मरकुस 1

मरकुस

लिख्यो सुब-समिचार

ईसु का दूत की तय्यारी

(मत्ती ३.१-१२; लूका ३.१-१८; योहन १.१९-२८)

¹ परमेसर को बेटो ईसु मसीह का सुब-समिचार की सुरुआत। ²  जसाके यसायाह नबी ने परमेसर आड़ी से क्यो के,

"देख हूं थारा अगड़े अपणो दूत मोकलुं,

जो थारो रस्‍तो तय्यार करेगा;

³  मांळ माय हेला पाड़वा वाळा को यो हेलो,

'परभु को रस्‍तो तय्यार करो,

उकी बाटहुंण सुदी करो।"

⁴ योहन बपतिसमो देवा वाळो पापहुंण की मांफी सरु हिरदो बदळवा का बपतिसमा को परचार करतो मांळ माय आयो। ⁵ अने यहूदिया का आखा इलाका का अने यरुसलेम का सगळा रेवासी उका कने हिट्याया, अने अपणा पापहुंण के मानी के यरदन नद्दी माय उकासे बपतिसमो लेवा लाग्या।

⁶  योहन तो ऊंट का रुंवां का लतरा पेर्‌या करतो अने कमर माय चामड़ा को कमरपेटो बान्‍द्‍या करतो अने टिडिड्‍हुंण अने सेत खाया करतो थो। ⁷ अने यो केतो परचार कर्‌या करतो थो, "म्हारा बाद एक आवा वाळो हे, जो म्हार से घणो सामरती हे, अने हूं उकी पन्नी उठाड़वा लायक बी हयनी। ⁸ म्हने तो तमारे पाणी से बपतिसमो द्‍यो, पण उ तमारे पवित्तर आतमा से बपतिसमो देगा।

ईसु को बपतिसमो अने उकी अजमाइस

(मत्ती ३.१३-४.११; लूका ३.२१-२२; ४.१-१३)

⁹ उना दनहुंण माय असो होयो के ईसु ने गलील का नासरत इलाका से अई के योहन से यरदन नद्दी माय बपतिसमो ल्यो। ¹⁰ अने जसेज उ पाणी से बायरे हिट्यो तो उने असमान के खुलतो होयो अने आतमा के कबुतर सरीको अपणा अदरे उतरतो देख्यो; ¹¹  जदे सरग से या अवाज अई: "तू म्हारो परमिलो बेटो, हूं थार से घणो खुस हूं।"

¹² अने आतमा ने झट उके मांळ माय जावा सरु उकसाड़्यो। ¹³ अने चाळीस दन तक मांळ माय उकी अजमाइस सेतान से होती री अने उ वां मांळ जनावर का गेले र्‌यो अने सरगदूत उकी सेवा-टेल करता था।

पेलांपेल चेलाहुंण के तेड़णो

(मत्ती ४.१२-२२; लूका ४.१४-१५; ५.१-११)

¹⁴ योहन के बन्दी बणाया जावा का बाद ईसु तो परमेसर का राज को सुब-समिचार सुणातो होयो गलील आड़ी आयो। ¹⁵  अने यो केवा लाग्यो, बखत पूरण होयो, अने परमेसर को राज कने हे, हिरदो बदळो अने सुब-समिचार पे बिसास करो।"

¹⁶ जदे उ गलील का सरवर का कराड़े-कराड़े जई र्‌यो थो, तो उने सिमोन अने उका भई अन्द्रियास के सरवर माय जाळ लाखता देख्या, क्योंके वी भोई था। ¹⁷ ईसु ने उणका से क्यो, "म्हारा पाछे चलो, हूं तमारे मनखहुंण का भोई बणउंवां।" ¹⁸ वी झट जाळहुंण छोड़ी के उका पाछे चली पड़्या।

¹⁹ थोड़ाक अगड़े बड़वा पे उने जब्दी का बेटा याकूब अने उका भई योहन के नाव माय जाळ सांधता देख्या। ²⁰ उने झट उणके तेड़्या; अने वी अपणा दाइजी जब्दी के मजुर्‌याहुंण का गेले छोड़ी के उका पाछे चली पड़्या

ईसु बायरबादा के बायरे हेड़े

(लूका ४.३१-३७)

²¹ फेर वी कफरनहूम सेर-गांम माय आया, अने झट सबत् का दन उ पराथनाघर माय जई के परबचन देवा लाग्यो। ²²  अने लोग उका परबचन से चकित होया, क्योंके उ उणके सासतरिहुंण सरीको नी, पण हक से परबचन दई र्‌यो थो।

²³ उणाज बखत उणका पराथनाघर माय एक मनख जेके बायरबादा लागी थी। वा या कई के चिल्‍लाड़ी, ²⁴ हे ईसु नासरी, हमारे थार से कंई काम? कंई तू हमारे नास करवा आयो? हूं जाणूं तू कुंण हे - परमेसर को पवित्तर जणो!"

²⁵ ईसु ने उके डांटी के क्यो, "छानी रे, अने उका माय से हिटी जा।"

²⁶ तो बायरबादा उके मरोड़ी के उंची अवाज से चिखती हुई उका माय से हिटी गी। ²⁷ वी सगळा दंग रई ग्या, अने माय-माय तरक-बितरक करता होया केवा लाग्या, "या कंई बात हे? हक का साते नवी सीख! उ बायरबादा के हुकम दे अने वी उकी माने हे।"

²⁸ तो उका बारामें यो समिचार जदेज गलील का ऐरे-मेरे का आखा इलाका माय फेली ग्यो।

ईसु नरा लोगहुंण के नज करे

(मत्ती ८.१४-१७; लूका ४.३८-४१)

²⁹ वी पराथनाघर से हिटवा का बाद झट याकूब अने योहन का गेले सिमोन अने अन्द्रियास का घरे आया। ³⁰ वां सिमोन की सासु बुखार माय पड़ी थी; अने उणने झट उका बारामें ईसु के बताड़्यो। ³¹ ईसु ने उका कने अई के उको हात पकड़ी के उठाड़ी। उको बुखार उतरी ग्यो, अने वा उणकी सेवा करवा लागी।

³² सांज का बखत, दन अथणवा का बाद लोग सगळा बेमारहुंण के अने जिणका माय बुरी आतमाहुंण भरई थी ईसु कने लावा लाग्या। ³³ अने आखो नगर का फाटक पे भेळो हुई ग्यो। ³⁴ उने नरा के नरी-तरा की बेमारिहुंण से जो दुःख्या था, नज कर्‌या, अने नरी बुरी आतमाहुंण के हेड़ी; अने उ बुरी आतमाहुंण के बोलवा को हुकम नी देतो थो। क्योंके वी जाणती थी के उ कुंण हे।

एखला माय पराथना

(लूका ४.४२-४४)

³⁵ परोड़े जदे इन्दारोज थो उ उठ्यो अने बायरे हिटी के एखला माय ग्यो अने वां पराथना करवा लाग्यो। ³⁶ तो सिमोन अने उका साती उके ढुंडवा लाग्या। ³⁷ अने उणने उके पई के क्यो, "सगळा लोग थारे ढुंडी र्‌या हे।"

³⁸ उने उणकासे क्यो, "आव, हम हजु कंई ऐरे-मेरे की बस्तिहुंण माय जावां, के हूं वां बी परचार करी सकूं; क्योंके हूं इकासरु आयो हूं।"

³⁹  तो उ आखा गलील माय अने यहूदिहुंण का पराथनाघरहुंण माय जई के परचार करतो अने बायरबादाहुंण के हेड़तो र्‌यो।

कोड़्या के नज करनों

(मत्ती ८.१-४; लूका ५.१२-१६)

⁴⁰ एक कोड़्यो उका कने आयो अने उका सामे गोड़ा टेकी के उकासे बिणती करिके केवा लाग्यो। "अगर तू चावे तो म्हारे सुद्द करी सके।"

⁴¹ ईसु ने उका पे तरस खई के अपणो हात अगड़े कर्‌यो अने उकासे चोंटई के क्यो, "हूं चउं; तू सुद्द हुई जा।" ⁴² अने झट उको कोड़ खतम हुई ग्यो अने उ सुद्द हुई ग्यो। ⁴³ फेर उने काठी चेतावणी दई के उके झट मोकली द्‍यो, ⁴⁴  ईसु ने उकासे क्यो, "देख, कइंका से कइंनी केणो, पण जई के अपणे खुद के पुरोहित के बताड़ उ साबित करे अने सुद्द होवा का बारामें मूसा नबी ने जो कंई हुकम द्‍यो उको चड़ावो चड़ा जेकासे पुरोहितहुंण पे गवई रे।"

⁴⁵ पण उ बायरे हिटी के इका बारामें यां तक परचार करवा लाग्यो के ईसु पाछो खुले-आम कइंका नगर माय जई नी सक्यो, पण मांळ माय र्‌यो; फेर बी चारी-मेर से लोगहुंण उका कने आता र्‌या।