मत्ती
लिख्यो सुब-समिचार
लिखवा वाळो: परभु ईसु मसीह को पेलो चेलो जेको नाम मत्ती थो; इके लेवी बी केता था। यो पलिसतीन देस माय कर वसुळवा को काम तदत्तक करतो र्यो जदत्तक के ईसु ने उके अपणो चेलो नी बणई ल्यो थो (मत्ती ९.९; मरकुस २.१४,१५)।
लिखवा को मकसद: मत्ती ने यो सुब-समिचार खास करिके यहूदिहुंण सरु लिख्यो उने ईसु के उणका सामे मसीह, याने के यहूदिहुंण का राजा का रुप माय परगट कर्यो। या पेली सुब-समिचार की पोथी "सरग का राज" का बारा माय बी के हे; इना "सरग का राज" के सिरप मत्तीज बताड़े हे। या पोथी 'पुराणा नेम' अने 'नवा नेम' का अदाड़ माय पुळ को काम करे हे। वी नबुवतहुंण जो ईसु मसीह का आवा का बारा माय पुराणा नेम माय नरी सदी पेलां करी थी परभु ईसु माय पूरण होय हे। ईसु का जनम से लई के तो उका दुःख उठाड़वा, मार्या जावा, गाड़्या जावा अने जी उठ्यावा को बखाण घणो ठीक तरीका से कर्यो हे। इनी पोथी के लिखवा को भेद पांच कावा इना कथन माय मिळे हे, "जदे ईसु ई बातहुंण करी चुक्यो" (७.२८, ११.१, १३.५३, १९.१, २६.१)
मसीह को परबचन - इना सुब-समिचार माय मसीह का परबचनहुंण को उद्देस घणो साफ हे। इनी पोथी माय ई परबचनहुंण हे जो उना करमहुंण से नातो राखे जेकी चायना राजो उना लोगहुंण की जिनगी से करे उका राज माय हिस्सो बटाणो चावे हे।
परबत पे द्या परबचन, (५.१-७.२९)
दस चेलाहुंण के मोकलनों (१०.१-४२)
सरग का राज की मिसाल (१३.१-५३)
मान अने मांफी को अरथ (१८.१-३५)
जेतून परबत पे द्यो परबचन (२४.१-२५.४६)
रुप-रेखा
१. राजा की पेचाण १.१-४.११
२. राजा की परजा को आचरण ४.१२-७.२९
३. राजा को काम ८.१-१९.२
४.राजा की यरुसलेम नगर जातरा १९.३-२६.२
५. राजा की मोत अने जी उठणो २६.३-२८.१५
६. राजा को आखरी हुकम २८.१६-२०