙَي ۾ چڙھيا، جون ايشوَر حُڪم ڏينو ھتو۔ ‏10 ݾاتون ڏِنون ݾون پَڇي ڌرتي تي ٻوڏ آئِي۔

‏11 جڏي نُوح رِي عُمر ڇَي ݾئو ݾال ھتِي، اُوئيج ݾال ٻيجَي مھيڻَي رِي ݾَترَي تاريخ رو پتاݪ ڦُوٽا ھانَ آڪاش را در کُلي گيا ‏12 ھانَ چاليھ ڏِنون توڻي ڌرتي تي ڏِن رات لاگيتو مي برݾتو رھيو۔ ‏13 اُوئي ڏِن نُوح آپرِي لُگائِي، آپرَي ڏيڪرون سِم، حام ھانَ يافت ھانَ آپرَي تينون بوئاريون ݾُوڌو ٻيڙَي ۾ چڙھيو۔ ‏14 ھر نمُونَي را نِنيا موٽا، ڌاريوڙا جِنار، جھنگلِي جِنار، ݾِرڪڻ آݪا جِنار ھانَ ھر نمُونَي را پکي اُوئي ڀيڙا ٻيڙَي ۾ چڙھيا۔ ‏15 ھر نمُونَي را جِنار جوڙا جوڙا، نُوح ڀيڙا ٻيڙَي ۾ چڙھيا۔ ‏16 جھڙَي نمُونَي ايشوَر نُوح نَي ڪھيو ھتو، جڪو جِنار ٻيڙَي ۾ آيا، او نَر ھانَ مادَي ھتَي۔ پَڇي پرميشوَر ٻيڙَي رو در ٻاھر ݾون بند ڪري ڇوڙيو۔ ‏17 چاليھ ڏِنون توڻي ڌرتي تي ٻوڏ رو پوڻي لاگيتو بڌتو گيو ھانَ ٻيڙو اُونچو اُونچو ھوتو گيو۔ ‏18 پوڻي ڌرتي تي چڙھتو ھانَ تموم گھڻو بڌتو گيو ھانَ ٻيڙو پوڻي ماٿَي تِرڻ لاگو۔ ‏19 پوڻي ڌرتي تي اِترو تو بڌيو ڪہ دُنيا را موٽا موٽا ڏُونگر ڀِي ٻُوڏي گيا۔ ‏20 پوڻي بڌتو بڌتو اُوئون ڏُونگرون ݾون اندازن بيݾ ڦُٽ ݾون ڀِي اُونچو ھويو۔ ‏21 ڌرتي تي ريوَڻ آݪا ݾجائِي جِنار، يعني ڌڻ مال، جھنگلِي جِنار، پکي ھانَ ݾجائِي اِنسون مري گيا۔ ‏22 جڪو ڪئين ڌرتي تي ھتو ھانَ جڪون ۾ ݾاݾ ھتو، ختم ھوئي گيا۔ ‏23 اِيئي نمُونَي ايشوَر ڌرتي را ݾجائِي جيوَو، يعني اِنسون، ھر نمُونَي را جِنار، ݾِرڪڻ آݪا جِنار ھانَ پکي مِٽائي ختم ڪري ڇوڙيا، رُگو نُوح ھانَ جڪو اُوئي ڀيڙا ٻيڙَي ۾ ھتا، او بچي گيا۔ ‏24 پوڻي ڌرتي تي ھيڪ ݾئو پنجاھ ڏِنون توڻي اُڀو رھيو۔