Isa debaiꞌ ngusong Pelatos
27
Lam panam ugaꞌ kebala kepalaꞌ imam abaꞌ pemimpen Yahudi bepekat kaꞌ munoh Isa. 2 Sidaꞌ masong Ya abaꞌ ngemaiꞌ Ya ngusong Pelatos te jadi gubernor tengan nyaꞌ.Pemati Yudas
3 Pas Yudas te nyerah Ya medaꞌ Isa kaꞌ deukom mati, ya ma nesal abaꞌ mulai tiga puloh kepeng duet pirak te detrimaꞌ ya ari kebala kepalaꞌ imam abaꞌ kebala pemimpen Yahudi. 4 Ya madah, “Ku udah dusa nema ku udah nyual urang te niseꞌ salah isaꞌ debunoh.”
Uleh sidaꞌ nyawot ya, “Nyaꞌ niseꞌ uros abaꞌ kami. Nyaꞌ uros meh mah!”
5 Baroꞌ ya nibar duet pirak nyaꞌ ke alam Rumah Kudos Tuhan Allah. Udah nyaꞌ ya angkat ari nyaꞌ ngantong direꞌ.
6 Kebala kepalaꞌ Imam mungkot duet nyaꞌ abaꞌ madah, “Toꞌ duet darah. Enteꞌ nunaꞌ Prator Musa, duet toꞌ nitauꞌ de pajak ke kutak pesemah, nema duet toꞌ asel ari nyual urang te debunoh.” 7 Udah sidaꞌ bepekat duet nyaꞌ dengau sidaꞌ meli tanah te depadah sidaꞌ “Tanah Tukang Sampau Periyok.” Tanah nyaꞌ ngau ngubor urang penatai. 8 Nyaꞌ nyuroh tanah nyaꞌ datai ke sari toꞌ mah desebot “Tanah Darah.” 9 Ngau cara nyaꞌ temoꞌ mah apa te depadah nabi Yeremia, “Sidaꞌ nerimaꞌ tiga puloh kepeng duet pirak. Nyaꞌ mah rega te dekedekaꞌ sidaꞌ Israel ngau mayar Ya. 10 Abaꞌ duet nyaꞌ sidaꞌ ngau ke meli Tanah Tukang Sampau Periyok, munyi te depesau Tuhan ke ku.”a
Isa de mua Pelatos
11 Pas Isa debaiꞌ ngadap Gubernor Pelatos, ya nanyaꞌ ke Isa, “Wan raja sidaꞌ Yahudi piyaꞌ?”
Sawot Isa, “Auꞌ, wan madah piyaꞌ.”
12 Uleh pas kebala kepalaꞌ imam abaꞌ kebala pemimpen Yahudi nudoh Isa, Ya sama sekaleꞌ nadai nyawot. 13 Kebaꞌ nyaꞌ Pelatos madah ke Ya, “Nadai piyaꞌ Wan ninga mayoh kebala penyalah te detudoh sidaꞌ ke Wan nyaꞌ?”
14 Uleh Isa sama sekaleꞌ nadai nyawot, nyaꞌ ngasoh gubernor ma ampal.
15 Ngenap ari besai Paskah Yahudi, gubernor sengket gah ngelepas urang te de penyara nunaꞌ te depileh urang banyau. 16 Abaꞌ pas tengan nyaꞌ adai sikoꞌ urang te deketauꞌ urang lampar jat tengan de penyara, nama ya Isa Barabas. 17 Pas urang banyau nyau mayoh begugoꞌ diyaꞌ, Pelatos nanyaꞌ ke sidaꞌ, “Sapa te kitaꞌ kedekaꞌ ke ku lepas ke kitaꞌ, Isa Barabas sekaleꞌ ke Isa te desebot Al Maseh?” 18 Pelatos madah piyaꞌ nema ya tauꞌ badaꞌ kebala pemimpen Yahudi nyerah Isa ke ya tegal sidaꞌ iri ke Isa.
19 Tengan Pelatos dudok de bangku sidang, bini ya madah pesau ke ya, “Nang meh kalot ke uros urang te niseꞌ salah toꞌ, nema tegal Ya ku mimpi jaiꞌ malam teh, abaꞌ nyaꞌ nyuroh ku takot datai ke entoꞌ.”
20 Uleh kebala kepalaꞌ imam abaꞌ pemimpen Yahudi nyabong urang banyau isaꞌ sidaꞌ mintaꞌ Barabas delepas abaꞌ Isa de ukom mati.
21 Baroꞌ Pelatos nanyaꞌ ageꞌ, “Sapa te kitaꞌ pileh ku lepas kah?”
Sawot sidaꞌ, “Barabas.”
22 Pelatos nanyaꞌ sidaꞌ, “Enteꞌ piyaꞌ apa te alah ku pulah ke Isa te desebot Al Maseh?”
Ugaꞌ sidaꞌ nyawot, “Saleb ke Ya!”
23 Sawot ya, “Piyaꞌ apa pemenyat te depulah Ya?”
Uleh sidaꞌ empala mangkis kaya, “Saleb ke Ya!”
24 Breta Pelatos medaꞌ apa te jakoꞌ ya nadai dedinga urang banyau abaꞌ utai diyaꞌ nyau kaꞌ kacau, ya ngameꞌ aiꞌ abaꞌ masok jari de mua urang banyau. Ya madah, “Ku nadai tangong jawab ke pemati ensia toꞌ. Nyaꞌ tangong jawab kitaꞌ mah!”b
25 Kebala urang banyau nyawot, “Auꞌ, kami abaꞌ kebala anak kami lah te tangong jawab ke pemati Ya!”
26 Baroꞌ Pelatos ngelepas Barabas ke sidaꞌ. Ya nyuroh kebala prajuret nyimat Isa. Udah nyaꞌ ya nyerah Isa isaꞌ desaleb.
Kebala prajuret melicak Isa
27 Udah nyaꞌ kebala prajuret Pelatos ngemaiꞌ Isa tamaꞌ ke rumah besai gubernor, abaꞌ ugaꞌ prajuret begugoꞌ ngelileng Isa. 28 Sidaꞌ nyiyah baju Ya abaꞌ ngenaꞌ jubah warna ungu ke Ya. 29 Sidaꞌ mulah mahkuta ari rangau dureꞌ abaꞌ ngenaꞌ ke palaꞌ Isa. Udah nyaꞌ sidaꞌ mereꞌ tungkat ke jari Ya, baroꞌ sidaꞌ nyungkon nyemah ngau sidaꞌ melicak Ya, jakoꞌ sidaꞌ, “Idop Raja sidaꞌ Yahudi!” 30 Sidaꞌ ngeludah Ya, abaꞌ ngameꞌ tungkat nyaꞌ abaꞌ mangkong-maloꞌ palaꞌ Ya. 31 Udah sidaꞌ melicak Ya, sidaꞌ nyiah jubah warna ungu te dengau Ya baroꞌ ngenaꞌ ageꞌ baju Ya. Baroꞌ sidaꞌ ngemaiꞌ Ya keluar isaꞌ desaleb.
Isa desaleb
32 Pas kebala prajuret ngemaiꞌ Isa bejalai ke luar kuta, sidaꞌ betemu abaꞌ Simon sidaꞌ Kirene, abaꞌ sidaꞌ mukong ya nangong saleb Isa.
33 Breta sidaꞌ datai ke teban te nama Golguta, reti nyaꞌ “Teban Keruntok,” 34 kebala prajuret mereꞌ angor te dekamoh empedoꞌ ke Isa.c Udah Ya encelar, ngai Ya nginom.
35 Baroꞌ sidaꞌ nyaleb Ya, udah nyaꞌ sidaꞌ beduwaꞌ selawar baju Ya ngau cara cabot undi.d 36 Baroꞌ sidaꞌ dudok nyaga Ya diyaꞌ. 37 Abaꞌ de atau palaꞌ Ya detules ngapa Ya deukom, “Toꞌ mah Isa Raja sidaꞌ Yahudi.”
38 Adai dua ikoꞌ perampok te desaleb nungaꞌ Isa. Sikoꞌ de sepiyak kanan, sikoꞌ de sepiyak kibaꞌ Ya.
39 Kebala urang te mansaꞌ nyaꞌ melicak Ya blumaꞌ palaꞌ sidaꞌ gilek-gilek.e 40 Sidaꞌ madah, “Woi! Meh te madah direꞌ kaꞌ ngancai Rumah Kudos Tuhan Allah abaꞌ kaꞌ mulah ageꞌ alam tiga ari, selamat ke direꞌ. Enteꞌ meh amat Anak Tuhan Allah, turon ke ari saleb nyaꞌ!”
41 Piyaꞌ gaꞌ kebala kepalaꞌ imam, kebala urang te ahli alam Prator Musa abaꞌ kebala pemimpen Yahudi sigeꞌ melicak Isa. Sidaꞌ madah, 42 “Urang bukai Ya selamat, uleh direꞌ Ya kedireꞌ Ya nitauꞌ nyelamat! Enteꞌ Ya amat Raja Israel, turon ke bah Ya ari kayu saleb nyaꞌ! Baroꞌ kami kaꞌ pecayaꞌ ke Ya. 43 Ya pecayaꞌ ke Tuhan Allah abaꞌ madah direꞌ Anak Tuhan Allah. Toꞌ mah kita medaꞌ kaꞌ nadai Tuhan Allah nyelamat Ya entoꞌ.”f 44 Piyaꞌ gaꞌ dua ikoꞌ perampok te desaleb nungaꞌ Isa melicak Ya gaꞌ.
Isa mati
45 Belaboh ari jam dua belas tengah ari menua nyaꞌ sintak petang datai ke jam tiga ujong ari. 46 Kurang lebeh jam tiga Isa ngangau ngau goꞌ te sareng jakoꞌ Ya, “Eli, Eli, lamaꞌ sabakhtani?” Reti nyaꞌ, “Allah Ku, Allah Ku, ngapa Wan nudi Ku?”g
47 Ninga piyaꞌ dua tiga ikoꞌ urang te diri nungaꞌ Ya madah, “Ya ngumai nabi Elia.”
48 Baroꞌ sikoꞌ ari entara sidaꞌ beburoh beguai ngameꞌ bunga karang, abaꞌ encalop ke aiꞌ angor masam, baroꞌ de tucok ke ujong tungkat abaꞌ nyuwar ke mulot Isa isaꞌ Ya nginom.h 49 Uleh adai urang te kebukai madah, “Ilaꞌ lai, kita kaꞌ medaꞌ datai nadai Elia nyelamat Ya.”
50 Udah nyaꞌ Isa ngangau ageꞌ ngau goꞌ te sareng, baroꞌ Ya mati.
51 Pas Isa mati, tirai alam Rumah Kudos Tuhan Allah tebinsak dua ari atau datai ke baroh.i Tengan nyaꞌ adai gempa bumi abaꞌ kebala buket batu tebelah.j 52 Kebala kubor tebukaꞌ abaꞌ mayoh urang te deempu Tuhan Allah te udah mati idop ageꞌ. 53 Ugaꞌ sidaꞌ pansot ari kubor. Abaꞌ udah Isa idop ageꞌ, sidaꞌ tamaꞌ ke kuta Yerosalem abaꞌ nganyaꞌ direꞌ ke kebala urang banyau te diyaꞌ.
54 Kepalaꞌ prajuret abaꞌ kebala prajuret te nyaga Isa ma takot breta medaꞌ gempa bumi abaꞌ kebala utai te nacah utai diyaꞌ. Sidaꞌ madah, “Amat mah ni, Ya toꞌ Anak Tuhan Allah.”
55 Diyaꞌ adai mayoh kebala urang inoꞌ te tengan medaꞌ ari jaoh. Sidaꞌ nyaꞌ kebala urang inoꞌ te udah nerudi Isa belaboh ari Galelia abaꞌ nulong Ya. 56 De entara sidaꞌ nyaꞌ adai Maria Magdalena, Maria inai Yakubos abaꞌ Yusup, abaꞌ inai kebala anak Sebedios.
Isa dekubor
57 Pas slepat petang, datai sikoꞌ urang kaya te nama Yusup. Ya sidaꞌ Arimatia abaꞌ ya nyau jadi muret Isa. 58 Ya angkat ngusong Pelatos abaꞌ mintaꞌ bangkai Isa. Baroꞌ Pelatos ngasoh prajuret mereꞌ bangkai Isa ke Yusop. 59 Udah nyaꞌ Yusop ngameꞌ bangkai Isa abaꞌ ya malot ngau kayen puteh te ageꞌ baru. 60 Baroꞌ ya mengaleꞌ bangkai Isa de kubor te ageꞌ baru, te detebok ya de buket batu. Udah nyaꞌ sidaꞌ ngenyoꞌ batu besai te ngau nutop kubor, baroꞌ sidaꞌ angkat ari nyaꞌ. 61 Uleh Maria Magdalena abaꞌ Maria te ke bukai diyau diyaꞌ dudok de mua kubor nyaꞌ.
Kubor Isa dejaga
62 Sari nyaꞌ persiapan ari sabat. Nyau pagi, pas ari Sabat, kebala kepalaꞌ imam abaꞌ kebala sidaꞌ Parisi angkat ngusong Pelatos. 63 Sidaꞌ madah, “Pak, kami ingat, jalai penipu toꞌ ageꞌ idop teh, Ya udah madah, ‘Udah tiga ari lah Ku kaꞌ idop ageꞌ.’ 64 Kebaꞌ nyaꞌ printah ke prajuret nyaga kubor nyaꞌ tiga ari. Asa nadai piyaꞌ mali kebala muret Ya datai ngameꞌ bangkai Ya abaꞌ sidaꞌ nipu urang abaꞌ madah Isa nyau idop ageꞌ. Abaꞌ tipu te pemadoꞌ toꞌ ngerugi kami nema lebeh poh ari tipu te semaru jalai Ya madah direꞌ Al Maseh.”
65 Pelatos madah, “Toꞌ kebala prajuret ngau kitaꞌ, angkat abaꞌ jaga ke bamat-amat kubor nyaꞌ.”
66 Baroꞌ kebala kepalaꞌ imam abaꞌ kebala sidaꞌ Parisi angkat ke kubor mereꞌ kelaiꞌ de batu penutop kubor isaꞌ urang nitauꞌ tamaꞌ, abaꞌ ngasoh kebala prajuret nyaga kubor nyaꞌ bamat-amat.