22
Baroꞌ mlikat nyaꞌ nunyok ke ku sungai te mreꞌ idop. Aiꞌ nyaꞌ jriyau upa kaca te temos pedaꞌ, abaꞌ branyot kluar ari bangku raja teban dudok Tuhan Allah abaꞌ Anak Dumba. 2 Sungai nyaꞌ branyot de tengah jalai kuta. Merakaꞌ sungai nyaꞌ, adai pon kehidopan te bebuah ngenap bulan, dua blas kaleꞌ setawon. Dawon kayu nyaꞌ dengau entama kebala bansa. 3 De kuta nyaꞌ niseꞌ ageꞌ te kenaꞌ kutok Tuhan Allah. Bangku raja teban dudok Tuhan Allah abaꞌ Anak Dumba kaꞌ adai diyaꞌ abaꞌ kebala playan Tuhan Allah kaꞌ muji nyemah Ya. 4 Sidaꞌ kaꞌ beradap mua abaꞌ Tuhan Allah, abaꞌ nama Ya kaꞌ datules de dai sidaꞌ. 5 Diyaꞌ niseꞌ ageꞌ malam abaꞌ sidaꞌ nadai perlu sinar lampu abaꞌ sinar mataari, nema Tuhan Allah kaꞌ nampak sidaꞌ, abaꞌ sidaꞌ kaꞌ mrintah ngau raja niseꞌ pemadoꞌ.Penatai Isa
6 Baroꞌ mlikat nyaꞌ madah ke ku, “Ugaꞌ te depadah toꞌ kenaꞌ abaꞌ tauꞌ dapecayaꞌ. Tuhan Allah te mreꞌ roh ke kebala nabi, udah ngutos mlikat Ya ngau nunyok ke kebala playan Ya apa te alah tejadi.”
7 “Dinga kah! Ku nyau kaꞌ datai. Betuah amat mah urang te nunaꞌ ugaꞌ pesau Tuhan Allah te dapadah alam kitab toꞌ!”
8 Ku, Yohanes, ku mah te udah ninga abaꞌ medaꞌ ugaꞌ nyaꞌ. Udah ku medaꞌ abaꞌ ninga nyaꞌ, ku tesungkor de kaki mlikat kaꞌ nyemah ya te udah nganyaꞌ ugaꞌ nyaꞌ ke ku. 9 Uleh ya madah ke ku, “Adu piyaꞌ! Ku playan sama upa meh, abaꞌ kebala menyadeꞌ meh, kebala nabi abaꞌ ugaꞌ sidaꞌ te nunaꞌ kebala apa te de padah alam bukoꞌ toꞌ. Semah ke Tuhan Allah!” 10 Baroꞌ ya madah ke ku, “Nang napok pesau Tuhan Allah te adai alam bukoꞌ toꞌ ari kebala urang, nema senta nyaꞌ nyau semak. 11 Urang te mulah te jat, isaꞌ mah jong mulah te jat, urang te najes, isaꞌ mah jong mulah te najes, urang te nunaꞌ kedekaꞌ Tuhan Allah, isaꞌ mah nunaꞌ kedekaꞌ Tuhan Allah, abaꞌ urang te idop kusos ngau Tuhan Allah isaꞌ mah idop kusos ngau Tuhan Allah!”
12 Isa madah, “Dinga ke toꞌ! Nadai lamaꞌ ageꞌ Ku kaꞌ datai! Ku kaꞌ ngemaiꞌ upah ngau malas ngenap urang nunaꞌ apa te udah sidaꞌ pulah. 13 Ku mah Alpa abaꞌ Omega te semaru abaꞌ te pemadoꞌ.” 14 Betuah amat mah sidaꞌ te mampoꞌ jubah sidaꞌ sampai brseh. Sidaꞌ sadi makai buah pon kehidopan abaꞌ tamaꞌ ke alam kuta mansaꞌ kebala pintu gerbang. 15 Uleh kebala urang te mulah utai te najes, kebala dukon, kebala urang te kanyi, kebala urang te munoh, kebala urang te nyemah pentek, kebala urang te ngemulaꞌ, abaꞌ kebala urang te budi-budi bayek, sidaꞌ nyaꞌ nadai sadi tamaꞌ kuta. 16 “Ku Isa te udah ngutos mlikat Ku madah ugaꞌ utai toꞌ ke kitaꞌ kebala jemat. Ku mah pureh Raja Daot, Ku mah piyanau timor trang te tumoh lam panam.”
17 Roh Kudos abaꞌ pengantin te inoꞌ madah, “Boh kitoꞌ!” Ngenap urang te ninga toꞌ alah madah, “Boh mah!” Sapa te awos, ya alah datai, abaꞌ sapa te kaꞌ, ya tauꞌ ngameꞌ gena aiꞌ ari mata aiꞌ te nyuroh idop.
Pesau te pemadoꞌ
18 Ku Yohanes ngingat ugaꞌ urang te ninga pesau Tuhan Allah alam kitab toꞌ, “Enteꞌ adai urang te namah utai ke alam kitab toꞌ, Tuhan Allah kaꞌ namah ukom ke urang nyaꞌ ngau ugaꞌ bencana te adai alam kitab toꞌ. 19 Abaꞌ enteꞌ adai urang te ngurang utai ari kitab toꞌ, Tuhan Allah kaꞌ ngameꞌ jatah pon kehidopan abaꞌ kuta kudos ari ya upa te datules alam kitab toꞌ.”
20 Isa toꞌ mah te madah ugaꞌ brita toꞌ kenaꞌ. Ya madah, “Nyau mah Ku kaꞌ datai!”
Amen! Datai mah Tuhan Isa.
21 Engkremaꞌ Tuhan Isa mreꞌ berkat Ya ke ugaꞌ kitaꞌ! Amen!